អន្តរជាតិ
អាពាហ៍ពិពាហ៍រវាងបុរស៣នាក់ត្រូវបានទទួលស្គាល់នៅកូឡុំប៊ី
× កូឡុំប៊ី បានអនុញ្ញាតឲ្យមានអាពាហ៍ពិពាហ៍រវាងអ្នកស្រឡាញ់ភេទដូចគ្នា ចាប់តាំងពីឆ្នាំ២០១៦មក ហើយកាលពីដើមខែកន្លងមក រដ្ឋាភិបាលនៃប្រទេសនៅអាមេរិកឡាទីនមួយនេះ បានទទួលស្គាល់ផ្លូវច្បាប់ចំពោះគ្រួសារមួយដែលមានបុរស៣នាក់។
បុរសកូឡុំប៊ី៣នាក់រួមមាន Victor Hugo Prada, Manuel Jose Bermudez និង John Alejandro Rodriguez បានអះអាងថា ពួកគេត្រូវបានទទួលស្គាល់ផ្នែកផ្លូវច្បាប់ក្នុងការកសាងគ្រួសារដ៏ទំនើបមួយ ហើយជាលើកដំបូងបំផុតនៅក្នុងប្រទេស។
Victor Hugo Prada ដែលជាតារាសម្តែង បានអះអាងតាមរយៈឃ្លីបវីដេអូមួយថា លោក និងគូស្នេហ៍ពីរនាក់ទៀត គឺលោក John Alejandro Rodriguez ដែលជាគ្រូកីឡា និងលោក Manuel Jose Bermudez ដែលជាអ្នកសារព័ត៌មាន បានចុះហត្ថលេខាលើឯកសារផ្លូវច្បាប់នៅក្រុង Medellin ក្នុងការកសាងគ្រួសាររួមគ្នាមួយ ជាមួយនឹងការទទួលបានសិទ្ធិគ្រប់គ្រងរួម។
យោងតាម AFP លោក Rincon Perfetti មេធាវីអាល្លឺម៉ង់ដែលបម្រើការឲ្យបណ្តាញអ្នកស្រឡាញ់ ភេទ ដូចគ្នា LGBTI បានអះអាងថា នេះជាករណីលើកដំបូងបំផុតដែលមានការទទួលស្គាល់អាពាហ៍ពិពាហ៍មនុស្ស៣នាក់។
លោក Rincon Perfetti ថា៖ «វាជាការទទួលស្គាល់ថា គ្រួសារបែបថ្មីមួយទៀត បានកើតមានហើយ»។ កូឡុំប៊ី ជាប្រទេសទី៤នៅអាមេរិកខាងត្បូង ដែលទទួលស្គាល់អាពាហ៍ពិពាហ៍អ្នកស្រឡាញ់ភេទដូចគ្នា បន្ទាប់ពីអាហ្សង់ទីន ប្រេស៊ីល និងអ៊ុយរូហ្គាយ៕
Tag:
ស្រឡាញ់ភេទដូចគ្នា
LGBT
© រក្សាសិទ្ធិដោយ thmeythmey.com