ព្យុងយ៉ាង៖ កូរ៉េខាងត្បូងធ្វើគថ្លង់ដាក់កូរ៉េខាងជើង តែរាំតាមភ្លេងរបស់អាមេរិក

អន្តរជាតិ

ព្យុងយ៉ាង៖ កូរ៉េខាងត្បូងធ្វើគថ្លង់ដាក់កូរ៉េខាងជើង តែរាំតាមភ្លេងរបស់អាមេរិក

12, Jun 2017 , 5:12 pm

រូបភាព

ដោយ: តន ចាន់រិទ្ធារ៉ា

កូរ៉េខាងជើង នៅថ្ងៃទី១១ ខែមិថុនា បានស្នើឲ្យកូរ៉េខាងត្បូងផ្លាស់នយោបាយអន្តរកូរ៉េរបស់ខ្លួនឡើងវិញ ដោយឈប់ដើរតាមនយោបាយរបស់អាមេរិកដែលចេះតែដាក់ទណ្ឌកម្មលើកូរ៉េខាងជើងរហូតមក។ តាមរយៈសារព័ត៌មានផ្លូវការរបស់ខ្លួន កូរ៉េខាងជើង ក៏បានរិះគន់នយោបាយអាមេរិកដែលធ្វើឲ្យកូរ៉េទាំងពីរបែកបាក់ និងបានប្រាប់ឲ្យកូរ៉េខាងត្បូងបោះបង់អាមេរិកទៅ ហើយងាកមករួបរួមគ្នាជាមួយកូរ៉េខាងជើងវិញ។

កូរ៉េខាងជើង បានបន្ទោសនយោបាយរបស់អាមេរិក ដែលបានបែងចែកកូរ៉េទាំងពីរ និងបានប្រាប់ឲ្យកូរ៉េខាងត្បូងអនុវត្តតាមការព្រមព្រៀងគ្នានាពេលកន្លងដើម្បីការបង្រួបបម្រួមកូរ៉េទាំងពីរ ជាជាងស្ដាប់តាមអាមេរិក។ កូរ៉េខាងជើង ក៏ទទូចឲ្យកូរ៉េខាងត្បូងឈប់អនុវត្តតាមទណ្ឌកម្មដែលលើកឡើងដោយអាមេរិក ព្រោះនយោបាយរបស់អាមេរិកធ្វើឲ្យកូរ៉េពីរឃ្លាតពីគ្នាកាន់តែឆ្ងាយ និងមិនអាចបញ្ចប់វិបត្តិឧបទ្វីបកូរ៉េបានឡើយ។

បើតាមបទអធិប្បាយរបស់កាសែតកូរ៉េខាងជើង Rodong Sinmun ផ្សាយដោយ Yonhap ក្រុងព្យុងយ៉ាងបានចោទក្រុងសេអ៊ូលថា បានធ្វើគធ្វើថ្លង់ដាក់ការស្នើរបស់កូរ៉េខាងជើងក្នុងការផ្សះផ្សាជម្លោះ និងការរួបរួមអន្តរកូរ៉េ ប៉ុន្តែបែរជាលោតតាមនយោបាយបង្ករឿងរបស់ក្រុងវ៉ាស៊ីនតោនទៅវិញ។ កូរ៉េខាងជើង ក៏ឲ្យកូរ៉េខាងត្បូងរាំងខ្ទប់ឥទ្ធិពលខាងក្រៅឲ្យបាន ព្រោះវាជាមូលហេតុនាំឲ្យកូរ៉េទាំងពីរមើលមុខគ្នាមិនចំ។

ការអំពាវនាវរបស់កូរ៉េខាងជើង ធ្វើឡើងស្របពេលដែលប្រធានាធិបតីកូរ៉េខាងត្បូង មូន ចេអ៊ីន អនុវត្តនយោបាយចរចាផង និងដាក់ទណ្ឌកម្មផងក្នុងបញ្ចប់វិបត្តិនុយក្លេអ៊ែរកូរ៉េខាងជើង។ តាមពិតទៅ លោក មូន ចេអ៊ីន ដែលមិនជំហរតឹងរ៉ឹងខ្លាំងដាក់កូរ៉េខាងជើងឡើយ ហើយលោកក៏មិនយល់ស្របនឹងការបន្ថែមសាំងលើភ្លើងដែរ តែលោកចង់ស្វែងរកច្រកចេញតាមរយៈដំណោះស្រាយកណ្ដាល គឺកិច្ចសន្ទនាអន្តរកូរ៉េ និងការផ្លាស់ប្ដូរទំនាក់ទំនងស៊ីវិល។

យ៉ាងណាក្ដី កូរ៉ខាងជើង បានទាត់ចោលបំណងរបស់កូរ៉េខាងត្បូងក្នុងការចាប់ផ្ដើមទំនាក់ទំនងស៊ីវិលឡើងវិញ។ ជំនួសមកវិញ កូរ៉េខាងជើងក៏ស្នើឲ្យកូរ៉េខាងត្បូងអនុវត្តតាមសេចក្ដីថ្លែងការណ៍អន្តរកូរ៉េ មុននឹងចាប់ផ្ដើមការផ្លាស់ប្ដូររវាងប្រជាជនឡើងវិញ។ សេចក្ដីថ្លែងការអន្តរកូរ៉េដែលចែងពីការផ្សះផ្សា និងកិច្ចសហប្រតិបត្តិការកូរ៉េទាំងពីរ គឺជាលទ្ធផលនៃជំនួបកំពូលរវាងអតីតប្រធានាធិបតីកូរ៉េខាងត្បូង គីម ដេជុង និងអតីតមេដឹកនាំកំពូលកូរ៉េខាងជើង គីម ជុងអ៊ីល ក្នុងឆ្នាំ២០០០ ។

ទន្ទឹមគ្នានឹងស្នើឲ្យកូរ៉េខាងត្បូងធ្វើតាមសំណើរបស់ខ្លួន កូរ៉េខាងជើងវិញ ក៏បានផ្គើនកូរ៉េខាងត្បូងជារឿយៗដែរ។ ក្រុងព្យុងយ៉ាង តែងសាកល្បងមីស៊ីលរបស់ខ្លួនយ៉ាងញឹកញាប់ ដោយគ្រាន់តែរយៈពេលមួយខែនៃការកាន់តំណែងរបស់លោក មូន ចេអ៊ីន ព្យុងយ៉ាងបានបាញ់មីស៊ីល៥លើកទៅហើយ។ លោក មូន ចេអ៊ីន ដែលមានជំហរទន់ភ្លន់នោះ ក៏បានព្រមានកូរ៉េខាងជើងដែរថា ទង្វើបង្ករឿងរបៀបនេះ នឹងធ្វើឲ្យរបបកុម្មុយនីស្តកាន់តែឯកោមិនខាន៕