ជាស្ត្រីចៅហ្វាយខេត្តទី១ លោកស្រី មិថុនា ភូថង ប្ដេជ្ញា ពង្រឹងការអភិវឌ្ឍខេត្តកោះកុង

ជាតិ

នយោបាយជាតិ

ជាស្ត្រីចៅហ្វាយខេត្តទី១ លោកស្រី មិថុនា ភូថង ប្ដេជ្ញា ពង្រឹងការអភិវឌ្ឍខេត្តកោះកុង

18, Jun 2017 , 6:37 pm

រូបភាព

រូបពីហ្វេសប៊ុកលោកស្រី មិថុនា ភូថង

ដោយ: រំដួល ចិត្រា (Romdoul Chetra)

ភ្នំពេញ៖ លោកស្រី មិថុនា ភូថង គឺជាស្ត្រីដំបូងគេ ដែលត្រូវបានព្រះមហាក្សត្រតែងតាំងជាអភិបាលខេត្តកោះកុង។ ក្នុងឋានៈជាអភិបាលខេត្តនេះ លោកស្រី មិថុនា ភូថង ប្ដេជ្ញាធ្វើជាចៅហ្វាយខេត្តស្ត្រីគំរូ ក្នុងការអភិវឌ្ឍខេត្តកោះកុងនេះ។

«ខ្ញុំមានមោទនភាពណាស់ ដែលទទួលបានតំណែងជាអភិបាលខេត្តក្នុងនាមស្ត្រីខ្មែរម្នាក់»។ នេះជាអារម្មណ៍របស់លោកស្រី មិថុនា ភូថង អភិបាលថ្មីនៃខេត្តកោះកុង ដែលបានប្ដេជ្ញា ពង្រីកការអភិវឌ្ឍខេត្តកោះកុងនេះ ឲ្យមានសក្កានុពលលើផ្នែកទេសចរណ៍ និងសេដ្ឋកិច្ច ឲ្យកាន់តែរឹងមាំបន្ថែមទៀត។ ថ្លែងប្រាប់សារព័ត៌មានថ្មីៗ តាមទូរសព្ទលោកស្រី មិថុនា ភូថង បានអត្ថាធិប្បាយយ៉ាងដូច្នេះថា៖«យើងមានហើយនូវផែនការយុទ្ធសាស្ត្រ៥ឆ្នាំ ក្នុងការអភិវឌ្ឍខេត្ត ក្នុងនោះយើងផ្ដោតលើវិស័យទេសចរណ៍ សេដ្ឋកិច្ច សន្តិសុខ កសិកម្ម…ជាដើម ។ ជាពិសេសពង្រឹងសមត្ថភាពមន្ត្រីថ្នាក់ខេត្ត ថ្នាក់មូលដ្ឋាន ឲ្យអនុវត្តតាមគោលនយោបាយរាជរដ្ឋាភិបាល»។

បើក្រឡេកមើលក្នុងចំណោមអភិបាលរាជធានី -ខេត្ត ទាំង២៥វិញនោះ លោកស្រី មិថុនា ភូថង ជាអភិបាលខេត្តវ័យក្មេងជាងគេ និងបទពិសោធន៍ក្មេងខ្ចីជាងគេដែរ។ ត្រង់ចំណុចនេះលោកស្រី មិថុនា ភូថង ក៏ទទួលស្គាល់ថា បញ្ហាបទពិសោធន៍ការងារពិតជាឧបសគ្គសម្រាប់លោកស្រីមែន។ ប៉ុន្តែលោកស្រី ប្តេជ្ញាយកឧបសគ្គទាំងនោះ មកធ្វើជាកំលាំងចិត្តដឹកនាំខេត្តកោះកុងឲ្យមានការរីកចម្រើនបន្ថែមទៀត ដើម្បីធ្វើជាចៅហ្វាយខេត្តស្ត្រីគំរូម្នាក់ សម្រាប់បើកផ្លូវឲ្យស្ត្រីដទៃទៀត មានឱកាសក្លាយជាចៅហ្វាយខេត្តដូចលោកស្រីដែរ។

«ខ្ញុំក៏មានការព្រួយបារម្ភខ្លះដែរលើសមត្ថភាពខ្លួនឯង។ ប៉ុន្តែខ្ញុំយល់ថាការងារអ្វីក៏វាមានឧបសគ្គដែរ។ ដូច្នេះខ្ញុំគ្រាន់តែអាចនិយាយថា ការងារអ្វីក៏ដោយយើងកុំប្រមាថ កុំព្រងើយកន្តើយលើការងារនោះបានហើយ គឺយើងត្រូវតែធ្វើវាឲ្យបាន ។ ហើយខ្ញុំនឹងពង្រឹងសមត្ថភាពខ្ញុំ ដោយយកឧបសគ្គទាំងនោះធ្វើជាកំលាំងចិត្ត។ ខ្ញុំត្រូវខិតខំប្រឹងប្រែងធ្វើកិច្ចការទាំងនោះ ដើម្បីជាស្ត្រីគំរូក្នុងការដឹកនាំដល់ស្ត្រីដទៃទៀតដែរ…។ នេះជាការលើកឡើងរបស់លោកស្រី មិថុនា ភូថង ដែលជឿជាក់ថា នៅមានស្ត្រីជាច្រើនទៀត ដែលអាចមានលទ្ធភាពក្លាយជាអភិបាលខេត្ត។

គួរបញ្ជាក់ថា លោកស្រី មិថុនា ភូថង ជាអភិបាលរងខេត្តកោះកុង ដែលត្រូវបានព្រះមហាក្សត្រតែងតាំងជាអភិបាលខេត្តកោះកុងជំនួសលោក ប៊ុន លើត ដែលត្រូវបានតែងតាំងជាទីប្រឹក្សារដ្ឋាភិបាល មានឋានៈស្មើរដ្ឋមន្ត្រី ។ ជាការកត់សម្គាល់នោះ លោកស្រី មិថុនា ភូថង ជាស្ត្រីទី១ហើយ ដែលបានក្លាយជាអភិបាលខេត្ត បន្ទាប់សម្ដេចនាយករដ្ឋមន្ត្រី ហ៊ុន សែន ធ្លាប់លើកឡើងថា រដ្ឋាភិបាលនឹងកំណត់ឲ្យមានស្ត្រីកាន់តួនាទីជាអភិបាលខេត្តនានា នៅគ្រាដែលអភិបាលចាស់ ត្រូវចូលនិវត្តន៍ ៕