អន្តរជាតិ
ឌូទើតេ ថាលោកមិនបានទៅសុំឲ្យកងទ័ពអាមេរិកជួយឡើយ តែសង្ស័យក្រសួងការពារជាតិជាអ្នកទៅស្នើសុំជំនួស
× ប្រធានាធិបតីហ្វីលីពីន រ៉ូឌ្រីហ្គោ ឌូទើតេ អះអាងថាលោក មិនដែលបានសុំឲ្យទាហានអាមេរិកមកជួយទាហានហ្វីលីពីនដើម្បីបោសសម្អាតក្រុមភេរវជននៅក្នុងទីក្រុង Marawi ឡើយ។ លោកបដិសេធបែបនេះក្រោយពេលដែលមន្ត្រីស្ថានទូតអាមេរិកប្រចាំហ្វីលីពីនអះអាងថា កងទ័ពអាមេរិកចូលរួមផ្តល់ការគាំទ្រផ្នែកបច្ចេកទេសយោធាដល់កងទ័ពហ្វីលីពីន ដោយសារមានការស្នើសុំពីខាងរដ្ឋាភិបាលហ្វីលីពីន។ ថ្វីបើប្រមុខរដ្ឋរូបនេះលើកឡើងដូច្នេះមែន តែគេសង្ស័យក្រសួងការពារជាតិហ្វីលីពីនជាអ្នកស្នើសុំជំនួយនេះ។ ថ្វីបើ លោក ឌូទើតេ មិនបង្ហើបថាកងទ័ពចេញមុខសុំជំនួយក៏ដោយ លោក ឌូទើតេ ទទួលស្គាល់ថា ទាហានហ្វីលីពីនភាគច្រើនជាអ្នកដែលគាំទ្រអាមេរិក ព្រោះពួកគេមានទំនាក់ទំនងជិតស្និទ្ធ និងធ្លាប់ទទួលបានការហ្វឹកហ្វឺនពីសហរដ្ឋអាមេរិកដែរ។
ការប្រយុទ្ធគ្នារវាងកងកម្លាំងរដ្ឋាភិបាល ជាមួយក្រុមភេរវជន Maute នៅក្រុង Marawi ឈានចូលដល់សប្តាហ៍ទីបីហើយ ប៉ុន្តែស្ថានការណ៍ហាក់មិនធូរស្បើយច្រើនឡើយ។ កងកម្លាំងហ្វីលីពីននៅតែមិនអាចបោសសម្អាតក្រុមភេរវជនបានទាំងស្រុង ហើយបន្តស្លាប់បាត់បង់ជីវិតក្នុងសមរភូមិប្រឆាំងភេរវកម្មនេះទៀត។ គិតត្រឹមថ្ងៃសៅរ៍ ជនស៊ីវិលចន្លោះពី ៥០០ទៅ ១០០០នាក់នៅជាប់ជាចំណាប់ខ្មាំងនៅឡើយ ហើយក្រុមភេរវជននៅសេសសល់ក៏មិនតិចជាង ២០០នាក់ឡើយ។
បើក្រឡេកមើល ចំនួនអ្នកស្លាប់ក្នុងការប្រយុទ្ធគ្នានេះវិញកើនឡើងដល់ជិត២០០នាក់ក្នុងនោះមានកងកម្លាំងហ្វីលីពីន ៥៨នាក់, ជនស៊ីវិលមាន ២០ នាក់ និងក្រុមភេរវជនមានចំនួនច្រើនជាង ១០០នាក់។ ហេតុនេះហើយ កាលពីចុងសប្តាហ៍កន្លងទៅ កងកម្លាំងពិសេសអាមេរិកក៏សម្រេចជួយគាំទ្រទាហានហ្វីលីពីនខាងផ្នែកបច្ចេកទេសយោធាប៉ុណ្ណោះដើម្បីឈានទៅបោសសម្អាតក្រុមភេរវជនដែលបណ្តាញក្រុមភេរវជនដែស្ហឬក្រុមរដ្ឋឥស្លាមផងដែរ។
ចំណែកស្ថានទូតអាមេរិកប្រចាំហ្វីលីពីនវិញ នៅថ្ងៃសៅរ៍ទី ១០ មិថុនាបានប្រកាសទទួលស្គាល់ថា កងទ័ពខ្លួនពិតជាបានផ្តល់ការគាំទ្រផ្នែកបច្ចេកទេសពិតមែន តែជំនួយនេះធ្វើឡើងតបតាមការស្នើសុំពីរដ្ឋាភិបាលហ្វីលីពីនប៉ុណ្ណោះ។
១. រដ្ឋាភិបាលហ្វីលីពីនមិនបានសុំឲ្យអាមេរិកជួយឡើយ
ដល់ថ្ងៃអាទិត្យទី ១១មិថុនា ប្រធានាធិបតីហ្វីលីពីនលោក រ៉ូឌ្រីហ្គោ ឌូទើតេ បានបដិសេធព័ត៌មាននេះ ដោយលោកបញ្ជាក់ថាលោកមិនដែលបានទៅសុំជំនួយពីសហរដ្ឋអាមេរិកដើម្បីឲ្យជួយទាហានរបស់លោកបោសសម្អាតក្រុមភេរវជននៅក្រុង Marawi ឡើយ។
ថ្លែងក្នុងទីក្រុង Cagayan de Oro លោក ឌូទើតេ បានប្រាប់អ្នកកាសែតថា លោកមិនបានដឹងជាមុនទាល់តែសោះ រហូតទាល់តែលោកបានឃើញទាហានអាមេរិកចូលមកជួយតែម្តង។ ជារួមលោកបានអះអាងយ៉ាងដាច់អហង្ការថា លោកមិនដែលបានទៅស្នើសុំជំនួយពីខាងក្រុងវ៉ាស៊ីនតោនដែរ។
ទំនាក់ទំនងរវាងអាមេរិកនិងហ្វីលីពីនធ្លាក់ចុះដុនដាបកាន់តែខ្លាំង ចាប់តាំងពីលោក ឌូទើតេឡើងកាន់អំណាចកាលពីខែមិថុនាឆ្នាំមុន។ ប្រធានាធិបតីរូបនេះទាមទារឲ្យទាហានអាមេរិកចាកចេញពីហ្វីលីពីននិងបដិសេធការផ្តល់ការហ្វឹកហ្វឺន និងប្រឹក្សាសឹកពីសហរដ្ឋអាមេរិកថែមទៀតផង។ ក្រោយបោះបង់សម្ព័ន្ធមិត្តចាស់អាមេរិក លោក ឌូទើតេ ងាកទៅរកទៅរកចិននិងរុស្ស៊ីវិញដើម្បីពង្រឹងកិច្ចសហប្រតិបត្តិការផងនិងដើម្បីទិញអាវុធផង។ ប៉ុន្តែទំនាក់ទំនងនេះហាក់ប្រសើរឡើងបន្តិចក្រោយលោក ដូណាល់ត្រាំ ស្បថចូលកាន់តំណែង។ ត្រាំ ធ្លាប់ទូរសព្ទមកជជែកហើយសរសើរសង្គ្រាមគ្រឿងញៀនហ្វីលីពីន ក៏ដូចជាអញ្ជើញលោក ឌូទើតេ ទៅបំពញទស្សនកិច្ចនៅអាមេរិកផងដែរកន្លងមក។
ត្រឡប់មកវិញ យោងតាមទីភ្នាក់ងារព័ត៌មាន Reuters អាមេរិកមិនមានទ័ពអចិន្ត្រៃយ៍នៅក្នុងប្រទេសហ្វីលីពីនទេប៉ុន្តែមហាអំណាចនេះរក្សាកងកម្លាំងពិសេសប្រហែល ៥០ ទៅ១០០នាក់ នៅភាគខាងត្បូងហ្វីលីពីនដើម្បីចូលរួមការធ្វើលំហាត់យោធាប្តូរវេនផង។ ដោយសារកងទ័ពពិសេសអាមេរិកមិនចូលច្បាំងផ្ទាល់ ជំនួយបច្ចេកទេសដែលអាមេរិកផ្តល់ឲ្យនេះផ្តោតសំខាន់លើការធ្វើចារកម្ម, ឈ្លបយកការណ៍ និងស៊ើបអង្កេតជាដើម។ បច្ចុប្បន្ននេះអាមេរិកមានកងទ័ពបន្ថែមពី ៣០០ ដល់ ៥០០នាក់នៅហ្វីលីពីនដែលពួកគេអាចជួយគាំទ្រកងទ័ពហ្វីលីពីនសម្រាប់ការហ្វឹកហ្វឺនបង្កើនសមត្ថភាពផងដែរ។
២.មិនមែនលោក ឌូទើតេ តែអាចជាកងទ័ពហ្វីលីពីនជាអ្នកសុំជំនួយពីអាមេរិក
មិនដាណាវទាំងមូលស្ថិតក្រោមច្បាប់អាជ្ញាសឹកចាប់ពីថ្ងៃ ២៣ ខែឧសភាកន្លងមកនេះ ហើយក្រោមការអនុវត្តច្បាប់អាជ្ញាសឹក ប្រធានាធិបតីមានសិទ្ធិនិងអំណាចពេញលេញលើក្រសួងការពារជាតិទាំងមូល។
ការអះអាងយ៉ាងច្បាស់លាស់របស់លោក ឌូទើតេ បញ្ជាក់ថាលោកមែនជាអ្នកដែលទៅសុំជំនួយពីអាមេរិកឡើយ។ ដូច្នេះហើយកងទ័ពហ្វីលីពីនអាចជាអ្នកដែលចេញមុខសុំជំនួយពីទាហានអាមេរិកផ្ទាល់។ យ៉ាងណាមិញ លោក ឌូទើតេមិនបានបញ្ជាក់ទេថា កងទ័ពហ្វីលីពីនទៅស្នើសុំទាហានអាមេរិកឲ្យជួយដោយមិនបានឆ្លងកាត់ឬប្រាប់លោកឲ្យដឹងជាមុន ប៉ុន្តែបុរសខ្លាំងហ្វីលីពីនរូបនេះ ទទួលស្គាល់ថា វាជារឿងធម្មតាព្រោះទាហានហ្វីលីពីនភាគច្រើនជាអ្នកគាំទ្រអាមេរិកដោយសារតែពួកគេធ្លាប់ទទួលបានការហ្វឹកហ្វឺននិងរៀនសូត្ររាប់ឆ្នាំពីអាមេរិក។
យោងតាមសារព័ត៌មានហ្វីលីពីន Rappler លោក ឌូទើតេបានបញ្ជាក់ដូច្នេះ៖«ទាហានរបស់យើងគាំទ្រអាមេរិក ហើយខ្ញុំមិនអាចបដិសេធបានទេរឿងនេះ»។
ទាក់ទិនការផ្តល់ជំនួយបច្ចេកទេសយោធារបស់ក្រុងវ៉ាស៊ីនតោននេះដែរ អ្នកនាំពាក្យប្រធានាធិបតីហ្វីលីពីន Ernesto Abella ព្យាយាមបកស្រាយថា ហ្វីលីពីននៅរក្សាជំហរអព្យាក្រឹត្យ ហើយបើកទ្វារចំហរសម្រាប់ការសហការជាមួយប្រទេសនានាជាមិត្តនិងដៃគូដើម្បីកម្ចាត់ភេរវជនមិនមែនតែសហរដ្ឋអាមេរិកឡើយ។
លោកបញ្ជាក់ថា៖«ការប្រយុទ្ធប្រឆាំងភេរវកម្ម មិនមែនជាកង្វល់របស់ហ្វីលីពីន ឬអាមេរិកឡើយ។ វាជាកង្វល់របស់បណ្តាប្រទេសនានាជាច្រើនលើលោក។ដូច្នេះហើយហ្វីលីពីនបើកទ្វារទទួលយកជំនួយពីប្រទេសទាំងអស់ បើសិនជាគេចង់ជួយយើង»។
តាមពិតទៅ មុនមានការផ្តល់ជំនួយបច្ចេកទេសយោធានេះ ក្រុងវ៉ាស៊ីនតោនក៏បានសម្រេចផ្តល់ជំនួយសព្វាវុធជាច្រើនដល់ហ្វីលីពីនដែរ ដែលវាមានតម្លៃរាប់រយលានដុល្លារក្នុងនោះមាន អាវុធខ្លី, កាំភ្លើងយន្ត និងឧបករណ៍បាញ់គ្រាប់ផងដែរ។ អាវុធទាំងនោះត្រូវបានប្រគល់ឲ្យទាហានហ្វីលីពីនតាំងពីដើមសប្តាហ៍មុនមកម្ល៉េះ៕
Tag:
រ៉ូឌ្រីហ្គោ ឌូទើតេ
អាមេរិក
Marawi
© រក្សាសិទ្ធិដោយ thmeythmey.com