លោក ឌូទើតេ ប្រកាសថា លោកមិនខ្ចីទៅជាន់ដីអាមេរិកឡើយ

អន្តរជាតិ

លោក ឌូទើតេ ប្រកាសថា លោកមិនខ្ចីទៅជាន់ដីអាមេរិកឡើយ

22, Jul 2017 , 7:57 pm

រូបភាព

ដោយ: សៅ ផលនិស្ស័យ (Sao Phal Niseiy)

ប្រធានាធិបតីហ្វីលីពីនបានអះអាងថា អាមេរិកជាប្រទេសដែលអាក្រក់គួរឲ្យខ្ពើម ហើយលោកប្រកាសថា លោកមិនទៅទស្សនកិច្ចអាមេរិកជាដាច់ខាតក្នុងអាណត្តិជាប្រធានាធិបតី។វាជាការឆ្លើយតបសមាជិកសភាអាមេរិកដែលព្រមានបាតុកម្មប្រឆាំងលោក បើសិនលោកអញ្ជើញទៅទស្សនកិច្ចនៅអាមេរិកតាមការអញ្ជើញរបស់លោក ដូណាល់ ត្រាំផង។

រ៉ូឌ្រីហ្គោ ឌូទើតេ (Rodrigo Duterte) បានឆ្លើយតបជាមួយអ្នកសារព័ត៌មាន ពេលដែលគេសាកសួរពាក់ព័ន្ធសមាជិកសភាអាមេរិកត្រៀមបាតុកម្ម ប្រឆាំងទស្សនកិច្ចលោកនៅសហរដ្ឋអាមេរិកថា លោកមិនខ្ចីយកជើងជាន់ដីអាមេរិកឡើយ។

ប្រធានាធិបតីលោក ដូណាល់ ត្រាំ បានអញ្ជើញប្រធានាធិបតី ឌូទើតេ ឲ្យទៅបំពេញទស្សនកិច្ចនៅអាមេរិកក្នុងពេលមេដឹកនាំទាំងពីរជជែកពិភាក្សាគ្នាតាមទូរសព្ទកាលពីខែមេសាកន្លងទៅ។ ប៉ុន្តែលោក ឌូទើតេ មិនបានឆ្លើយយល់ព្រម ឬបដិសេធលិខិតអញ្ជើញនេះទេ ប៉ុន្តែលោកមិនសូវចង់ទៅអាមេរិកឡើយតាមសម្តីរបស់លោកកន្លងមក។

ដោយសារការអញ្ជើញលោក ឌូទើតេ នេះហើយ បណ្តាក្រុមសិទ្ធិមនុស្សនិងសមាជិកសភាប្រតិកម្ម និងនាំគ្នាថ្កោលទោសបន្តបន្ទាប់។ ពួកគេស្នើឲ្យមេដឹកនាំអាមេរិកឈប់ស្វាគមន៍មេដឹកនាំដែលមានពាក់ព័ន្ធរឿងរំលោភសិទ្ធិមនុស្សធ្ងន់ធ្ងរទៀត។

ពាក់ព័ន្ធបញ្ហានេះ សមាជិកសភារដ្ឋ Massachusetts លោក Jim McGovern បានថ្លែងប្រាប់គណៈកម្មាធិការសិទ្ធិមនុស្សសភាអាមេរិកសប្តាហ៍នេះថា លោកនឹងដឹកនាំចលនាបាតុកម្មប្រឆាំងវត្តមានលោក ឌូទើតេ ក្នុងករណីដែលលោក ឌូទើតេ មកបំពេញទស្សនកិច្ចនៅអាមេរិកមែននោះ។

ទីភ្នាកងារព័ត៌មាន Reuters បានស្រង់សម្តីលោក ឌូទើតេ ដែលចោទសួរសមាជិកសភាអាមេរិកវិញថា៖« តើរឿងអ្វីដែលធ្វើឲ្យអ្នកគិតថា ខ្ញុំនឹងទៅអាមេរិកនោះ? វាជាមិនមានអាចទៅរួចទេ ក្នុងអាណត្តិរបស់ខ្ញុំជាប្រធានាធិបតីដែលត្រូវទៅទស្សនកិច្ចនៅអាមេរិក ឬផុតអាណត្តិនេះក៏មិនអាចដែរ»។

លោក ឌូទើតេ បន្ថែមថា អាមេរិកនិយាយធ្វើដូចខ្លួនឯងល្អណាស់ តែតាមពិតខ្លួនឯងស្មោគគ្រោករំលោភសិទ្ធិមនុស្សខ្លាំងណាស់កន្លងមក។ លោកបញ្ជាក់ដូច្នេះថា ៖« ខ្ញុំបានឃើញហើយអាមេរិកនោះ។ ប្រទេសនេះអាក្រក់គួរឲ្យខ្ពើមតែម្តង។ វាជារឿងល្អបើសិន សមាជិកសភាអាមេរិកនាំគ្នាចាប់ផ្តើមស៊ើបអង្កេតរឿងរំលោភបំពានសិទ្ធិមនុស្សក្នុងស្រុកខ្លួនឯងព្រោះមានមនុស្សច្រើននាក់ណាស់ដែលត្រូវបានសម្លាប់ដោយសារសង្គ្រាមនៅមជ្ឈិមបូព៌ា។ បើមិនដូច្នោះទេ ខ្ញុំត្រូវបង្ខំចិត្តបើកការស៊ើបអង្កេតខ្លួនឯង ពាក់ព័ន្ធបទឧក្រិដ្ឋដែលអ្នកប្រព្រឹត្តពីអតីតកាល»។

តាំងពីឡើងកាន់តំណែងឆ្នាំ ២០១៦ លោក ឌូទើតេ បានទិតៀនសហរដ្ឋអាមេរិកដែលជាសម្ព័ន្ធមិត្តប្រពៃណីរបស់ខ្លួននោះឥតមានឈប់ឈរ ប៉ុន្តែលោក ត្រាំ មានជំហរប្រែប្រួលច្រើនរឿងសិទ្ធិមនុស្ស ហើយលោកថែមទាំងធ្លាប់សរសើរលោក ឌូទើតេរឿងប្រឆាំងគ្រឿងញៀនទៀត។

កាលពីខែមេសានោះដែរ លោក ត្រាំ បានកោតសរសើរលោក ឌូទើតេ ថាជាមេដឹកនាំដែលមានសមត្ថភាពអាចបំពេញការងារបានយ៉ាងអស្ចារ្យដើម្បីប្រឆាំងគ្រឿងញៀន។ សម្តីរបស់លោក ត្រាំ ក៏ទាក់ទាញការរិះគន់ខ្លាំងពីសហគមន៍សិទ្ធិមនុស្សផងដែរ៕