អន្តរជាតិ
ប៉ាណាម៉ាបោះបង់កោះតៃវ៉ាន់ ស្រវាចាប់ចិន ប្រធានាធិបតីប៉ាណាម៉ា Juan Carlos Varela (រូបភាព Xinhua)
× រដ្ឋអាមេរិកឡាទីនប៉ាណាម៉ា សម្រេចចិត្តផ្ដាច់ទំនាក់ទំនងជាមួយកោះតៃវ៉ាន់ ហើយងាកទៅភ្ជាប់ចំណងមិត្តភាពជាមួយចិនវិញ។ ប៉ាណាម៉ា ដែលមានទំនាក់ទំនងជាមួយកោះតៃវ៉ាន់តាំងពីឆ្នាំ១៩០០ បានប្រកាសទទួលស្គាល់ក្រុងប៉េកាំង ជារដ្ឋាភិបាលស្របច្បាប់តែមួយគត់របស់ចិន និងចាត់ទុកតៃវ៉ាន់ជាផ្នែកមួយរបស់ចិនប៉ុណ្ណោះ។ ប្រធានាធិបតីប៉ាណាម៉ា Juan Carlos Varela ចាត់ទុកការទទួលតៃវ៉ាន់ជាខេត្តរបស់ចិន ជាការដើរលើផ្លូវដ៏ត្រឹមត្រូវ។
បន្ទាប់ពីមានទំនាក់ទំនងការទូតរាប់ទសវត្សរ៍មក ប៉ាណាម៉ា បានសម្រេចចិត្តបញ្ចប់ទំនាក់ទំនងការទូតនេះជាមួយកោះតៃវ៉ាន់ ហើយបោះដៃទៅរកចិនដីគោកវិញ។ នេះ ជាជោគជ័យមួយទៀតរបស់រដ្ឋាភិបាលក្រុងប៉េកាំង ដែលព្យាយាមបិទផ្លូវការទូតរបស់កោះតៃវ៉ាន់ និងធ្វើឲ្យកោះមួយនេះកាន់តែឯកោខ្លាំងឡើងលើឆាកអន្តរជាតិ។ ចិន ដែលមានលុយច្រើនសន្ធឹក មិនខ្វល់នឹងជះលុយដើម្បីអូសទាញមិត្តភក្តិរបស់តៃវ៉ាន់ឲ្យមកកៀកខ្លួនឡើយ។
សារព័ត៌មាន Bloomberg ផ្សាយថា ប្រធានាធិបតីប៉ាណាម៉ា Juan Carlos Varela ជាអ្នកប្រកាសផ្ដាច់ចំណងការទូតជាមួយតៃវ៉ាន់ដោយផ្ទាល់។ ថ្លែងតាមទូរទស្សន៍នៅថ្ងៃទី១២ ខែមិថុនា លោក Varela ចាត់ទុកការងាកទៅរកចិនដីគោក ជារឿងប្រវត្តិសាស្ត្រ ព្រោះទាំងប៉ាណាម៉ា និងចិន ចង់បានការតភ្ជាប់ក្នុងពិភពលោកដែលកាន់តែខិតជិតគ្នា។ លោកបន្តថា នេះជាសករាជថ្មីក្នុងការបង្កើតទំនាក់ទំនងថ្មីៗដូចដែលប៉ាណាម៉ាធ្វើពេលនេះ។
សូមបញ្ជាក់ថា ចិន គឺជាប្រទេសប្រើប្រាស់ព្រែកជីកប៉ាណាម៉ាធំជាងគេទីពីរ ហើយបានដើរតួយ៉ាងសំខាន់ក្នុងវិស័យជាច្រើនរបស់ប៉ាណាម៉ាដូចជាធនាគារ និងទូរគមនាគមន៍ជាដើម។ ប៉ុន្តែកន្លងមក ប៉ាណាម៉ា ក៏ទទួលបានលុយជាច្រើនលានដុល្លារពីតៃវ៉ាន់ដែរ។ លោកប្រធានាធិបតី Varela ក៏បានអរគុណតៃវ៉ាន់ដែលបានជួយប៉ាណាម៉ា ហើយបាននិយាយថា តៃវ៉ាន់គឺជាមិត្តល្អរបស់ប៉ាណាម៉ារហូតមក។
បន្ទាប់ពីបាត់បង់ប៉ាណាម៉ាទៅនោះ តៃវ៉ាន់នៅមានទំនាក់ទំនងការទូតជាមួយប្រទេស២០ទៀតប៉ុណ្ណោះនៅជុំវិញពិភពលោក។ ភាគច្រើននៃប្រទេសដែលនៅទទួលស្គាល់តៃវ៉ាន់ជាតំណាងស្របច្បាប់របស់ចិន គឺជាប្រទេសតូចៗ និងប្រទេសកោះជាដើម ហើយក្នុងនោះមាន១២ប្រទេសហើយមកពីតំបន់អាមេរិកឡាទីន។ នៅមុនការបាត់បង់ប៉ាណាម៉ា តៃវ៉ាន់ក៏បានបាត់បង់សៅតូម៉េ និងប្រាំងស៊ីបក្នុងឆ្នាំ២០១៦ ហើយគេរំពឹងថាប្រទេសផ្សេងទៀតក៏អាចចែកផ្លូវជាមួយតៃវ៉ាន់ទៀតដែរ។
តាំងពីដើមមក ចិនដីគោក និងកោះតៃវ៉ាន់ តែងប្រកួតគ្នាលើឆាកអន្តរជាតិដើម្បីទទួលបានឈ្មោះជាតំណាងស្របច្បាប់តែមួយគត់របស់ចិន។ ទាំងចិន ទាំងតៃវ៉ាន់ សុទ្ធតែបានចំណាយលុយរាប់លានដុល្លារដើម្បីទាក់ទាញប្រទេសមកគាំទ្រខ្លួន ប៉ុន្តែចិនដែលជាមហាអំណាចសេដ្ឋកិច្ចលំដាប់ទីពីរ បានទទួលជោគជ័យលើតៃវ៉ាន់ជាបន្តបន្ទាប់។ ចិន មិនខ្លាចចំណាយលុយដើម្បីបំបិទមាត់តៃវ៉ាន់លើឆាកអន្តរជាតិឡើយ ខណៈតៃវ៉ាន់ដែលមិនសូវសម្បូរធនធាន ក៏បានបាត់បង់មិត្តម្ដងមួយៗដែរ៕
Tag:
ប៉ាណាម៉ា
ចិន
តៃវ៉ាន់
© រក្សាសិទ្ធិដោយ thmeythmey.com