ជាតិ
លោក ប៉ែន បូណា៖ កម្ពុជានៅខ្វះធនធានពូកែផ្នែកសារព័ត៌មាន ទោះបីមានអ្នកសារព័ត៌មានច្រើនក្តី លោក ប៉ែន បូណា ប្រធានក្លិបអ្នកកាសែតកម្ពុជា( រូបពីហ្វេសប៊ុកក្លិបអ្នកកាសែតកម្ពុជា)
× ប្រធានក្លិបអ្នកកាសែតកម្ពុជា ទទួលស្គាល់ថា ធនធានមនុស្សពូកែៗ និងមានទេពកោសល្យផ្នែកសារព័ត៌មាននៅកម្ពុជា នៅខ្វះខាត។ សម្រាប់លោក ប៉ែន បូណា អ្នកសារព័ត៌មាន ដែលមានទេពកោសល្យ គឺត្រូវចេះសរសេរអត្ថបទខ្លីខ្លឹម ទាក់ទាញ រហ័ស និងប្រមូលព័ត៌មានគ្រប់ជ្រុងជ្រោយ។
ប្រធានក្លិបអ្នកសារព័ត៌មានកម្ពុជា លោក ប៉ែន បូណា លើកឡើងថា បច្ចប្បន្ននេះនៅកម្ពុជាខ្វះខាតធនធានមនុស្សពូកែ និងមានទេពកោសល្យក្នុងវិស័យសារព័ត៌មាន ទោះបីជាមានអ្នកសារព័ត៌មាន មានច្រើនហើយក្ដី។ នៅក្នុងពិធីបិទវគ្គបណ្តុះបណ្តាលជំនាញសរសេរព័ត៌មាន កាលពីថ្ងៃទី ២៩ ខែមិថុនា លោក ប៉ែន បូណា បន្ថែមថា អ្នកសារព័ត៌មានដែលល្អ មិនត្រឹមតែសរសេរល្អទេ តែជាអ្នកមានគំនិតសរសេររឿង ហើយមើលឃើញអ្វីដែលប្លែក និងថ្មី សម្រាប់អ្នកអាន។ ប្រធានក្លិបអ្នកសារព័ត៌មានកម្ពុជារូបនេះ បញ្ជាក់ដូច្នេះថា៖ «ក្នុងវិស័យសារព័ត៌មានខ្វះខាតច្រើនគឺ ជំនាញវិជ្ជាជីវៈ ទោះបីអ្នកខ្លះ ធ្វើជាអ្នកសារព័ត៌មានអស់ជាច្រើនឆ្នាំហើយក្ដី ប៉ុន្តែមិនសូវមានគំនិតច្នៃប្រឌិតដើម្បីអភិវឌ្ឍខ្លួននោះទេ»។
លោក បូណា មើលឃើញពីចំណុចអវិជ្ជមាននៃអ្នកសារព័ត៌មានមួយចំនួនទៀតដែរ ដោយលោកកត់សម្គាល់ថា អ្នកកាសែត នៅខ្វះភាពអត់ធ្មត់ និងរួញរាបាក់ទឹកចិត្តក្នុងការងារជាអ្នកសារព័ត៌មាន ព្រមទាំងខ្វះការតាំងចិត្ត។ លោក បរិយាយបែបនេះថា៖«ការតាំងចិត្តមានសារៈសំខាន់ណាស់។ បើមិនមានការតាំងចិត្ត មិនអាចធ្វើជាអ្នកសារព័ត៌មានបានឡើយ ហើយក៏មិនអាចអភិវឌ្ឍខ្លួនឲ្យមានភាពរីកចម្រើនបាននោះទេ»។
ជាមួយគ្នានេះ នៅក្នុងពិធីខាងលើ ដែលធ្វើនៅសណ្ឋាគារសាន់វ៉េ រាជធានីភ្នំពេញ អនុរដ្ឋលេខាធិការក្រសួងព័ត៌មាន លោក អ៊ុក គឹមសេង ក៏បានផ្តល់យោបល់ដល់អ្នកសារព័ត៌មាន ដើម្បីក្លាយជាអ្នកសារព័ត៌មានឆ្នើម។ លោកថា អ្នកកាសែត ត្រូវតែរៀនសូត្រគ្រប់ពេលវេលា និងមានវិន័យសម្រាប់ខ្លួនឯង។ លោកថា បើធ្វើជាអ្នកសារព័ត៌មាន ត្រូវអានសៀវភៅឲ្យបានច្រើន និងគិតឲ្យបានគ្រប់ជ្រុងជ្រោយ ដើម្បីសរសេរអត្ថបទល្អ៕
Tag:
ប៉ែន បូណា
ក្លិបអ្នកកាសែត
© រក្សាសិទ្ធិដោយ thmeythmey.com