កូរ៉េខាងជើងប្រឈមគ្រោះរាំងស្ងួតធ្ងន់ធ្ងរ ហើយការផ្គត់ផ្គង់ស្បៀងអាហាររងគ្រោះថ្នាក់ខ្លាំង

អន្តរជាតិ

កូរ៉េខាងជើងប្រឈមគ្រោះរាំងស្ងួតធ្ងន់ធ្ងរ ហើយការផ្គត់ផ្គង់ស្បៀងអាហាររងគ្រោះថ្នាក់ខ្លាំង

23, Jul 2017 , 4:59 pm

រូបភាព

ដោយ:

កូរ៉េខាងជើងកំពុងជួបប្រទះគ្រោះរាំងស្ងួតធ្ងន់ធ្ងរបំផុតមិនធ្លាប់មានក្នុងរយៈជាងមួយទសវត្សរ៍កន្លមកនេះ។ គ្រោះរាំងស្ងួតនេះ ធ្វើឲ្យខូចខាតដល់ដំណាំសំខាន់ៗ រួមទាំងបង្កឲ្យការផ្គត់ផ្គង់អាហារដល់ប្រជាជនធ្លាក់ចុះផង ហើយកុមារនិងមនុស្សចាស់ក្លាយជារងគ្រោះខ្លាំងជាងគេដោយសារការកង្វះអាហារនេះ។

ក្នុងអំឡុងខែមេសានិងមិថុនា ចំនួនទឹកភ្លៀងក្នុងតំបន់ផលិតស្បៀងសំខាន់ៗរបស់កូរ៉េខាងជើងធ្លាក់ចុះជាងចំនួនទឹកភ្លៀងជាមធ្យមដែលវាបានធ្វើឲ្យប៉ះពាល់ខ្លាំងដល់ដំណាំសំខាន់ៗដូចជាស្រូវ ដំឡូង ពោតនិងសណ្ដែកជាដើម។ ការបង្កបង្កើនផលកសិកម្មមិនបានសមប្រកបតាមការគម្រោងនេះធ្វើឲ្យរដ្ឋឯកោនេះរងគ្រោះកាន់តែខ្លាំង។

យោងតាមសេចក្ដីរាយកាណ៍ពីអង្គការកសិកម្មនិងម្ហូបអាហារ (FAO) រួមជាមួយមជ្ឈមណ្ឌលសហការស្រាវជ្រាវគណៈកម្មការអឺរ៉ុប គ្រោះរាំងស្ងួតនៅកូរ៉េខាងជើងបានធ្វើឲ្យខូចខាត និង បណ្តាឲ្យអាក់ខានដល់សកម្មភាពប្រមូលផលដំណាំឆ្នាំ២០១៧។ ក្នុងរយៈពេលបីខែខាងមុខ វាតម្រូវឲ្យមានការធានានូវសន្តិសុខស្បៀងជាម្ហូបអាហារសម្រាប់ផ្គត់ផ្គង់ប្រជាជនងាយរងគ្រោះដូចជាកុមារនិងមនុស្សចាស់ជរាជាដើម។

អង្គការកសិកម្មនិងម្ហូបអាហារក៏បានព្យាករផងដែរថា ទិន្នផលមុនរដូវកាលនោះបានធ្លាក់ចុះអស់៣០ភាគរយបើប្រៀបនឹងទិន្នផលដែលប្រមូលបានឆ្នាំមុន។ កត្តានេះធ្វើឲ្យការនាំចូលគ្រាប់ធញ្ញជាតិ និងម្ហូបអាហារកើនឡើងដោយសារស្ថានភាពទីផ្សារឆ្នាំ២០១៧និង២០១៨កាន់តែដុនដាប។

អង្គការដដែលខាងលើក៏បានផ្ដល់យោបល់ដល់កសិករ និងប្រជាពលរដ្ឋកូរ៉េខាងជើងឲ្យប្តូរមកដាំដំណាំនានាដែលមិនសូវត្រូវការទឹក ឬប្រភេទដំណាំផ្សេងៗទៀតដែលធន់នឹងស្ថានភាពរាំងស្ងួតវិញដើម្បីសម្របជីវភាពរស់នៅ។

អ្នកតំណាងអង្គការកសិកម្ម និងម្ហូបអាហារនៅចិន និងកូរ៉េខាងជើងលោក Vincent Martin បានពោលដូច្នេះថា៖«ក្រុងNampoព្រមទាំងខេត្តមួយចំនួននៅខាងជើង និងខាងត្បូងខេត្ត Pyongan រួមទាំងខេត្ត Hwanghae នឹងរងការខូចខាតខ្លាំងជាងគេ បើគិតទៅ គឺពីរភាគបីនៃផលដំណាំក្នុងរដូវកាលប្រមូលផល។

លោកMartin បានបន្ថែមទៀតថា៖«ការបញ្ជូនជំនួយជាបន្ទាន់វាពិតជាចាំបាច់ណាស់សម្រាប់កសិករដែលកំពុងរងការខូតខាតជាទម្ងន់។ ហើយវាក៏ទប់ស្កាត់ការអនុវត្តយុទ្ធសាស្ដ្រដោះស្រាយដែលមិនត្រឹមត្រូវដូចជា ការកាត់បន្ថយរបបអាហារប្រចាំថ្ងៃរបស់កុមារ និងមនុស្សចាស់ជរា។ វាសំខាន់ណាស់ដែលកសិករទទួលបានជំនួយកសិកម្មសមរម្យ និងទាន់ពេលរួមមាន ឧបករណ៍ជំនួយធារាសាស្ដ្រនិងម៉ាស៊ីនបូមទឹក។

កូរ៉េខាងជើងជួបប្រទះគ្រោះរាំងស្ងួតចាប់ពីទសវត្សរ៍ឆ្នាំ ១៩៩០ ហើយពឹងផ្អែកលើជំនួយម្ហូបអាហារពីសហគមន៍អន្តរជាតិដើម្បីទ្រទ្រង់ជីវិតប្រជាជនរបស់ខ្លួនជាង២៥លាននាក់។ ប៉ុន្តែពីរ ឬបីឆ្នាំចុងក្រោយនេះ ជំនួយត្រូវបានកាត់បន្ថយព្រោះក្រុងព្យុងយ៉ាងស្ទាក់ស្ទើក្នុងការអនុញ្ញាតិឲ្យមានការត្រួតពិនិត្យការចែកចាយម្ហូបអាហារ និងបណ្តាលមកពីការដាក់ទណ្ឌកម្មរបស់សហគមន៍អន្តរជាតិប្រឆាំងនឹងការបន្តបាញ់សាកល្បងមីស៊ីលនិងនុយក្លេអ៊ែរ។

បើតាមកម្មវិធីស្បៀងពិភពលោកអង្គការសហប្រជាជាតិ (WFP) ការចែកចាយម្ហូបអាហាររបស់រដ្ឋាភិបាលកូរ៉េខាងជើងទៅឲ្យប្រជាជនពិតជាធ្លាក់ចុះមែន ព្រោះប្រជាជនពីរនាក់ក្នុងចំណោមប្រាំនាក់មិនបានទទួលរបបអាហារគ្រប់គ្រាន់ឡើយ៕