កូរ៉េខាងត្បូង ប្រាប់ជប៉ុនឲ្យប្រយ័ត្នសម្ដីជុំវិញបញ្ហាស្ត្រីទាសករផ្លូវភេទ

អន្តរជាតិ

កូរ៉េខាងត្បូង ប្រាប់ជប៉ុនឲ្យប្រយ័ត្នសម្ដីជុំវិញបញ្ហាស្ត្រីទាសករផ្លូវភេទ

12, Jun 2017 , 7:59 pm

រូបភាព

ដោយ: តន ចាន់រិទ្ធារ៉ា

ក្រសួងការបរទេសកូរ៉េខាងត្បូង នៅថ្ងៃទី១២ ខែមិថុនា និយាយថា ខ្លួនបានស្នើឲ្យជប៉ុនប្រយ័ត្នប្រយែងក្នុងការធ្វើអធិប្បាយពាក់ព័ន្ធបញ្ហារសើបក្នុងទំនាក់ទំនងរវាងប្រទេសទាំងពីរ ជាពិសេសបញ្ហាស្ត្រីទសករកូរ៉េខាងត្បូងដែលទាហានជប៉ុនចាប់បង្ខំឲ្យបម្រើផ្លូវភេទសម័យសង្គ្រាមលោកលើកទី២ ។ ក្រសួងការបរទេសកូរ៉េខាងត្បូងស្នើដូចនេះ ជាការឆ្លើយតបនឹងសម្ដីរបស់បេសកជនរបស់ជប៉ុន ដែលបាននិយាយប៉ះពាល់ដល់បញ្ហាស្ត្រីបម្រើផ្លូវភេទនេះ។

បញ្ហាស្ត្រីបម្រើផ្លូវភេទកូរ៉េខាងត្បូង នៅតែជាបន្លាក្នុងទំនាក់ទំនងរវាងកូរ៉េខាងត្បូង និងជប៉ុន ទោះជាភាគីទាំងពីរប្រឹងប្រែងបញ្ចប់បញ្ហានេះក្ដី។ បញ្ហានេះ រំពឹងថាដោះស្រាយចប់សព្វគ្រប់អស់ហើយ បន្ទាប់ពីកូរ៉េខាងត្បូងក្រោមអាណត្តិលោកស្រី ប៉ាក ហ្គឺនហេ និងជប៉ុន សម្រេចបានកិច្ចព្រមព្រៀងជាប្រវត្តិសាស្ត្រមួយដើម្បីព្យាបាលរបួសនេះ។ ជប៉ុន សុខចិត្តបង់ថ្លៃជំងឺចិត្តច្រើនលានដុល្លារទៅឲ្យស្ត្រីកូរ៉េខាងត្បូងដែលត្រូវទាហានចាប់បង្ខំឲ្យធ្វើជាទាសករផ្លូវភេទ។

យ៉ាងណាក្ដី កិច្ចព្រមព្រៀងឆ្នាំ២០១៥ នេះ បានរងការរិះគន់ខ្លាំង ហើយរដ្ឋាភិបាលកូរ៉េខាងត្បូងក៏ចង់ចរចាឡើងវិញលើកិច្ចព្រមព្រៀងនេះដែរ។ ប៉ុន្តែជប៉ុនវិញ ហាក់មិនចង់វិលចូលតុចរចាម្ដងទៀតឡើយ និងបានប្រាប់កូរ៉េខាងត្បូងឲ្យទប់ស្កាត់ចលនាប្រឆាំងកិច្ចព្រមព្រៀងនេះ។ លោក Toshihiro Nikai ប្រេសិតពិសេសរបស់លោក ស៊ីនហ្សូ អាបេ នៅថ្ងៃទី១០ ខែមិថុនា បានស្នើឲ្យមានការលុបបំបាត់អ្នកដែលចង់លេងល្បិច បង្កផលប៉ះពាល់ទំនាក់ទំនងទ្វេភាគីផង។

ទីភ្នាក់ងារព័ត៌មាន Yonhap ការអធិប្បាយរបស់ប្រេសិតនាយករដ្ឋមន្ត្រីជប៉ុនក្នុងជំនួបជាមួយសមាជិកសភាកូរ៉េខាងត្បូង ធ្វើឲ្យក្រុមអ្នករិះគន់គិតថា លោក Toshihiro Nikai ចង់និយាយសំដៅចំលើអ្នកដែលទាមទារឲ្យមានការចរចាឡើងវិញកិច្ចព្រមព្រៀងទ្វេភាគីនេះ។ អ្នកនាំពាក្យក្រសួងការបរទេសកូរ៉េខាងត្បូងនិយាយថា វាជាចាំបាច់ក្នុងការប្រយ័ត្នសម្ដីពេលនិយាយដល់ទំនាក់ទំនងរវាងប្រទេសទាំងពីរ តួយ៉ាងបញ្ហាស្ត្រីទាសករផ្លូវនេះជាដើម។

នៅកូរ៉េខាងត្បូង ក្រុមអ្នករិះគន់លើកឡើងថា កិច្ចព្រមព្រៀងឆ្នាំ២០១៥ សម្រេចបានដោយរហ័សពេក ដោយគ្មានការយល់ព្រមពីប្រជាជន ហើយក៏មិនមានការសុំទោសអស់ពីចិត្តពីសំណាក់ជប៉ុនដែរ។ ទាក់ទងបញ្ហានេះ សូម្បីប្រធានាធិបតី មូន ចេអ៊ីន ក៏មិនយល់ស្របដែរ។ លោក មូន ចេអ៊ីន បានប្រាប់លោក អាបេ អំឡុងពេលនិយាយទូរសព្ទក្រោយទទួលជោគជ័យក្នុងការបោះឆ្នោត ថា ប្រជាជនកូរ៉េខាងត្បូងមិនអាចទទួលយកកិច្ចព្រមព្រៀងនេះពីចិត្តរបស់ពួកគេឡើយ។

ប្រធានាធិបតីកូរ៉េខាងរូបនេះ ក៏បង្ហើបដែរថា រដ្ឋបាលរបស់លោកអាចនឹងចាប់ផ្ដើមចរចាម្ដងទៀតលើកិច្ចព្រមព្រៀងនេះ ដោយសំដៅធ្វើយ៉ាងណាព្យាបាលរបួសផ្លូវចិត្តរបស់ស្ត្រីរងគ្រោះ និងប្រជាជនកូរ៉េខាងត្បូងទាំងមូល។ បើមានការចរចាម្ដងទៀតមែននោះ ទំនាក់ទំបងទ្វេភាគីរវាងអ្នកជិតខាងទាំងពីរដែលកំពុងមិនសូវល្អស្រាប់ផងនោះ នឹងកាន់តែពិបាកពង្រឹងម្ដងទៀត ខណៈស្រមោលប្រវត្តិសាស្ត្រនៅតែជារបាំងឧបសគ្គដដែល៕