ក្រុងប៉េកាំងផ្តល់ជំនួយអាវុធទំហំជាង ៧លានដុល្លារដល់ទាហានហ្វីលីពីនកម្ចាត់ភេរវកម្ម

អន្តរជាតិ

ក្រុងប៉េកាំងផ្តល់ជំនួយអាវុធទំហំជាង ៧លានដុល្លារដល់ទាហានហ្វីលីពីនកម្ចាត់ភេរវកម្ម

29, Jun 2017 , 10:19 pm

រូបភាព

រូបភាព៖ South China Morning Post

ដោយ: សៅ ផលនិស្ស័យ (Sao Phal Niseiy)

ជំនួយកងទ័ពរំដោះប្រជាជនចិនមានកាំភ្លើង និងគ្រាប់ដែលមានតម្លៃប្រហែលជាង៧លានដុល្លារអាមេរិកត្រូវបានបញ្ជូនមកដល់ហ្វីលីពីនហើយនៅថ្ងៃពុធទី ២៨ ខែមិថុនានេះ។ ចិនអះអាងថា ជំនួយនេះផ្តល់ឲ្យហ្វីលីពីនដើម្បីពង្រឹងទំនាក់ទំនងទ្វេភាគី និងជួយកងទ័ពហ្វីលីពីនក្នុងគ្រាមានអាសន្នពោលគឺកំពុងប្រយុទ្ធតទល់ជាមួយក្រុមភេរវជននៅក្រុង Marawi។ ក្រៅពីផ្តល់ជំនួយជាអាវុធក្រុងប៉េកាំងក៏បានផ្តល់ជំនួយជាថវិកាជិត ៣០ម៉ឺនដុល្លារសម្រាប់ជួយប្រជាជន Marawi ដែលរងគ្រោះដោយសារការប្រយុទ្ធគ្នា និង ជិត១០ម៉ឺនដុល្លារផ្សេងទៀតសម្រាប់ក្រុមគ្រួសារទាហានដែលពលីផងដែរ។

ការប្រយុទ្ធគ្នារវាងកងកម្លាំងរដ្ឋាភិបាលនិងក្រុមឧទ្ទាម Maute ដែលមានភក្តីភាពចំពោះក្រុមភេរវជនដែស្ហឬរដ្ឋឥស្លាមនៅតែបន្តមកដល់ឥឡូវនេះ។ រដ្ឋាភិបាលប្រើប្រាស់ការវាយប្រហារតាមផ្លូវអាកាស និងបាញ់ផ្លោងចូលទីក្រុងផងដែរដើម្បីបោសសម្អាតក្រុមប្រដាប់អាវុធ។ ការប៉ះទង្គិចគ្នានេះបានបង្កឲ្យមនុស្សប្រហែលជិត ៤០០ នាក់ស្លាប់ ក្នុងនោះមានទាហាន ៧០ នាក់ និងជនស៊ីវិល ២០នាក់ផងនោះ។

ដើម្បីបង្ហាញពីការលូតលាស់នៃទំនាក់ទំនងទ្វេភាគីរវាងចិននិងហ្វីលីពីន ក្រុងប៉េកាំងបានបញ្ជូនជំនួយសព្វាវុធច្រើនសន្ធឹកសន្ធាប់មកគាំទ្រកងកម្លាំងហ្វីលីពីនក្នុងអំឡុងគ្រាអាសន្ននេះ។ ក្នុងពិធីប្រគល់អាវុធថ្ងៃ២៨ មិថុនា នៅមូលដ្ឋានទ័ពអាកាស Clark ស្ថិតនៅ Pampanga ក្រោមអធិបតីភាពប្រធានាធិបតីហ្វីលីពីន រ៉ូឌ្រីហ្គោ ឌូទើតេ និងឯកអគ្គរដ្ឋទូតចិនប្រចាំហ្វីលីពីន Zhao Jianhua គេឃើញមានអាវុធជាច្រើនដែលជំនួយរបស់ចិន។ ជំនួយយោធាទាំងនោះមានកាំភ្លើងវែង និងកាំភ្លើងស្វ័យប្រវត្តិចំនួន បីពាន់ដើម និង គ្រាប់ចំនួន ប្រាំមួយលានគ្រាប់ដែលមានទំហំស្មើ ៧,៣៥ លានដុល្លារឯណោះ។

តំណាងរដ្ឋាភិបាលចិនលោក Zhao Jianhua បានលើកឡើងថាជំនួយដែលចិនផ្តល់ឲ្យហ្វីលីពីននេះនឹងជួយគាំទ្រកងទ័ពហ្វីលីពីនក្នុងការកម្ចាត់ក្រុមភេរវជនដែស្ហ។ លោកបានបញ្ជាក់ដូច្នេះ៖ «ជំនួយយោធាដល់កងទ័ពហ្វីលីពីននឹងជួយឲ្យកងទ័ពនេះអាចយកជ័យជម្នះក្នុងសមរភូមិកម្ចាត់ក្រុមភេរវជនដែលមានភក្តីភាពចំពោះក្រុមដែស្ហ។ រដ្ឋាភិបាលចិននិងកងទ័ពរំដោះប្រជាជនចិននឹងបន្តជួយជ្រោមជ្រែងការប្រយុទ្ធប្រឆាំងភេរវកម្មរបស់កងកម្លាំងហ្វីលីពីន»។

តំណាងក្រុងប៉េកាំងរូបនេះក៏បានបញ្ជាក់បន្ថែមថា អាវុធដែលមានតម្លៃ ជាង៧លានដុល្លារនេះជាកញ្ចប់ជំនួយដំបូងប៉ុណ្ណោះ ហើយកញ្ចប់ជំនួយថ្មីទៀតនឹងមកដល់ហ្វីលីពីននៅពេលខាងមុខផងដែរ។

ការផ្តល់ជំនួយជាអាវុធនេះបង្ហាញឲ្យឃើញពីការរីកលូតលាស់នៃទំនាក់ទំនងទ្វាគីរវាងចិននិងហ្វីលីពីន ដែលធ្លាប់តែល្អក់កករផងដែរ។ ហើយមន្ត្រីទូតចិនដែលតំណាងឲ្យរដ្ឋាភិបាលខាងលើក៏បានបង្ហើបផងដែរថាវាជាការត្រួសត្រាយផ្លូវសម្រាប់ការពង្រឹងកិច្ចសហប្រតិបត្តិការទ្វេភាគីរវាងកងទ័ពចិននិងកងទ័ពហ្វីលីពីន ហើយគេរំពឹងថា វានឹងមានការសមយុទ្ធយោធារួមគ្នា រួមទាំងចែករម្លែករបាយការណ៍ចារកម្មផងដែរនៅពេលខាងមុខដើម្បីកម្ចាត់ភេរវកម្ម។

ដោយឡែក ប្រមុខរដ្ឋហ្វីលីពីនលោក រ៉ូឌ្រីហ្គោ បានពិនិត្យមើលអាវុធជាជំនួយរបស់ក្រុងប៉េកាំងផងដែរ មុនពេលលោកថ្លែងសុន្ទរកថា។ លោកបានថ្លែងអំណរគុណចំពោះរដ្ឋាភិបាលក្រុងប៉េកាំងដែលជួយជ្រោមជ្រែងហ្វីលីពីនក្នុងនាមជាមិត្តពេលមានគ្រាអាសន្នអន់ក្រ។ លោកបានថ្លែងដូច្នេះថា៖« សូមលោក Zhao នាំយកការថ្លែងអំណរគុណរបស់យើងខ្ញុំទៅកាន់ប្រធានាធិបតី ស៊ី ជិនភីង និងរដ្ឋាភិបាលនៃសាធារណរដ្ឋប្រជាមានិតចិនចំពោះកញ្ចប់ជំនួយយោធាដែលខ្ញុំទទួលនេះជំនួសឲ្យរដ្ឋាភិបាលហ្វីលីពីន»។

ក្រៅពីជំនួយយោធា រដ្ឋាភិបាលចិនក៏ផ្តល់ជំនួយមនុស្សធម៌សម្រាប់ជួយប្រជាជននិងក្រុមគ្រួសារកងទ័ពហ្វីលីពីនដែលពលីនៅក្នុងក្រុង Marawi ដែល។ នៅដើមសប្តាហ៍កន្លងទៅ អគ្គរដ្ឋទូតចិនខាងលើក៏បានផ្តល់មូលប្បទានបត្រដែលមានទំហំទឹកលុយប្រហែល ៣០ ម៉ឺនដុល្លារជូនដល់តំណាងរដ្ឋាភិបាលហ្វីលីពីនផងដែរដែលទឹកលុយនេះនឹងត្រូវប្រើប្រាស់សម្រាប់ជួយគាំទ្រដល់ប្រជាជនក្រុង Marawi ដែលរត់ភៀសខ្លួន និងរងគ្រោះដោយសារជម្លោះប្រដាប់អាវុធនេះ។

ចំណែកថវិកាប្រហែល ១០ម៉ឺនដុល្លារផ្សេងទៀតដែលរដ្ឋាភិបាលចិនប្រកាសផ្តល់ឲ្យហ្វីលីពីននៅថ្ងៃផ្តល់អាវុធនោះនឹងត្រូវឧបត្ថម្ភគាំទ្រដល់ក្រុមគ្រួសារកងទ័ពហ្វីលីពីនដែលបានពលីក្នុងប្រតិបត្តិការកម្ចាត់ភេរវជនបណ្តាក្រុមដែស្ហផងដែរ៕