ជាតិ
នយោបាយជាតិ
បក្សសង្គ្រោះជាតិ បង្កើតគណៈកម្មការពិសេសពង្រឹងសមត្ថភាពក្រុមប្រឹក្សាឃុំ សង្កាត់
×
កាលពីថ្ងៃទី ៩ ខែមិថុនា គណៈកម្មាធិការអចិន្ត្រៃយ៍របស់គណបក្សសង្គ្រោះជាតិ បានសម្រេចបង្កើតគណៈកម្មការពិសេសមួយ ដើម្បីពង្រឹងសមត្ថភាពក្រុមប្រឹក្សាឃុំ សង្កាត់។
ប្រធានគណបក្សសង្គ្រោះជាតិ ឯកឧត្តម កឹម សុខា ឲ្យដឹងថា គណៈកម្មការពង្រឹងសមត្ថភាពក្រុមប្រឹក្សាឃុំ សង្កាត់ នេះ គណបក្សបានសម្រេចរើសលោក សុន ឆ័យ ជាប្រធាន។ ឯកឧត្តម កឹម សុខា បញ្ជាក់ថា បញ្ហាធនធានមនុស្សនៅថ្នាក់ក្រុមប្រឹក្សាឃុំសង្កាត់ ជារឿងសំខាន់ដែលគណបក្ស ត្រូវដោះស្រាយ ដើម្បីឲ្យក្រុមប្រឹក្សាឃុំ សង្កាត់ របស់គណបក្ស ធ្វើការប្រកបដោយប្រសិទ្ធភាពជួយដល់ប្រជាពលរដ្ឋទូទៅ។
ក្នុងពិធីជួបអ្នកគាំទ្រខ្លួននៅក្នុងខណ្ឌឫស្សីកែវ ប្រធានគណបក្សសង្គ្រោះជាតិ អំពាវនាវឲ្យអ្នកជំនាញជាតិ និងអន្តរជាតិ ចូលរួមជាមួយគណបក្ស ដើម្បីជួយពង្រឹងសមត្ថភាពមន្ត្រីថ្នាក់មូលដ្ឋាន ក្នុងគោលដៅពង្រឹងអំណាចវិមជ្ឈការថ្នាក់មូលដ្ឋាន។
កន្លងទៅឯកឧត្តម កឹម សុខា ធ្លាប់បញ្ជាក់ថា គណបក្សសង្គ្រោះជាតិជ្រើសរើសបេក្ខជនឲ្យឈរឈ្មោះបោះឆ្នោតជ្រើសរើសក្រុមប្រឹក្សាសង្កាត់ ផ្អែកលើសន្តានចិត្តរបស់បេក្ខជនដែលមានចិត្តស្រឡាញ់ប្រទេសជាតិ និងប្រជាពលរដ្ឋពិតប្រាកដ ហើយចំណេះដឹងដើម្បីបំពេញការងារ គណបក្សនឹងបង្រៀនតាមក្រោយ៕
Tag:
CNRP
កឹម សុខា
បោះឆ្នោតឃុំ សង្កាត់
© រក្សាសិទ្ធិដោយ thmeythmey.com