ពលរដ្ឋអគាប៊ូឌីញ«ស» ៤១៤បន្ទប់ បានទូទាត់សំណងពីក្រុមហ៊ុនជប៉ុន

ជាតិ

ពលរដ្ឋអគាប៊ូឌីញ«ស» ៤១៤បន្ទប់ បានទូទាត់សំណងពីក្រុមហ៊ុនជប៉ុន

17, Jun 2017 , 9:39 pm

រូបភាព

រូបពីវេបសាយក្រសូងរៀបចំដែន នគរូបនីយកម្ម និងសំណង់

ដោយ: ធឿន បញ្ញាឬទិ្ធ

ភ្នំពេញ៖គិតត្រឹមថ្ងៃទី១៦ ខែមិថុនា ប្រជាពលរដ្ឋរស់នៅអគារប៊ូឌីញ«ស» ៤១៤បន្ទប់ ក្នុងចំណោម៤៦៤គ្រួសារ ដែលបានយល់ព្រមចុះកិច្ចសន្យាលក់-ទិញជាមួយក្រុមហ៊ុនជប៉ុន អារ៉ាកាវ៉ា បានទូទាត់ប្រាក់សំណងជាផ្លូវការរួចរាល់ហើយ ទៅតាមតម្លៃនៃទំហំបន្ទប់របស់ពួកគាត់ ដែលបានវាស់វែងដោយអ្នកជំនាញរបស់ក្រសួងដែនដី។

បើតាមក្រសួងរៀបចំដែនដី ពលរដ្ឋដែលបានមកទទួលយកសំណងនេះ ក្រុមហ៊ុនក៏បានឧបត្ថម្ភថវិកា ១០០ដុល្លារបន្ថែមទៀត សម្រាប់ការរើអីវ៉ាន់ចាកចេញ ព្រមទាំងផ្ដល់ជូនសារុង ០១ និងក្រមា ០១ ផងដែរ។

ក្នុងកិច្ចសន្យាលក់ទិញអាគារប៊ូឌីញនេះដែរក្រុមហ៊ុនជប៉ុនអារ៉ាកាវ៉ា បានផ្ដល់តម្លៃគឺមួយម៉ែត្រការ៉េ១៤០០ដុល្លារ។ ដូច្នេះចំពោះអ្នកដែលមានបន្ទប់ផ្ទៃក្រឡាធំ និងទទួលបានប្រាក់ច្រើនទៅតាមការវាយតម្លៃរបស់ក្រសួងដែរ ។ ពលរដ្ឋដែលចាកចេញពីអគារប៊ូឌីញអាចទទួលបានសំណង ចាប់ពីរម៉ឺនដុល្លារ ដល់ប្រាំម៉ឺនដុល្លារ ឬលើសពីនេះផងដែរ នៃទំហំបន្ទប់នីមួយៗ។ នេះបើតាមពលរដ្ឋ ដែលធ្លាប់ប្រាប់សារព័ត៌មានថ្មីៗ កន្លងមក។

ក្នុងចំណោមពលរដ្ឋដែលរស់នៅអគារប៊ូឌីញចំនួន ៤៩៣ បន្ទប់ មានពលរដ្ឋនៅអាគារប៊ូឌីញ៤៦៤ បន្ទប់ ដែលយល់ព្រមសំណងពីក្រុមហ៊ុនជប៉ុន ។ ចំណែកពលរដ្ឋ២៨បន្ទប់ទៀត មិនទាន់យល់ព្រមទទួលយកសំណងនេះឡើយ។ តែយ៉ាងណាក្រសួងរៀបចំដែនដី បានប្រកាសថា ពលរដ្ឋដែលយល់ព្រមទទួលសំណងនេះ នឹងត្រូវរើចេញពីអគារប៊ូឌីញ ចាប់ពីថ្ងៃទី៦ មិថុនា ដល់ថ្ងៃទី៦កក្កដាខាងមុខនេះ។

សូមបញ្ជាក់ថា អគារប៊ូឌីញដែលមានវ័យចំណាស់ បង្កើតឡើងនាអំឡុងទសវត្ស ១៩៦០ ត្រូវបានក្រុមហ៊ុនជប៉ុនមួយឈ្មោះ អារ៉ាកាវ៉ា ទិញពីពលរដ្ឋក្នុងតម្លៃ១៤០០ដុល្លារអាមេរិក ក្នុងមួយម៉ែត្រការ៉េ។ ទីតាំងអគារប៊ូឌីញនេះ នឹងត្រូវសង់ជាអគារពាណិជ្ជកម្មកម្ពស់៣០ជាន់ ដែលគ្រោងចំណាយទឹកប្រាក់ចន្លោះពី៧០លាន ទៅ៨០លានដុល្លារអាមេរិក៕