កីឡាអន្តរជាតិ
អន្តរជាតិ
Bournemouth ទិញ Ake ពី Chelsea ក្នុងតម្លៃកំណត់ត្រា ២៦លានដុល្លារ
× Bournemouth បានចុះហត្ថលេខានាំយកខ្សែការ Nathan Ake ពី Chelsea ជាផ្លូវការក្នុងតម្លៃជាកំណត់ត្រាក្លិប ២០លានផោន ប្រមាណ ២៦លានដុល្លារអាមេរិក។ នេះបើតាមការប្រកាសរបស់ក្លិប AFC Bournemouth ។
ខ្សែការពារសញ្ជាតិហូឡង់ វ័យ២២ឆ្នាំនេះ គឺធ្លាប់ជាសមាជិករបស់ Bournemouth ដែរកាលពីរដូវកាលមុនក្នុងលក្ខខណ្ឌខ្ចីជើង និងស៊ុតបញ្ចូលទី៣គ្រាប់ ក្នុងការបង្ហាញខ្លួន១២ប្រកួត។
ក្រោយខ្ចីមួយឆ្នាំជាមួយនឹងការបង្ហាញខ្លួនយ៉ាងល្អនោះ អ្នកចាត់ការទូទៅ Bournemouth លោក Eddie Howe ក៏សម្រចទិញរូបគេក្នុងតម្លៃជាកំណត់ត្រាក្លិប និងបំបែកកំណត់ត្រាចាស់របស់ Jordon Ibe ដែលទិញពី Liverpool តម្លៃជាង១៩លានដុល្លារ កាលពីឆ្នាំ ២០១៦។
Ake បានចាកចេញពី Feyenoord មកក្រុមក្នុងក្របខណ្ឌ Premier League ជាមួយ Chelsea កាលពីឆ្នាំ២០១២ ពោលគឺត្រឹមអាយុ១៦ឆ្នាំប៉ុណ្ណោះ ជាមួយនឹងការបង្ហាញខ្លួនក្នុងទឹកដី Stamford Bridge ១៧ប្រកួត មុនពេល Watford ខ្ចីមួយរដូវកាល ឆ្នាំ ២០១៥-២០១៦។
«ខ្ញុំមានពេលវេលាដ៏អស្ចារ្យមួយកាលពីរដូវកាលមុនដូច្នេះខ្ញុំពិតជារីករាយណាស់ដែលបានវិលត្រលប់មកទីនេះវិញ។ អ្នកគាំទ្រទាំងអស់នៅមិនទាន់បានឃើញពីចំណុចល្អបំផុតរបស់ខ្ញុំនៅឡើយទេ»។ នេះជាការលើកឡើងរបស់ Ake។
Ake ជាកីឡាករទី៣ហើយដែលអ្នកចាត់ការទូទៅ Eddie Howe នាំចូលមកពង្រឹងក្រុមសម្រាប់រដូវកាលថ្មីខាងមុខ បន្ទាប់ពីទិញបានខ្សែប្រយុទ្ធអន្តរជាតិអង់គ្លេស Jermain Defoe ពី Sunderland កាលពីថ្ងៃព្រហស្បតិ៍ និង អ្នកចាំទី Asmir Begovic កាលពីខែឧសភាកន្លងទៅ ពីក្រុមតោខៀវ៕
Tag:
បាល់ទាត់
Nathan Ake
Bournemouth
© រក្សាសិទ្ធិដោយ thmeythmey.com