អន្តរជាតិ
ពូទីន ថាមានគេអង្វរលោកឲ្យកែរដ្ឋធម្មនុញ្ញដើម្បីក្ដាប់អំណាចបានយូរ តែលោកមិនព្រម ប្រធានាធិបតីរុស្ស៊ី វ្ល៉ាឌីមៀ ពូទីន ក្នុងកម្មវិធីទូរទស្សន៍មួយជាមួយយុវជន (រូបភាពគេហទំព័រប្រធានាធិបតីរុស្ស៊ី)
× ប្រធានាធិបតីរុស្ស៊ី វ្ល៉ាឌីមៀ ពូទីន នៅតែបន្តលាក់បាំងជំហររបស់លោកក្នុងការចូលរួមការបោះឆ្នោតប្រធានាធិបតីនៅឆ្នាំ២០១៨ ខណៈអាណត្តិសព្វថ្ងៃរបស់លោកនឹងត្រូវចប់នៅពេលខាងមុខនេះ។ ថ្លែងក្នុងកម្មវិធីទូរទស្សន៍មួយនៅថ្ងៃទី២១ ខែកក្កដា លោក ពូទីន បានឆ្លៀតបង្ហើបថា មានអ្នកជំរុញឲ្យលោកកែរដ្ឋធម្មនុញ្ញដែលកំណត់អាណត្តិប្រធានាធិបតី ប៉ុន្តែលោកមិនបានឯកភាពឡើយ ហើយក៏មិនធ្វើបែបនេះដើម្បីរក្សាអំណាចដែរ។
អាណត្តិប្រធានាធិបតី៦ឆ្នាំរបស់លោក វ្ល៉ាឌីមៀ ពូទីន នឹងត្រូវបញ្ចប់នៅឆ្នាំក្រោយ។ លោក ពូទីន កាន់តំណែងប្រធានាធិបតីនេះបន្តពីលោក ឌីមីទ្រី ម៉េដវ៉េដេវ បន្ទាប់ពីឈ្នះការបោះឆ្នោតក្នុងឆ្នាំ២០១២ ។ ខណៈដែលអាណត្តិ៦ឆ្នាំកាន់តែជិតមកដល់ លោក ពូទីន មិនទាន់បង្ហាញចេតនាក្នុងការប្រជែងក្នុងការបោះឆ្នោតជ្រើសរើសប្រធានាធិបតីថ្មីក្នុងឆ្នាំ២០១៨ ឡើយ ប៉ុន្តែលោកបានត្រឹមបង្ហើបថា លោកនឹងសម្រេចចិត្តនៅពេលខាងមុខ។
យោងតាមសារព័ត៌មាន RT ប្រធានាធិបតីរុស្ស៊ីរូបនេះបញ្ជាក់ ចំពោះអ្នកទស្សនាវ័យក្មេងក្នុងកម្មវិធីទូរទស្សន៍មួយ ថា លោកមិនទាន់សម្រេចចិត្តថានឹងត្រូវបន្តការងារក្នុងនាមជាប្រធានាធិបតីឬយ៉ាងណាឡើយ។ លោកត្រូវរង់ចាំមើលសិន ព្រោះការបោះឆ្នោតត្រូវរៀបចំនៅឆ្នាំ២០១៨ ឯណោះ ហើយពេលវេលានៅមានច្រើនទៀតមុនយុទ្ធនាការឃោសនារកសំឡេងឆ្នោតចាប់ផ្ដើម។ លោក ពូទីន នឹងប្រើពេលសេសសល់ដើម្បីពិចារណាបញ្ហានេះ។
ឆ្លៀតពេលនេះ លោក ពូទីន ដែលធ្លាប់កាន់តំណែងនេះពីរអាណត្តិម្ដងហើយនោះ ក៏ប្រកាសដែរថា លោកនឹងមិនកែប្រែរដ្ឋធម្មនុញ្ញដើម្បីបន្ថែមអំណាច ឬក៏ពន្យារអាណត្តិប្រធានាធិបតីដែរ។ លោកនិយាយថា អ្វីៗមានចែងក្នុងរដ្ឋធម្មនុញ្ញអស់ហើយ រាប់ទាំងអាណត្តិប្រធានាធិបតីផង។ លើសពីនោះ លោកបានទម្លាយរឿងមួយទៀត គឺឱកាសក្នុងការកែរដ្ឋធម្មនុញ្ញ ដោយមានអ្នកមកអង្វរលោកឲ្យកែច្បាប់កំពូលនេះ ប៉ុន្តែលោកមិនបានធ្វើតាមឡើយ។
ច្បាប់រដ្ឋធម្មនុញ្ញរុស្ស៊ីចែងថា មនុស្សអ្នកមិនអាចកាន់តំណែងលើសពីរអាណត្តិជាប់គ្នាឡើយ។ ដូចនេះហើយបានជាគេឃើញលោក ពូទីន មិនប្រជែងកៅអីប្រធានាធិបតីក្នុងការបោះឆ្នោត២០០៨ ព្រោះមុននេះលោកកាន់តំណែងប្រធានាធិបតីពីរអាណត្តិជាប់គ្នារួចហើយ គឺពីឆ្នាំ២០០០ ដល់ឆ្នាំ២០០៨ ។ អវត្តមានលោក ពូទីន ជាផ្ដល់ឱកាសឲ្យលោក ម៉េដវ៉េដេវ ឈ្នះឆ្នោតបានមួយអាណត្តិ មុននឹងលោក ពូទីន ត្រឡប់មកប្រជែងតំណែងនេះក្នុងឆ្នាំ២០១២ ចំពេលដែលអាណត្តិត្រូវបានពង្រីកដល់៦ឆ្នាំ។
ស្របពេលដែលមិនទាន់បង្ហាញចេតនាចូលរួមការបោះឆ្នោតនោះ លោក ពូទីន ក៏មិនបានលើកឡើងពីបេក្ខភាពដែលអាចស្នងតំណែងរូបលោកដែរ។ លោកសម្រេចចិត្តទុកឱកាសក្នុងការស្វែងរកប្រធានាធិបតីថ្មីរបស់រុស្ស៊ី ទៅឲ្យប្រជាជនរុស្ស៊ីជាអ្នកកំណត់តាមរយៈការបោះឆ្នោតសម្ងាត់។ លោកចង់មានន័យថា វាជារឿងមិនត្រឹមត្រូវដែលលោកត្រូវកំណត់អនាគតអ្នកដឹកនាំរបស់ប្រទេស ព្រោះមានតែប្រជាជនរុស្ស៊ីប៉ុណ្ណោះទើបអាចអារកាត់បាន៕
Tag:
រុស្ស៊ី
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com