អន្តរជាតិ
អាមេរិក៖ បុរសម្នាក់ជាប់គុក១៦ឆ្នាំពីបទសម្លាប់ឆ្មា២១ក្បាល
× Robert Farmer អាយុ២៦ឆ្នាំ ដែលរស់នៅរដ្ឋកាលីហ្វនីញ៉ា សហរដ្ឋអាមេរិក កាលពីពេលថ្មីៗកន្លងមកនេះ ត្រូវបានតុលាការ សម្រេចផ្តន្ទាទោសដាក់ពន្ធនាគារ១៦ឆ្នាំ ពីបទសម្លាប់ និងវាយធ្វើបាបឆ្មាចំនួន២១ក្បាល នៅក្នុងឆ្នាំ២០១៥ ។ នេះបើតាមការផ្សាយរបស់ទូរទស្សន៍ CBS San Francisco។
សកម្មជនការពារសត្វនៅលើពិភពលោក ច្បាស់ជារីករាយនឹងដំណឹងនៃការដាក់ទោសយ៉ាងធ្ងន់ធ្ងរលើអ្នកប្រព្រឹត្តអំពើបាបលើសត្វ។ កាលពីថ្ងៃទី១៤ ខែកក្កដា កន្លងមក បុរសឈ្មោះ Robert Farmer សារភាពនៅតុលាការ Santa Clara Superior Court ថា រូបគេពិតជាបានសម្លាប់ និងធ្វើបាបឆ្មា២១ក្បាលមែន កាលពីអំឡុងឆ្នាំ២០១៥ ។
កាលពីខែកញ្ញាឆ្នាំ២០១៥ ពលរដ្ឋដែលរស់នៅសង្កាត់ Cambridan Park ក្រុង San Jose មានការងឿងឆ្ងល់យ៉ាងខ្លាំងដោយពួកគាត់បានបាត់ឆ្មាជាច្រើនដំណាលគ្នា។ តាមរយៈឆ្មាមួយក្បាលដែលរត់រួច ពេទ្យសត្វនៅក្នុងតំបន់ បានពិនិត្យឃើញថា ឆ្មានោះរងរបួសដែលបង្កឡើងដោយមនុស្ស។
ពីបីសប្តាហ៍ក្រោយមក គេបានរកឃើញឆ្អឹង និងសាកសពឆ្មាដែលបានបាត់។ ប៉ូលិសបានដាក់លួចបង្កប់កាមេរ៉ា មុននឹងឈានទៅដល់ការចាប់ខ្លួន Robert ខណៈគេកំពុងដេកក្នុងរថយន្ត ដែលមានសាកសពឆ្មាមួយក្បាលនៅក្បែរខ្លួន។ តាមការវិភាគ DNA យុវជនវ័យ២៦ឆ្នាំរូបនោះ ពិតជាបានសម្លាប់ឆ្មាទាំង២១ក្បាលមែន។
បើតាមអាជ្ញាធរប៉ូលិស Robert គឺជាមនុស្សរោគចិត្តម្នាក់ដែលចូលចិត្តសម្លាប់សត្វ។ បន្ថែមពីលើនេះ គេក៏ត្រូវបានរកឃើញថា បានបៀតបៀនផ្លូវភេទឆ្មាមួយក្បាលដែលខ្លួនបានសម្លាប់។ យុវជនរូបនេះ ក៏មិនបានប្រកែកនោះដែរ នាអំឡុងសវនាការ។
ចំពោះករណីសម្លាប់ឆ្មាដ៏ឃោឃៅនេះ Robert ត្រូវបានកាត់ទោសឲ្យជាប់ពន្ធនាគារ១៦ឆ្នាំ ដោយគ្មានការតវ៉ា។ បន្ទាប់ពីការអនុវត្តន៍ទោសរួច បុរសរូបនេះ ក៏ត្រូវបានហាមឃាត់មិនឲ្យទៅជិតរយៈពេល១០ឆ្នាំបន្ថែមទៀតផងដែរ៕
© រក្សាសិទ្ធិដោយ thmeythmey.com