អន្តរជាតិ
សេដ្ឋកិច្ចតំបន់អាស៊ីមានកំណើនល្អដោយសារការនាំចេញកើនឡើង រូបភាព៖ Reuters
× ធនាគារអភិវឌ្ឍន៍អាស៊ីបានព្យាករថា ប្រទេសតំបន់អាស៊ីនឹងមានកំណើនសេដ្ឋកិច្ចខ្ពស់លើសពីការរំពឹងទុកសម្រាប់ឆ្នាំ២០១៧ និង ២០១៨។ ការរីកចម្រើនសេដ្ឋកិច្ចតំបន់យ៉ាងរហ័សនេះ ក៏ដោយសារអាស៊ីមានសក្ដានុពលក្នុងការនាំចេញផលិតផលជាច្រើនតាំងពីទូរស័ព្ទ រថយន្ត និងរបស់ប្រើប្រាស់ផ្សេងៗទៀត ហើយវាក៏បង្ហាញឲ្យឃើញពីការកើនឡើងនៃតម្រូវការពិភពលោកដែរ។
សប្តាហ៍នេះ ធនាគារអភិវឌ្ឍន៍តំបន់អាស៊ីចេញរបាយការណ៍ព្យាករណ៍មួយស្តីពីការរីកចម្រើននៃសេដ្ឋកិច្ចប្រទេសក្នុងតំបន់អាស៊ីប៉ាស៊ីហ្វិកទាំងអស់៤៥ប្រទេស។ កំណើនសេដ្ឋកិច្ចតំបន់អាស៊ីកើនដល់៥,៨ឆ្នាំ២០១៧ និង ៥,៩ នៅឆ្នាំ២០១៨ ដែលវាកើនឡើងពីកម្រិត៥,៧ ភាគរយដែលជាភាគរយដែលគេព្យាករកាលពីខែមេសា។
ការរីកចម្រើននៃតំបន់អាស៊ី ឆ្លុះបញ្ចាំងពីសក្ដានុពលនាំចេញផលិតផលតំបន់ដែលផលិតក្នុងតំបន់មានតាំងពីទូរស័ព្ទចល័ត រថយន្ត និងរបស់របរប្រើប្រាស់ផ្សេងៗទៀតជាច្រើន។ មិនត្រឹមតែប៉ុណ្ណោះទេកំណើនតម្រូវការផលិតផលទូទាំងពិភពលោកចាប់តាំងពីចុងឆ្នាំ ២០១៦ ក៏រួមចំណែកធ្វើមានការពឹងផ្អែកខ្លាំងលើការនាំចូលផលិតផលពីតំបន់អាស៊ីដែរ។
ពាក់ព័ន្ធកំណើនសេដ្ឋកិច្ចអាស៊ីនេះ ប្រធានសេដ្ឋវិទូនៃធនាគារអភិវឌ្ឍន៍អាស៊ីលោកYasuyuki Sawada បាននិយាយក្នុងរបាយការណ៍ដូច្នេះថា៖«ទោះជាការងើបឡើងវិញនៃសេដ្ឋកិច្ចពិភពលោកនៅមានភាពស្រពិចស្រពិល ប៉ុន្តែយើងជឿជាក់ថាតំបន់សេដ្ឋកិច្ចអាស៊ីនឹងអាចឆ្លើយតបនឹងវិបត្តិសេដ្ឋកិច្ចនាពេលខាងមុខបាន»។
ដោយឡែកក្នុងរបាយការណ៍ដដែល ធនាគារអភិវឌ្ឍន៍អាស៊ីក៏បានព្យាករពីអត្រាកំណើនសេដ្ឋកិច្ចរបស់ចិនដែរ។ សេដ្ឋកិច្ចចិននឹងកើនឡើងចន្លោះពី៦,៥ភាគរយទៅ៦,៧ក្នុងឆ្នាំ២០១៧ និងពី ៦,២ទៅ ៦,៤ភាគរយក្នុងឆ្នាំ២០១៨។
សេដ្ឋកិច្ចចិនកើនលើសពីការរំពឹងទុកជាមួយនឹងអត្រាកំណើន ៦,៩ភាគរយក្នុងអំឡុងត្រីមាសទីបី។ផលិតកម្ម និងការនាំចេញទ្រង់ទ្រាយធំរបស់ក្រុមហ៊ុនចិន។ វាក៏ជាមូលហេតុធ្វើឲ្យកិច្ចសន្ទនាពាក់ព័ន្ធបញ្ហាសេដ្ឋកិច្ចអាមេរិក-ចិនសប្តាហ៍នេះកាន់តែមានភាពតានតឹងដែរ ព្រោះអាមេរិកទាមទារឲ្យមានតុល្យភាពពាណិជ្ជកម្មជាមួយចិន។
ចំណែកអត្រាអតិផរណាត្រូវស្ថិតក្នុងការគ្រប់គ្រងដោយសារស្ថិរភាពនៃតម្លៃម្ហូបអាហារនិងប្រេងឥន្ធនៈ។ អត្រាអតិផរណាឆ្នាំ២០១៧នឹងត្រូវកាត់បន្ថយពី ៣ភាគរយនៅសល់ត្រឹម២,៨ភាគរយ និងឆ្នាំ២០១៨ វាធ្លាក់ពី៣,២ភាគរយមកត្រឹម៣ភាគរយ៕
Tag:
ធនាគារអភិវឌ្ឍន៍អាស៊ី
ចិន
អាស៊ី
សេដ្ឋកិច្ច
© រក្សាសិទ្ធិដោយ thmeythmey.com