អន្តរជាតិ
Trystan ស្រីដែលកែភេទទៅជាប្រុស ទើបបង្កើតបានកូនម្នាក់ជាមួយដៃគូ Gay
× Trystan Reese ជនជាតិអាមេរិកអាយុ៣៤ឆ្នាំ មានកំណើតជាស្ត្រី ហើយកែភេទរបស់ខ្លួនទៅជាប្រុស ដោយរស់នៅជាមួយដៃគូប្រុស Gay ម្នាក់ឈ្មោះ Biff Chaplow។ កាលពីថ្ងៃទី១៥ ខែកក្កដា កន្លងមក Trystan ទើបប្រសូតបានកូនប្រុសម្នាក់ ដោយគូស្នេហ៍ទាំងពីរបានបង្ហោះពីសកម្មភាពនានាតាមរយៈហ្វេសប៊ុកអស់រយៈពេលជាច្រើនខែ។
កើតមកជាមនុសស្រី ប៉ុន្តែ Trystan Reese បានសម្រេចប្តូរភេទទៅជាប្រុស ហើយរូបរាង និងសំឡេង ជាមនុស្សប្រុសពេញលក្ខណៈ។ ទោះបីជាយ៉ាងណាក៏ដោយ Trystan បានសម្រេចរក្សាស្បូនរបស់ខ្លួន ដែលជាហេតុធ្វើឲ្យគេអាចមានលទ្ធភាពបង្កើតកូន ក្រោយរស់នៅជាមួយដៃគូ Biff Chaplow ដែលជាមនុស្សប្រុសស្រឡាញ់ប្រុសដូចគ្នា (Gay)។
ទារក Leo បានចាប់កំណើតកាលពីចុងសប្តាហ៍កន្លងមក ដោយមានទម្ងន់៤.៣៥គីឡូក្រាម និងកម្ពស់ ៥៤.៦សង់ទីម៉ែត្រ បន្ទាប់ពីឆ្លងកាត់ដំណាក់កាលដ៏លំបាក និងវះកាត់អស់រយៈពេលប្រមាណជាង៣០ម៉ោង។ Trystan និង Biff បានចែករំលែកបទពិសោធន៍របស់ពួកគេនៅបណ្តាញសង្គមហ្វេសប៊ុក ពោលគឺចាប់តាំងពីដំណាក់កាលពរពោះមកម្ល៉េះ។
ទាំង Trystan និង ទាំង Biff សុទ្ធតែបានចាត់ទុកខ្លួនជាឪពុករបស់ Leo ទាំងពីរនាក់។ Trystan បាននិយាយថា ទោះបីជាខ្លួនបានប្តូរភេទក៏ដោយ ប៉ុន្តែមិនមែនមានន័យថា គេស្អប់រូបរាងពីកំណើតរបស់ខ្លួននោះឡើយ។
បន្ទាប់ពីស្នាក់នៅពេទ្យពីរបីថ្ងៃ គូស្នេហ៍ទាំងពីរបាននាំ Leo ទៅផ្ទះ ដែលនៅទីនោះ ពួកគេមានកូនចិញ្ចឹមពីរនាក់ គឺ Hailey និង Riley ដែលបានចិញ្ចឹមតាំងពីឆ្នាំ២០១១ មក៕
© រក្សាសិទ្ធិដោយ thmeythmey.com