អ្នកនាំពាក្យសេតវិមានសុខចិត្តលាលែង ព្រោះមិនឯកភាពជាមួយប្រធានាធិបតី ត្រាំ រឿងតែងតាំងមន្ត្រី

អន្តរជាតិ

អ្នកនាំពាក្យសេតវិមានសុខចិត្តលាលែង ព្រោះមិនឯកភាពជាមួយប្រធានាធិបតី ត្រាំ រឿងតែងតាំងមន្ត្រី

22, Jul 2017 , 11:59 pm

រូបភាព

ដោយ: ថ្មីៗ

អ្នកនាំពាក្យសេតវិមានលោក Sean Spicer ប្រកាសចុះចេញពីតំណែងនៅថ្ងៃសុក្រ ក្រោយទាស់ទែងខ្វែងគំនិតជាមួយប្រធានាធិបតី ដូណាល់ ត្រាំ ពាក់ព័ន្ធការតែងតាំងជំនួយការផ្ទាល់ទទួលបន្ទុកកិច្ចការទំនាក់ទំនង។ លោកស្រី Sarah Sanders អ្នកនាំពាក្យរងត្រូវតែងតាំងឲ្យជំនួសតំណែងលោក Spicer។

ក្រោយមានបញ្ហាចម្រូងចម្រាសមួយរយៈ អ្នកនាំពាក្យសេតវិមានលោក Sean Spicer បានប្រកាសលាលែងពីតំណែងជាផ្លូវការនៅថ្ងៃសុក្រទី ២១ កក្កដា។ ការប្រកាសលាលែងពីតំណែងនេះកើតឡើងប៉ុន្មានម៉ោងប៉ុណ្ណោះក្រោយប្រធានាធិបតី ដូណាល់ ត្រាំ តែងតាំងអ្នកគាំទ្រខ្លួនលោក Scaramucci ឲ្យធ្វើជានាយកទទួលបន្ទុកផ្នែកទំនាក់ទំនងប្រចាំសេតវិមាន(White House Communication Director) នោះ។

ការប្រកាសលាលែងពីតំណែងរបស់លោក Sean Spicer នេះដែរក៏មិនមានអ្វីគួរឲ្យភ្ងាក់ផ្អើលដែរព្រោះវាឆ្លុះបញ្ចាំងពីបញ្ហាស្មុគស្មាញដែលកំពុងកើតឡើងក្នុងរដ្ឋបាលលោក ដូណាល់ ត្រាំជាពិសេសក្រុមការងារទទួលបន្ទុកកិច្ចការផ្សព្វផ្សាយតែម្តង។ បញ្ហាកើតឡើងក៏ដោយសារការបង្កើនការស៊ើបអង្កេតពាក់ព័ន្ធទំនាក់ទំនងរវាងក្រុមឃោសនារបស់លោក ត្រាំ ជាមួយរុស្ស៊ីក្នុងការបោះឆ្នោតប្រធានាធិបតីចុងឆ្នាំមុន។

ក្រោយលោក Spicer ប្រកាសចាកចេញពីតំណែងជាអ្នកនាំពាក្យសេតវិមាន លោកស្រី Sarah Sanders ត្រូវគេតែងតាំងឲ្យកាន់តំណែងនេះជំនួសលោកផងដែរភ្លាមៗនោះ។ លោក Spicer នឹងបន្តតំណែងនេះសិនរហូតដល់ខែសីហាខាងមុខ។

ពាក់ព័ន្ធការប្រកាសលាលែងពីតំណែងនេះ សមាជិកសភាបក្សសាធារណរដ្ឋដែលមានទំនាក់ទំនងស្និទ្ធជាមួយសេតវិមានបានបង្ហើបប្រាប់ទីភ្នាក់ងារព័ត៌មាន Reuters ថា មុនមានការប្រកាសលាលែងពីតំណែង លោក Sean Spicer បានជួបជាមួយប្រធានាធិបតី ដូណាល់ ត្រាំ នៅការិយាល័យប្រធានាធិបតី ហើយវាក៏មានការទាស់ទែងខ្វែងគំនិតគ្នារវាងអ្នកទាំងពីរផងដែរ។

លោក Spicer បានពិភាក្សាជាមួយប្រធានាធិបតីរឿងតែងតាំងនាយកផ្នែកទំនាក់ទំនងប្រចាំសេតវិមាន ព្រោះលោកមិនពេញចិត្តបំណងលោកត្រាំដែលចង់តែងតាំងលោក Anthony Scaramucci ដែលជាអ្នកគាំទ្រខ្លួន និងជាអ្នកផ្គត់ផ្គង់ហិរញ្ញវត្ថុសម្រាប់ឃោសនាបោះឆ្នោតកន្លងមកឡើយ។

លោក Sean Spicer ចង់បញ្ជាក់លោក ត្រាំ ថារវាង«លោក Scaramucci ឬខ្លួនលោកផ្ទាល់តើលោកជ្រើសរើសយកមួយណា?»។ ចុងក្រោយលោកក៏ត្រូវសម្រេចចិត្តប្រកាសលាលែងពីតំណែងព្រោះលោក ត្រាំ ជ្រើសរើសលោក Scaramucci ឲ្យធ្វើជានាយកទទួលបន្ទុកផ្នែកទំនាក់ទំនងប្រចាំសេតវិមាននោះ។

ដោយឡែក លោក Spicer បានសរសេរបង្ហោះតាមគណនី Twitter ផ្លូវការរបស់ខ្លួនផងដែរពាក់ព័ន្ធការដកខ្លួនឈប់បម្រើការងារជាមន្ត្រីព័ត៌មានរបស់លោក ត្រាំនេះ។ លោកមិនបានបញ្ជាក់ពីហេតុផលនៅពីក្រោយការលាលែងពីតំណែងឡើយ ដោយលោកគ្រាន់តែអះអាងថាលោកមានមោទនភាពដែលបានបម្រើការងារក្រុមរដ្ឋបាលលោក ត្រាំ កន្លងមក។

«វាជាកិត្តិយស និងបុព្វសិទ្ធិមួយដែលមានឱកាសបម្រើប្រធានាធិបតី និងប្រទេសដ៏អស្ចារ្យនេះ។ ខ្ញុំនឹងបន្តការងាររបស់ខ្លួនរហូតដល់ខែសីហា»។ លោក Spicer បញ្ជាក់បែបនេះក្នុងគណនី Twitter របស់ខ្លួន៕