អន្តរជាតិ
លី សៀនឡុង អញ្ជើញនាយករដ្ឋមន្ត្រីចិនទៅសិង្ហបុរី ស្របពេលទំនាក់ទំនងទ្វេភាគីមិនសូវល្អ
× លោកនាយករដ្ឋមន្ត្រីចិន លី ខឺឈាំង យល់ព្រមទទួលការអញ្ជើញពីសំណាក់នាយករដ្ឋមន្ត្រី លី សៀនឡុង ដើម្បីមកបំពេទស្សនកិច្ចជាផ្លូវការនៅសិង្ហបុរីនៅពេលខាងមុខ។ ដំណើរទស្សនកិច្ចនេះធ្វើឡើងក្នុងគោលបំណងពង្រឹងកិច្ចសហប្រតិបត្តិការទ្វេភាគី ខណៈដែលទំនាក់ទំនងរវាងប្រទេសទាំងពីរមិនសូវល្អប្រសើរនោះ។
ឧបនាយករដ្ឋមន្ត្រីសិង្ហបុរី Tharman Shanmugaratnamn បានជូនលិខិតរបស់នាយករដ្ឋមន្ត្រីសិង្ហបុរីលោក លី សៀនឡុង ទៅកាន់នាយករដ្ឋមន្ត្រីចិន លី ខឺឈាំង ដោយអញ្ជើញលោកឲ្យមកបំពេញទស្សនកិច្ចជាផ្លូវការនៅសិង្ហបុរី។
លោករដ្ឋមន្ត្រី លី ខឺឈាំង ឆ្លើយតបយល់ព្រម និងពេញចិត្តចំពោះការអញ្ជើញជាផ្លូវការពីសំណាក់រដ្ឋាភិបាលសិង្ហបុរីនេះ។ ប៉ុន្តែ គេមិនឃើញមានការកំណត់កាលបរិច្ឆេទច្បាស់លាស់នៃដំណើរទស្សនកិច្ចនេះឡើយ។
យោងតាមសារព័ត៌មានសិង្ហបុរី Channel News Asia លោក Tharman Shanmugaratnamn បានថ្លែងថា សិង្ហបុរីនឹងបន្តរក្សាចំណងមិត្តភាពរវាងប្រទេសទាំងពីរឲ្យបានយូរអង្វែង។ឧបនាយករដ្ឋមន្ត្រីរូបនេះបានបន្តទៀតថា ប្រទេសទាំងពីរនឹងពង្រឹងចំណងមិត្តភាពទ្វេភាគី ដោយផ្ដោតសំខាន់លើកិច្ចសហការលើវិស័យសំខាន់បីផងដែរ។
ការអញ្ជើញនាយករដ្ឋមន្ត្រីចិនមកបំពេញទស្សនកិច្ចនៅសិង្ហបុរីបង្ហាញឲ្យឃើញពីគោលជំហររបស់សិង្ហបុរីក្នុងការពង្រឹងទំនាក់ទំនងជាមួយចិន ស្របពេលដែលទំនាក់ទំនងទ្វេភាគីនេះមិនប្រសើរប៉ុន្មាននោះ។ គេនៅចាំបានថា មេដឹកនាំសិង្ហបុរីមិនត្រូវបានចិនអញ្ជើញឲ្យទៅចូលរួមក្នុងកិច្ចប្រជុំកំពូលខ្សែក្រវ៉ាត់មួយវិថីមួយដែលរៀបចំឡើងនៅក្រុងប៉េកាំងពាក់កណ្តាលខែមុនឡើយ។ គេអាចយល់បានថា ចិនមិនសូវខ្វាយខ្វល់ពីសិង្ហបុរីឡើយ ហើយចិនក៏នៅមិនពេញចិត្តសិង្ហបុរីដែរ។ បញ្ហាធំដែលធ្វើឲ្យទំនាក់ទំនងទ្វេភាគីល្អក់កករគឺ កើតឡើងនៅក្នុងខែវិច្ឆិកាឆ្នាំមុន ពេលដែលអាជ្ញាធរហុងកុងរឹបអូសបានយាន្តជំនិះយោធា ៩គ្រឿងរបស់សិង្ហបុរីដែលត្រូវបានគេបញ្ជូនមកពីកោះ តៃវ៉ាន់ បន្ទាប់ពីចូលរួមសមយុទ្ធរួមគ្នានោះ។
ត្រឡប់មកវិញ កិច្ចសហការផ្តោតផ្នែកបីសំខាន់ៗនោះមានដូចជា ទីមួយ គំនិតផ្ដួចផ្ដើម«ខ្សែក្រវ៉ាត់មួយវិថីមួយ»។ វារួមបញ្ជូលទាំងគំនិតផ្តួចផ្តើមផ្តោតលើការផ្សាភ្ជាប់ក្រុង Chongqing ជួយជំរុញការកសាងធនធានហិរញ្ញវត្ថុសម្រាប់គាំទ្រគម្រោងថ្នាក់តំបន់ និងគាំទ្រដល់ការហ្វឹកហ្វឺនមន្ត្រីមកពីប្រទេសសមាជិកគំនិតផ្តួចផ្តើមខ្សែក្រវ៉ាត់មួយវិថីមួយផងដែរ។
ទីពីរ គឺការពង្រឹងការធ្វើសមាហរណកម្មសេដ្ឋកិច្ចតាមរយៈការបង្កើតកិច្ចព្រមព្រៀងពាណិជ្ចកម្មសេរីសិង្ហបុរី-ចិនកម្រិតថ្មីមួយ ក៏ដូចជាកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយថ្នាក់តំបន់ (RCEP) ដែលរួមចំណែកលើកស្ទួយសាកលភាវូបនីយកម្ម។
និងទីបី ពង្រឹងចំណងមិត្តភាពរវាងអាស៊ាន-ចិនតាមរយៈសិង្ហបុរីដែលនឹងក្លាយជាប្រធានអាស៊ានឆ្នាំក្រោយ និងជាអ្នកសម្របសម្រួលក្នុងកិច្ចសន្ទនាទ្វេភាគីរវាងអាស៊ាន និងចិន៕
Tag:
លី ខឺឈាំង
លី សៀនឡុង
Tharman Shanmugaratnamn
© រក្សាសិទ្ធិដោយ thmeythmey.com