អន្តរជាតិ
កូរ៉េខាងជើងបាញ់សាកល្បងមីស៊ីលឆ្លងទ្វីបជាថ្មី ទំនងសាទរបុណ្យឯករាជ្យអាមេរិក
× កូរ៉េខាងជើងបាន«ប្រកាសថា ខ្លួនបានសម្រេចជោគជ័យក្នុងការបាញ់សាកល្បងមីស៊ីលបាលីស្ទិកឆ្លងទ្វីប នៅថ្ងៃអង្គារទី៤ ខែ កក្កដានេះចំថ្ងៃប្រជាជនអាមេរិករៀបចំបុណ្យឯករាជ្យលើកទី ២៤១ របស់ខ្លួនផង។ ប្រធានាធិបតីអាមេរិកចេញមុខថ្កោលទោសកូរ៉េខាងជើងភ្លាមៗដែរ ប៉ុន្តែចិនបានអំពាវនាវឲ្យភាគីអត់ធ្មត់តាមដែលអាចធ្វើបានដើម្បីបញ្ចៀសបញ្ហា។
ក្រុងព្យុងយ៉ាង ហាក់លែងញញើតទណ្ឌកម្មនិងសម្ពាធសហគមន៍អន្តរជាតិ ដោយបន្តបាញ់សាកល្បងមីស៊ីលជាថ្មីទៀតចូលក្នុងដែនសមុទ្រជប៉ុនថ្ងៃ ៤ កក្កដានេះ។ ក្រោយបាញ់សាកល្បងអាវុធហើយ របបដឹកនាំនេះបានអួតអាងឥតលាក់លៀមប្រាប់គេឯងថា ខ្លួនសម្រេចជោគជ័យក្នុងការបាញ់មីស៊ីលបាលីស្ទិកអន្តរទ្វីប។ ការបាញ់មីស៊ីលនេះក៏កើតឡើងស្របពេលដែលសហរដ្ឋអាមេរិកកំពុងរៀបចំសាទរបុណ្យឯករាជ្យរបស់ខ្លួនផងដែរ។
តាំងពីយូរយារណាស់មកហើយ កូរ៉េខាងជើងបានចំណាយពេលនិងធនធានច្រើនដើម្បីបង្កើនសមត្ថភាពក្នុងការផលិតគ្រាប់រ៉ុក្កែតដែលអាចបាញ់ឆ្លងទ្វីបអាចពាំក្បាលគ្រាប់នុយក្លេអ៊ែរដល់សហរដ្ឋអាមេរិកផងដែរ។
លើកនេះ ក្រោយមានការប្រកាសពីភាពជោគជ័យនេះការសាកល្បងមីស៊ីលឆ្លងទ្វីប អ្នកជំនាញអាមេរិកមួយចំនួនបានវាយតម្លៃថា មីស៊ីលនេះអាចបាញ់ដល់ទឹកដីអាឡាស្ការឯណោះ។ ដូច្នេះហើយ វាចាំបាច់ត្រូវមានការវាយតម្លៃឡើងវិញចំពោះគ្រោះថ្នាក់ដែលអាមេរិកនិងពិភពលោកទាំងមូលត្រូវប្រឈមក្នុងពេលដែលកូរ៉េខាងជើងមានមីស៊ីលបាលីស្ទិកឆ្លងទ្វីបនេះ។
យោងតាមទីភ្នាក់ងារព័ត៌មាន AFP ដែលស្រង់សម្តីទូរទស្សន៍រដ្ឋកូរ៉េខាងជើង ការបាញ់សាកល្បងមីស៊ីលព្រឹកថ្ងៃអង្គារនេះ មានវត្តមានមេដឹកនាំកំពូលកូរ៉េខាងជើង គីម ជុងអ៊ុនចូលរួមដែរ។ មីស៊ីលនោះមានឈ្មោះ ថាHwasong-14 ហើយវាមានលទ្ធភាពហោះហើរក្នុងកម្ពស់ ២៨០២ គីឡូម៉ែត្រនិងបានចម្ងាយ៩៣៣ គីឡូម៉ែត្រឯណោះ។
កូរ៉េខាងជើងក៏ប្រកាសផងដែរថា ខ្លួនជារដ្ឋជាមហាអំណាចនុយក្លេអ៊ែរដ៏ខ្លាំងក្លាមួយ ហើយមានអាវុធបាលីស្ទិលមីសីលដែលមានអនុភាពខ្ពស់អាចបាញ់កម្ទេចរាល់គោលដៅនានាគ្រប់ទីកន្លែងលើពិភពលោកថែមទៀតផង។ ប៉ុន្តែគេនៅមានមន្ទិលសង្ស័យចំពោះសមត្ថភាពរបស់កូរ៉េខាងជើងក្នុងការផលិតកអាវុធនុយក្លេអ៊ែរដែលដាក់បញ្ចូលក្នុងក្បាលគ្រាប់មីស៊ីលបានឬអត់នោះ។
ភ្លាមៗក្រោយមានការបាញ់សាកល្បងមីស៊ីលនេះ ប្រធានាធិបតីដូណាល់ ត្រាំ បានទិតៀនក្រុងព្យុយ៉ាងតាមគណនី Twitter ផ្លូវការរបស់ខ្លួនភ្លាមៗដែរ។ លោកបានសរសេរដូច្នេះថា៖« កូរ៉េខាងជើងទើបតែបាញ់សាកល្បងមីស៊ីលម្តងទៀត។ តើគីម ជុងអ៊ុន គ្មានធ្វើប្រសើរជាងនេះទេឬ? វាជារឿងពិបាកជឿដែលកូរ៉េខាងត្បូងនិងជប៉ុននៅត្រូវបន្តអត់ធ្មត់ជាមួយបញ្ហានេះយូរជាងនេះទៀតនោះ។ចិនប្រហែលជាត្រូវដាក់ចំណាត់ការធ្ងន់ធ្ងរមួយហើយដើម្បីបញ្ចប់បញ្ហានេះម្តងនិងដើម្បីទាំងអស់គ្នា»។
ការបាញ់សាកល្បងមីស៊ីលបាញ់ឆ្លងទ្វីបនេះកើតឡើងរយៈពេលប៉ុន្មានថ្ងៃប៉ុណ្ណោះក្រោយពេលដែលលោក ដូណាល់ ត្រាំ ជួបពិភាក្សាជាមួយប្រធានាធិបតីកូរ៉េខាងត្បូងថ្មីលោក មូន ចេអ៊ីន។ ពេលនោះ លោកក៏បានប្រកាសថាលោកលែងអត់ធ្មត់ចំពោះកូរ៉េខាងជើងទៀតដែរ។
ចំណែកចិនឯណោះវិញបានចេញមុខអំពាវនាវឲ្យបណ្តាភាគីពាក់ព័ន្ធជាពិសេសហរដ្ឋអាមេរិកព្យាយាមអត់ធ្មត់តាមដែលអាចធ្វើបានដើម្បីការពារការប្រឈមមុខដាក់គ្នា និងមានជម្លោះផង។ ចិនកន្លងមករងសម្ពាធខ្លាំងពីសំណាក់ក្រុងវ៉ាស៊ីនតោនក្នុងចូលរួមដោះស្រាយបញ្ហានុយក្លេអ៊ែរកូរ៉េខាងជើងផង។ អ្វីដែលគួរឲ្យកត់សម្គាល់ធនាគារចិនមួយទើបតែរងទណ្ឌកម្មរបស់អាមេរិកព្រោះមានពាក់ព័ន្ធការជួយលាងលុយកង្វក់របស់កូរ៉េខាងជើង៕
Tag:
កូរ៉េខាងជើង
បាលីស្ទីកមីស៊ីល
ដូណាល់ ត្រាំ
អាមេរិក
© រក្សាសិទ្ធិដោយ thmeythmey.com