គណបក្សអភិរក្សរបស់នាយករដ្ឋមន្ត្រី ថេរ៉េសា ម៉េយ៍ (Theresa May) បានបាត់បង់សំឡេងភាគច្រើននៅក្នុងសភា បើទោះជាបក្សកាន់អំណាចទទួលបានសំឡេងគាំទ្រលើសបក្សពលករ ដែលជាបក្សប្រឆាំងក្ដី។ ក្នុងការបោះឆ្នោតមុនអាណត្តិថ្ងៃទី៨ ខែមិថុនា គណបក្សអភិរក្សអាចទទួលបានកៅអីចំនួន៣១៨ ប៉ុណ្ណោះក្នុងសភាដែលកៅអីសរុប ៦៥០ ឯបក្សការងារទទួលបានកៅអីចំនួន២៦៧។ ការណ៍មិនទទួលបានសំឡេងភាគច្រើននេះ នឹងក្លាយជាឧបសគ្គសម្រាប់លោកស្រី ម៉េយ៍ ដែលត្រូវដឹកនាំការចរចាចាកចេញពីអឺរ៉ុប ហើយសភាក៏ត្រូវជាប់គាំងផងដែរ។
គណបក្សអភិរក្ស នឹងនៅតែជាគណបក្សធំជាងគេនៅចក្រភពអង់គ្លេសដដែល បន្ទាប់ពីទទួលបានសំឡេងគាំទ្រភាគច្រើនក្នុងការបោះឆ្នោតមុនអាណត្តិថ្ងៃទី៨ ខែមិថុនា ប៉ុន្តែគណបក្សនេះមិនទទួលបានសំឡេងភាគច្រើននៅក្នុងសភាដែលមានសមាជិកសរុប ៦៥០នាក់ឡើយ។ បក្សអភិរក្ស ដែលជាបក្សកំពុងកាន់អំណាចដឹកនាំដោយនាយករដ្ឋមន្ត្រី ថេរ៉េសា ម៉េយ៍ ទទួលបានកៅអីនៅសភាចំនួន៣១៨ នៅខ្វះចំនួន ៨កៅអីទៀត ទើបទទួលបានសំឡេងភាគច្រើន។
បើទោះជាលទ្ធផលបង្ហាញថាឈ្នះឆ្នោតលើកនេះក្ដី កៅអីនៅសភារបស់គណបក្សអភិរក្សបានថយចុះចំនួន១២កៅអី បើប្រៀបធៀបការបោះឆ្នោតលើកមុនដែលទទួលបានកៅអីចំនួន ៣៣០ ដែលជាសំឡេងភាគច្រើន។ ច្បាស់ណាស់ថា ការធ្លាក់ចុះនេះ បណ្ដាលមកពីគោលនយោបាយរបស់បក្សដែលដាក់ចេញដោយនាយករដ្ឋមន្ត្រី ម៉េយ៍ ផ្ទាល់តែម្ដង។ មុនការបោះឆ្នោត លោកស្រីរងការរិះគន់ខ្លាំង ព្រោះមិនបង្ហាញមុខលើវេទិកាជជែកដេញដោល ទាំងលោកស្រីជាអ្នកប្រកាសបោះឆ្នោតមុនអាណត្តិក្ដី។
លទ្ធផលបោះឆ្នោតក៏បង្ហាញថា គណបក្សការងារ ដែលជាបក្សប្រឆាំងដឹកនាំដោយលោក ជើរេមី ខប៊ីន(Jeremy Corbyn) នឹងទទួលបានកៅអីចំនួន២៦២ កើនឡើងចំនួន ៣០កៅអី បើប្រៀបធៀបលទ្ធផលបោះឆ្នោតឆ្នាំ២០១៥ ។ លោក ខប៊ីន បានរិះគន់លោកស្រី ម៉េយ៍ កប់ៗមាត់ពេលឃោសនារកសំឡេងឆ្នោត ជាពិសេសលើជំហរដាច់ខាតជ្រុលរបស់អង់គ្លេសក្នុងការចរចាលែងលះឲ្យដាច់ស្រេចជាមួយសហភាពអឺរ៉ុប។
សារព័ត៌មានអង់គ្លេស BBC ផ្សាយថា ក្រៅពីបក្សធំៗទាំងពីរខាងលើ បក្សតូចៗផ្សេងទៀត ក៏ទទួលបានកៅអីខ្លះដែរ។ គណបក្សប្រជាធិបតេយ្យសេរី (LDP) រំពឹងទទួលបានកៅអីចំនួន១២, គណបក្សជាតិស្កុតឡែន (SNP) ទទួលបានកៅអី៣៥ ហើយគណបក្សអង់គ្លេសឯករាជ្យ (UKIP) ដែលធ្លាប់ទទួលបានកៅអីកាលពីឆ្នាំ២០១៥ មិនទទួលបានកៅអីអ្វីសោះឡើយ ខណៈបក្សតូចៗពីរទៀតទទួលបានកៅអីសរុបចំនួន២៣ ។
១. លទ្ធផលខុសការរំពឹងទុក, មេបក្សប្រឆាំងស្នើលោកស្រី ម៉េយ៍ ចុះចេញ
គេអាចចាំបានថា នាយករដ្ឋមន្ត្រី ថេរ៉េសា ម៉េយ៍ បានប្រកាសរៀបចំការបោះឆ្នោតមុនអាណត្តិកាលពីខែមេសា បើទោះជានៅសល់បីឆ្នាំទៀតទើបដល់ការបោះឆ្នោតទូទៅក៏ដោយ។ លោកស្រីសង្ឃឹមថានឹងឈ្នះបានសំឡេងភាគច្រើន ដើម្បីពង្រឹងអំណាចក្នុងការចរចាជាមួយសហភាពអឺរ៉ុប ប៉ុន្តែល្បែងនយោបាយរបស់លោកស្រីមិនបានអ្វីដូចការរំពឹងទុកឡើយ។ លទ្ធផលបោះឆ្នោតបង្ហាញច្បាស់ថា មិនមានបក្សណាឈ្នះដាច់ឡើយ។
ដោយមិនអាចឈ្នះសំឡេងភាគច្រើនចំនួន៣២៦ក្នុងចំណោមកៅអីសរុប៦៥០ បាននោះ លោកស្រី ម៉េយ៍ ប្រឈមមុខការជាប់គាំងមិនអាចបង្កើតរដ្ឋាភិបាលបានតែឯង ហើយចាំបាច់ត្រូវមានការចូលរួមជាមួយបក្សតូចៗដើម្បីទទួលបានសំឡេងគ្រប់គ្រាន់។ បក្សប្រឆាំង ក៏ទំនងជាស្វែងរកសម្ព័ន្ធភាពជាមួយបក្សតូចៗដូចគ្នាដែរ ដែលនឹងក្លាយជាបង្កើតជាសម្ពាធដ៏ធំសម្រាប់នាយករដ្ឋមន្ត្រី ម៉េយ៍ ដ្បិតមិនអាចធ្វើអ្វីស្រួលដូចមុនឡើយ។
ជាមួយគ្នានេះ មេបក្សប្រឆាំងលោក ខប៊ីន បានស្នើឲ្យលោកស្រី ម៉េយ៍ ចុះចេញពីតំណែងទៅ ក្រោយមិនទទួលបានលទ្ធផលល្អឡើយក្នុងការបោះឆ្នោតមុនអាណត្តិនេះ។ ពីទីក្រុងឡុងដ៍ លោក ខប៊ីន បានហៅលទ្ធផលនេះជាសារសម្រាប់លោកស្រី ម៉េយ៍ ដ្បិតលោកស្រីចាញ់ទាំងការបោះឆ្នោត បាត់ទាំងសំឡេងក្នុងសភា និងបាត់ទំនុកចិត្តពីប្រជាជនអង់គ្លេសផង។ មេបក្សប្រឆាំងរូបនេះ គិតថាពេលវេលាសម្រាប់លោកស្រី ម៉េយ៍ ត្រូវចាកចេញ បានមកដល់ហើយ។
យ៉ាងណាក្ដី លោកស្រី ម៉េយ៍ ហាក់មិនមានបំណងលាលែងពីតំណែងតាមការស្នើនេះឡើយ។ ដោយលើកឡើងថាអង់គ្លេសត្រូវការស្ថិរភាព លោកស្រី ម៉េយ៍ អាចព្យាយាមបង្កើតរដ្ឋាភិបាលក្នុងនាមជាគណបក្សទទួលបានសំឡេងច្រើនជាងគេក្នុងការបោះឆ្នោតនេះ ដោយស្វែងរកបក្សតូចៗបង្កើតជាសម្ព័ន្ធភាពរដ្ឋាភិបាលចម្រុះតែម្ដង។
២. អនាគត Brexit ធ្លាក់ចូលក្នុងភាពមិនច្បាស់លាស់
លទ្ធផលបោះឆ្នោតមុនអាណត្តិបង្ហាញថា មិនមានគណបក្សណាអាចទទួលបានសំឡេងភាគច្រើនក្នុងសភាឡើយ បើទោះជាគណបក្សកាន់អំណាចអភិរក្សមានសំឡេងនាំមុខក៏ដោយ។ មានន័យថា ការចរចាលែងលះជាមួយសហភាពអឺរ៉ុប ដែលដឹកនាំដោយរដ្ឋាភិបាលបច្ចុប្បន្ន ក៏ប្រឈមមុខនឹងបញ្ហាដែរ។ លោកស្រី ម៉េយ៍ ត្រូវការសំឡេងឆ្នោតបន្ថែមទៀតដើម្បីទទួលបានសំឡេងភាគច្រើន ប៉ុន្តែគណបក្សតូចៗភាគច្រើន មិនមាននយោបាយស្របបក្សអភិរក្សឡើយលើបញ្ហាចរចានេះ។
ក្នុងករណីបក្សការងារទទួលបានការគាំទ្រពីបក្សផ្សេងទៀតដូចជាបក្សជាតិស្កុតឡែន និងបក្សប្រជាធិបតេយ្យសេរីជាដើម ហើយមានវាសនាដឹកនាំរដ្ឋាភិបាលនោះ ការចរចា Brexit នឹងដើរលើផ្លូវខុសពីផែនការរបស់បក្សអភិរក្សមិនខាន។ នេះក៏ព្រោះតែបក្សតូចៗទាំងពីរមានជំហរឲ្យអង់គ្លេសបន្តជាសមាជិកសហភាពអឺរ៉ុបដដែល ឬយ៉ាងហោចណាស់ក៏គាំទ្រការចរចាដែលទុកផ្លូវឲ្យអង់គ្លេសអាចប្រើប្រាស់ទីផ្សាររួមគ្នារបស់អឺរ៉ុបដែរ។
តាមពិតទៅ បក្សការងារ មិនជំទាស់នឹងការចាកចេញពីសហភាពអឺរ៉ុបទេ តែពួកគេនឹងលុបចោលផែនការចរចាលែងលះនេះ ហើយនឹងផ្ដល់អាទិភាពសំខាន់លើការរក្សាផលប្រយោជន៍អង់គ្លេសក្នុងសហភាពអឺរ៉ុប។ ឯបញ្ហាក្នុងស្រុកវិញ ក្រុមប្រឆាំង នឹងជំទាស់នយោបាយកាត់បន្ថយការចំណាយសាធារណៈរបស់រដ្ឋាភិបាលលោកស្រី ម៉េយ៍ លុបចោលការបង់ថ្លៃចូលរៀនថ្នាក់មហាវិទ្យាល័យ និងបង្កើនពន្ធលើអ្នកមាននៅអង់គ្លេសជាដើម៕