អន្តរជាតិ
ព្រឹទ្ធសភាអាមេរិក អនុម័តច្បាប់ដាក់ទណ្ឌកម្មថ្មីបន្ថែមប្រឆាំងរុស្ស៊ី និងអ៊ីរ៉ង់
× សមាជិកព្រឹទ្ធសភាអាមេរិកបានបោះឆ្នោតអនុម័តច្បាប់កំណត់បន្ថែមទណ្ឌកម្មប្រឆាំងរុស្ស៊ី និងអ៊ីរ៉ង និងបង្ខំឲ្យប្រធានាធិបតី ដូណាល់ ត្រាំ រកការអនុញ្ញាតពីសភាទាំងពីរសិន មុនបន្ធូរបន្ថយ លុបចោល ឬព្យួរទណ្ឌកម្មប្រឆាំងរុស្ស៊ី។ បញ្ជីទណ្ឌកម្មថ្មីដែលមានគោលដៅដាក់គំនាបលើរុស្ស៊ីនេះនឹងបង្កើតឧបសគ្គថ្មីទៀតសម្រាប់រដ្ឋបាលអាមេរិកបច្ចុប្បន្នដែលមានជំហរចង់ទៅស្និទ្ធជាមួយរុស្ស៊ីនោះ។
ព្រឹទ្ធសភាអាមេរិកបានបោះឆ្នោតអនុម័តច្បាប់មួយដែលមានគោលដៅដាក់ទណ្ឌកម្មបន្ថែមប្រឆាំងរុស្ស៊ី, អ៊ីរ៉ង់ និងតម្រូវឲ្យប្រធានាធិបតេយ្យស្វែងរកការយល់ព្រមជាមុនពីសភាទាំងពីរសិនដើម្បីលុបចោលទណ្ឌកម្មប្រឆាំងរុស្ស៊ី។
យោងតាមទីភ្នាក់ងារព័ត៌មាន Reuters ច្បាប់ថ្មីដែលព្រឹទ្ធសភាអាមេរិកទើបអនុម័តក្រោមសំឡេង ៩៨ ទល់នឹង ២នេះ មានគោលដៅចម្បងពិន័យរុស្ស៊ីដែលហ៊ានលូកលាន់ចូលក្នុងការបោះឆ្នោតប្រធានាធិបតីឆ្នាំ ២០១៦, ការក្រសោបយកទឹកដី Crimea ក៏ដូចជាគាំទ្ររបបដឹកនាំស៊ីរីផងដែរ។ មិនត្រឹមតែប៉ុណ្ណោះទេ ច្បាប់ថ្មីនេះក៏មានបញ្ចូលវិធានការដាក់សម្ពាធលើអ៊ីរ៉ង់ដែលបន្តអភិវឌ្ឍកម្មវិធីផលិតមីស៊ីលបាលីស្ទិកកន្លងមកផងដែរ។
បើសិនជាច្បាប់នេះត្រូវរដ្ឋសភាអនុម័ត និងចុះហត្ថលេខាដោយប្រធានាធិបតីនោះ ទណ្ឌកម្មប្រឆាំងរុស្ស៊ីទាំងអម្បាលម៉ានដែលដាក់ចេញដោយក្រឹត្យប្រធានាធិបតី បារ៉ាក់ អូបាម៉ា នឹងចូលជាធរមាន។ ហើយច្បាប់នេះក៏បង្កើតទណ្ឌកម្មថ្មីទៀតប្រឆាំង ក្រុមហ៊ុនរ៉ែ, ដឹកជញ្ជូន និងរថភ្លើងជាដើម។
ប្រធានគណៈកម្មាធិការកិច្ចការបរទេសនៃព្រឹទ្ធសភាអាមេរិកលោក Bob Corker បានថ្លែងថា៖« ច្បាប់នេះផ្ញើសារច្បាស់លាស់មួយទៅកាន់រុស្ស៊ី ក៏ដូចជារាល់សកម្មភាពខុសច្បាប់ទាំងអស់ដែលរុស្ស៊ីបានធ្វើកន្លងមក»។
ក្រៅពីនេះ វាក៏មានគោលដៅដាក់ទណ្ឌកម្មរាល់ជនជាតិឬក្រុមហ៊ុនរុស្ស៊ីដែលពាក់ព័ន្ធការវាយប្រហារតាមអ៊ីនធឺណិត និង ផ្គត់ផ្គង់អាវុធឲ្យរដ្ឋាភិបាលស៊ីរីផងដែរ។ ក្រោមអំណាចច្បាប់ថ្មីនេះ ប្រធានាធិបតីដែលធ្លាប់មានអំណាចលុបចោលទណ្ឌកម្មនោះ ក៏ចាំបាច់ត្រូវស្វែងរកការយល់ព្រមពីសភាជាមុនដែរមុនអាចលុប ព្យួរ ឬបន្ថយទណ្ឌកម្មប្រឆាំងរុស្ស៊ី។
តាមស្ថានភាពជាក់ស្តែង ច្បាប់នេះនឹងបង្កើតឧបសគ្គថ្មីទៀតសម្រាប់រដ្ឋបាលលោក ដូណាល់ ត្រាំ ដែលមានបំណងចង់បង្កើតចំណងមិត្តភាពស្និទ្ធស្នាលជាមួយរបបដឹកនាំរុស្ស៊ីនោះ។
ទីភ្នាក់ងារព័ត៌មាន Reuters ក៏ស្រង់សម្តីប្រតិកម្ម របស់ប្រធានាធិបតីរុស្ស៊ីលោក វ្ល៉ាឌីមៀ ពូទីន តបការអនុម័តច្បាប់នេះដែរ។លោក ពូទីន ព្រលយថា ការសម្រេចធ្វើបែបនេះឆ្លុះបញ្ចាំងឲ្យឃើញពីការតស៊ូរប្រជែងផ្នែកនយោបាយក្នុងសង្គមអាមេរិក ហើយរាល់បំណងដាក់ទណ្ឌកម្មទាំងឡាយកន្លងមក ជាការព្យាយាមរបស់អាមេរិកក្នុងការរារាំងការងើបឡើងរបស់រុស្ស៊ីដែរ។
ត្រឡប់មកវិញ បន្ទាប់ពីព្រឹទ្ធសភាអនុម័តហើយនោះ ច្បាប់នេះនឹងត្រូវបញ្ជូនទៅរដ្ឋសភាដើម្បីបើអង្គប្រជុំជជែកដេញដោលគ្នា។ ប៉ុន្តែគេនៅតែមិនទាន់ច្បាស់ថា ការបោះឆ្នោតអនុម័តច្បាប់នេះនៅរដ្ឋសភា អាចនឹងត្រូវរៀបចំឲ្យបានមុនចុងខែកក្កដា មុនពេលសមាជិកសភាឈប់សម្រាករដូវក្តៅឬអត់ឡើយ។
បច្ចុប្បន្ននេះ រដ្ឋបាល ដូណាល់ ត្រាំ ព្យាយាមរារាំងការអនុម័តច្បាប់នេះ។ នៅរដ្ឋសភាបក្សសាធារណៈរដ្ឋកាន់កាប់អាសនៈភាគច្រើនសរុប ២៣៨ ខណៈដែលបក្សប្រជាធិបតេយ្យកាន់កាប់ត្រឹមតែ ១៩៨ អាសនៈប៉ុណ្ណោះ។ ដូច្នេះហើយកញ្ចប់ទណ្ឌកម្មដែលមានចែងក្នុងច្បាប់នេះប្រហែលជាត្រូវកែតម្រូវច្រើន ដើម្បីអាចចេញរួច។
ពាក់ព័ន្ធបំណងដាក់ទណ្ឌកម្មប្រឆាំងរុស្ស៊ីនេះដែរ រដ្ឋមន្ត្រីការបរទេសអាមេរិកលោក រិច ធីល័រសិន បានចោទសួរផងដែរជុំវិញការជំរុញឲ្យមានការអនុម័តច្បាប់នេះ។ លោកក៏បានទទូចឲ្យសភាគិតគូរឡើងវិញ និងធានាឲ្យបានថា ច្បាប់ថ្មីដែលដាក់ទណ្ឌកម្មរុស្ស៊ីនេះនៅតែទុកផ្លូវឲ្យប្រធានាធិបតីអាចបត់បែនបានក្នុងការកំណត់ទណ្ឌកម្ម ស្របតាមតម្រូវការ និងស្ថានភាពការទូតជាក់ស្តែងផងដែរ៕
Tag:
ព្រឹទ្ធសភាអាមេរិក
រុស្ស៊ី
ដូណាល់ ត្រាំ
វ៉ា្លឌីមៀ ពូទីន
© រក្សាសិទ្ធិដោយ thmeythmey.com