អន្តរជាតិ
អាជ្ញាធរថៃ ចាប់ខ្លួនជនសង្ស័យម្នាក់ ដែលទិញអាវុធពីកម្ពុជា យកទៅលក់ឲ្យមីយ៉ាន់ម៉ា រូបពីកាសែត Bangkok Post
×
ភ្នំពេញ៖ អាជ្ញាធរថៃ បានចាប់ខ្លួនជនជាតិថៃម្នាក់ ដែលសង្ស័យជាប់ពាក់ព័ន្ធនឹងការទិញអាវុធពីកម្ពុជា នាំយកទៅលក់នៅតំបន់ព្រំដែនប្រទេសមីយ៉ាន់ម៉ា។
ប៉ូលិសថៃ បានឲ្យដឹងថា ជនសង្ស័យ Pachara Jaithiang ដែលជាអ្នកបញ្ជាទិញអាវុធពីកម្ពុជា ត្រូវបានសមត្ថកិច្ចថៃ ចាប់ខ្លួននៅខេត្ត Mae Hong Son កាលពីទី២១ កក្កដា។ ហើយនៅពេលនេះ ប៉ូលិសថៃ កំពុងបន្តស្វែងរកជនសង្ស័យជាច្រើននាក់ទៀត ដែលជាប់ពាក់ព័ន្ធនឹងករណីបញ្ជាទិញអាវុធពីកម្ពុជានេះ។
សារព័ត៌មានបាងកកប៉ុស្តិ៍ ដែលបានស្រង់សម្តីស្នងការរងនគរបាលជាតិថៃ លោក Srivara Ransibrahmanakul បានបញ្ជាក់ថា៖«ជនសង្ស័យខាងលើនេះ បានជួលមនុស្ស៥នាក់ ដែលយើងបានចាប់ខ្លួនមុនដំបូងនោះ ឲ្យបញ្ជូនអាវុធពីខេត្តស្រះកែវទៅឲ្យរូបគេ។ ហើយខាងសមត្ថកិច្ចយើងមានភស្តុតាងគ្រប់គ្រាន់ ដែលអាចបញ្ជាក់ពីកំហុសជនសង្ស័យ និងមានដីការត្រឹមត្រូវសម្រាប់ចាប់រូបគេបាន បើទោះជាជនសង្ស័យបានបដិសេធថា មិនជាប់ពាក់ព័ន្ធនឹងបទឧក្រិដ្ឋក្តី»។
កាលពីថ្ងៃទី១៨ កក្កដា អាជ្ញាធរថៃ ក៏បានចាប់ខ្លួនជនសង្ស័យ៥នាក់ ដែលបានទិញអាវុធពីកម្ពុជា យកទៅលក់នៅតំបន់ព្រំដែនថៃ-មីយ៉ាន់ម៉ាផងដែរ។ អាវុធខុសច្បាប់ ដែលខាងប៉ូលិសរឹបអូសបាននោះ មានគ្រាប់បែក៨២មីល្លីម៉ែត្រ ៥គ្រាប់ គ្រាប់បែក៨១មីល្លីម៉ែត្រមួយគ្រាប់ និងឧបករណ៍បញ្ឆេះ ចំនួន៣។ នេះបើតាមសារព័ត៌មានបាងកកប៉ុស្តិ៍។
កន្លងមកអាជ្ញាធរថៃ ធ្លាប់បានរឹបអូសអាវុធខុសច្បាប់ជាច្រើនដើម ដែលនាំពីប្រទេសកម្ពុជា ចូលទៅប្រទេសថៃ កាលពីថ្ងៃទី៣ មិថុនាផងដែរ។ ភាគីថៃ បានដាក់ការសង្ស័យថា ការនាំចូលអាវុធខុសច្បាប់ចូលទឹកដីថៃនេះ អាចជាប់ពាក់ព័ន្ធនឹង
រដ្ឋមន្ត្រីក្រសួងការពារជាតិ លោក ទៀ បាញ់ ។ តែលោក ទៀ បាញ់ បានស្នើឲ្យបណ្ដាញផ្សព្វផ្សាយរបស់ថៃសុំទោសរដ្ឋាភិបាលកម្ពុជា ចំពោះការចុះផ្សាយព័ត៌មានថា លោកជាប់ពាក់ព័ន្ធនឹងការរត់ពន្ធអាវុធខុសច្បាប់ យកទៅលក់នៅប្រទេសមីយ៉ានម៉ា៕
Tag:
ថៃ
កម្ពុជា
មីយ៉ាន់ម៉ា
អាវុធ
© រក្សាសិទ្ធិដោយ thmeythmey.com