អន្តរជាតិ
ស្ត្រីម្នាក់ចោទមន្ត្រីអាកាសយានដ្ឋានថារំលោភសិទ្ធិឯកជនក្រោយបង្ហោះរូបបង្កងខ្លួន
× ភ្នាក់ងារសន្តិសុខនៅអាកាសយានដ្ឋាន Logan ក្រុងបូស្តុន សហរដ្ឋអាមេរិក រងការចោទប្រកាន់ពីអ្នកដំណើរម្នាក់ ដែលរិះគន់ថា មន្ត្រីទាំងនោះ បានថតបង្ហោះបង្កងរបស់ខ្លួនជាសាធារណៈ។ នេះបើតាមការផ្សាយរបស់សារព័ត៌មាន Sputnik។
រូបថតមួយសន្លឹក ទទួលបានការចាប់អារម្មណ៍យ៉ាងខ្លាំងនៅលើបណ្តាញសង្គម ដោយក្នុងរូបនោះ គេឃើញមន្ត្រីអាកាសយានដ្ឋាន Logan កាន់បង្កងរស់មួយក្បាលដែលមានទម្ងន់៩គីឡូក្រាម បន្ទាប់ពីមានការឆែកឆេរអ៊ីវ៉ាន់របស់អ្នកដំណើរ។
ក្រោយការបង្ហោះ អ្នកដំណើរដែលជាម្ចាស់បង្កង បានចោទប្រកាន់ថ្នាក់ដឹកនាំអាកាសយានដ្ឋាន Logan ក្រុងបូស្តុន រដ្ឋ Massachusetts ថា បានរំលោភសិទ្ធិឯកជន តាមរយៈការបង្ហោះរូបបង្កងខ្លួននៅលើបណ្តាញសង្គម។
អ្នកស្រី Lisa Feinman ដែលជាអាជីវករ និងជាអ្នកលក់បង្កង មានការអាក់អន់ចិត្តយ៉ាងខ្លាំងចំពោះសកម្មភាពរបស់មន្ត្រីអាកាសយានដ្ឋាន។ ស្ត្រីរូបនេះ បានសរសេរនៅលើហ្វេសប៊ុកខ្លួនថា៖ «តើអាចទទួលយកបានទេ មន្ត្រីឆេកឆេរអ៊ីវ៉ាន់របស់អ្នកណាម្នាក់ ហើយថតរូបបង្ហោះយ៉ាងដូច្នេះ?។ គាត់បានលើកឡើងថា មិនអាចទទួលយកបាននោះឡើយ ព្រោះវាបានរំលោភសិទ្ធិឯកជន។
នៅសហរដ្ឋអាមេរិក ការដឹកជញ្ជូនបង្កងតាមយន្តហោះ ទទួលបានការអនុញ្ញាត ប៉ុន្តែវាត្រូវតែមានការរៀបចំទុកក្នុងវ៉ាលីស និងបិទជិតឲ្យបានត្រឹមត្រូវ៕
© រក្សាសិទ្ធិដោយ thmeythmey.com