អន្តរជាតិ
Melania និងកូន ប្តូរទៅនៅសេតវិមាន ហើយប្រជាជននៅញូវយ៉ក សាទរព្រោះលែងស្ទះចរាចរណ៍
× កាលពីថ្ងៃអាទិត្យទី១១មិថុនា ស្ត្រីទីមួយអាមេរិក និងកូនប្រុសបានផ្លាស់ប្តូរមកស្នាក់នៅសេតវិមានជាផ្លូវការ។ អ្វីដែលគួរឲ្យចាប់អារម្មណ៍ ប្រជាជនក្រុងញូវយ៉ករីករាយជាងគេពេលឃើញស្ត្រីទីមួយនិងកូនប្រុសចាកចេញទៅរស់នៅសេតវិមានជាផ្លូវនោះ ព្រោះពួកគេមិនចាំបាច់ចំណាយលុយពន្ធបន្ថែមដើម្បីរក្សាសន្តិសុខក្រុមគ្រួសារប្រធានាធិបតីទៀត ក៏ដូចជាអស់បារម្ភរឿងស្ទះចរាចរណ៍នៅក្បែរសណ្ឋាគាររបស់លោក ដូណាល់ ត្រាំ ផង។
ស្ត្រីទីមួយអាមេរិក Melania Trump ភរិយាប្រធានាធិបតី ដូណាល់ ត្រាំ រួមជាមួយកូនប្រុស Barron Trump ដែលរស់នៅញូវយ៉កបានផ្លាស់ចូលមករស់នៅសេតវិមានហើយនៅចុងសប្តាហ៍កន្លងទៅ។ ការផ្លាស់ប្តូរមករស់នៅជាមួយស្វាមីនេះ កើតទ្បើងកាន់ក្រោយលោក ត្រាំ ស្បថចូលកាន់តំណែងរយៈពេលប្រាំខែ។
លោកស្រី Melania និងកូនប្រុសតូចវ័យដប់មួយឆ្នាំ Barron Trump បានសម្រេចចិត្តបន្តរស់នៅញូវយ៉ក ទោះបីស្វាមីលោកស្រីបានចាកចេញពីទីក្រុងទៅរស់នៅក្នុងសេតវិមានក៏ដោយ។ មូលហេតុចម្បងគឺ អ្នកស្រីនៅរង់ចាំរហូតដល់កូនប្រុសបញ្ចប់ឆ្នាំសិក្សាសិន។
ប្រជាជនមួយចំនួនឆ្ងល់ ព្រោះការសម្រេចរបស់លោកស្រី Melania Trump ខុសស្រឡះពីការសម្រេចចិត្តរបស់លោកស្រី Michelle Obama ភរិយារបស់ប្រធានាធិបតី បារ៉ាក់ អូបាម៉ា។ ទោះក្នុងនាមដែលស្ដ្រីទីមួយក៏ដោយ លោកស្រី Melania មិនតក់ក្រហល់ប្រញាប់ផ្លាស់មករស់នៅសេតវិមាន ដូចលោកស្រី Michelle ដែលបានផ្លាស់មករស់នៅរដ្ឋធានីវ៉ាស៊ីនតោន តាំងពីមុនថ្ងៃទ្បើងតំណែងរបស់លោក អូបាម៉ា ទៅទៀតដើម្បីមករកសាលាឲ្យកូនស្រីរៀន។
ទោះបីជាបែបនេះក៏ដោយលោកស្រី Melania ហាក់បីដូចជា ពេញចិត្តពេញថ្លើមចំពោះការផ្លាស់មករស់ នៅសេតវិមាននេះណាស់។ អ្នកស្រីបានថតរូបចេញពីក្នុងសេតវិមានទៅវាលស្មៅខាងក្រៅ ហើយបានបង្ហោះវាលើគណនីTwitter ផ្លូវការរបស់ខ្លួនថែមទៀតដើម្បីអបអរការរើមករស់នៅសេតវិមានដែរ។
ប្រជាជនក្រុងញូវយ៉ករីករាយជាងគេពេលដែលភរិយានិងកូនប្រុសលោក ត្រាំ មករស់នៅជុំគ្នានៅសេតវិមាន ព្រោះពួកគេមិនបាច់ចំណាយថ្លៃពន្ធសម្រាប់ការពារសុវត្ថិភាពស្ដ្រីទីមួយនិងកូនប្រុស។ ម្យ៉ាងវិញទៀត ពួកគេធូរទ្រូងព្រោះលេងមានបញ្ហាកកស្ទះចរាចរណ៍ទៀត។ នេះក៏ព្រោះថា ប៉ូលីសក្រុងញូវយ៉កតែងតែបិទវិថីលេខប្រាំនៅក្បែរសណ្ឋាគាររបស់លោកត្រាំ (Trump Tower) រាល់ពេលដែល លោកស្រី Melania និងកូនស្នាក់នៅទីនោះ។
របាយការណ៍មួយចុះផ្សាយដោយសារព័ត៌មាន The Guardian កាលពីខែកុម្ភៈ បានស្រង់សម្តីសមាជិកព្រឹទ្ធសភាបក្សប្រជាធិបតេយ្យប្រចាំក្រុងញូវយ៉កលោក Chuck Schumer ថា ក្នុងមួយថ្ងៃគេត្រូវចំណាយលុយប្រហែល ប្រាំសែន ដុល្លារលើប៉ូលិសជិត ២០០នាក់ដែលឈរជើងការពារជុំវិញសណ្ឋាគារលោក ដូណាល់ ត្រាំ នៅលើវិថីលេខប្រាំ នាតំបន់ Manhattan ផងដែរ។
ស្របពេលជាមួយគ្នានេះដែរ ដូណាល់ត្រាំដែលមិនបានអើពើចំពោះការមករស់នៅសេតវិមានរបស់ភរិយាខ្លួនឡើយ។ លោកបែរជាផ្ដោតអារម្មណ៍ទៅលើការបង្ហាញខ្លួនរបស់កូនស្រីច្បង Ivanka Trumpក្នុងកម្មវិធី Fox and Friends នៅព្រឹកថ្ងៃទី១២ខែមិថុនាទៅវិញ៕
Tag:
ដូណាល់ ត្រាំ
Melania Trump
Barron Trump
© រក្សាសិទ្ធិដោយ thmeythmey.com