អន្តរជាតិ
ប្រមុខការទូតចិនថា ចិននិងថៃមានទំនាក់ទំនងដូចបងប្អូន រដ្ឋមន្ត្រីការបរទេសចិន វ៉ាង យី ចាប់ដៃនាយករដ្ឋមន្ត្រីថៃ ប្រាយុទ្ធ ចន្ទអូចា (រូបភាព Reuters)
× ទំនាក់ទំនងទ្វេភាគីរវាងចិន និងថៃ កាន់តែល្អូកល្អឺនខ្លាំង បន្ទាប់ពីក្រុមយោធាឡើងកាន់អំណាចនៅថៃតាមរយៈរដ្ឋប្រហារកាលពីបីឆ្នាំមុន។ ថៃ ដែលជាសម្ព័ន្ធមិត្តចាស់ឆ្នាំរបស់អាមេរិក បានបែរមុខទៅរកចិន ព្រោះអាមេរិករិះគន់រឿងរំលោភសិទ្ធិមនុស្សខ្លាំងពេក។ រដ្ឋមន្ត្រីការបរទេសចិន វ៉ាង យី បាននិយាយលើកសរសើរទំនាក់ទំនងទ្វេភាគីថៃ-ចិន ដែលកាន់តែស្និទ្ធស្នាលជាងពេលមុនៗ និងផ្ដល់ប្រយោជន៍ឲ្យភាគីទាំងសងខាងទៀតផង។
ប្រមុខការទូតចិន វ៉ាង យី បានទៅដល់រាជធានីបាងកកនៅថ្ងៃទី២៤ ខែកក្កដា ក្នុងដំណើរទស្សនកិច្ចផ្លូវការដើម្បីពង្រឹងទំនាក់ទំនងទ្វេភាគីចិន-ថៃ។ ទស្សនកិច្ចនេះ ធ្វើឡើងមុនជំនួបកំពូលថ្នាក់តំបន់នៅហ្វីលីពីននៅខែសីហា ហើយក៏ចំពេលដែលចំណងមិត្តភាពទ្វេភាគីកាន់តែល្អ ដ្បិតចិនមិនសូវខ្វល់រឿងបំបិទសិទ្ធិសេរីភាពរបស់របបយោធាថៃឡើយ ហើយថែមទាំងក្លាយជាអ្នកលក់អាវុធឲ្យថៃតម្លៃរាប់ពាន់លានដុល្លារទៀតផង។
លោក វ៉ាង យី បានជួបជាមួយនាយករដ្ឋមន្ត្រីថៃ ឧត្តមសេនីយ៍ ប្រាយុទ្ធ ចន្ទអូចា និងរដ្ឋមន្ត្រីការបរទេស ដុន ប្រាមុដវិណៃ (Don Pramudwinai) ដើម្បីពិភាក្សាទំនាក់ទំនងទ្វេភាគី។ ទស្សនកិច្ចលើកនេះ ក៏ត្រូវមើលឃើញថាជាការស្ទាបស្ទង់ជំហររបស់ថៃជុំវិញជម្លោះនៅសមុទ្រចិនខាងត្បូង ដែលរដ្ឋអាស៊ានបួនមានបញ្ហាជាមួយចិន។ ថៃ មិនមែនជាភាគីជម្លោះឡើយ តែជាសមាជិកអាស៊ានមួយ ដែលមានឥទ្ធិពលគួរសម។
យោងតាមទីភ្នាក់ងារព័ត៌មាន Reuters ក្នុងទស្សនកិច្ចនៅទីក្រុងបាងកក រដ្ឋមន្ត្រីការបរទេសចិនរូបនេះនិយាយថា ទំនាក់ទំនងរវាងចិន និងថៃ ប្រៀបដូចជាបងប្អូនអ៊ីចឹងដែរ។ ចំណែកឯប្រមុខការទូតថៃ លោក ដុន ប្រាមុដវិណៃ វិញក៏បានលើកសរសើរទំនាក់ទំនងទ្វេភាគីនេះដូចគ្នា និងបាននិយាយដែរថា ទំនាក់ទំនងរវាងប្រទេសទាំងពីរ ធ្វើដំណើរទៅមុខដោយរលូន និងមិនមានបញ្ហាអ្វីជាឧបសគ្គរាំងស្ទះឡើយ។
ដូចសម្ដីរបស់ប្រមុខការទូតថៃ ទំនាក់ទំនងរវាងថៃ និងចិន ពិតជាស្ថិតលើផ្លូវល្អមែន។ ចិនបានក្លាយជាទីផ្សារផ្គត់ផ្គង់អាវុធឲ្យថៃ និងក្លាយជាម្ចាស់គម្រោងសាងសង់ផ្លូវរថភ្លើងដ៏ធំនៅថៃទៀតផង។ គ្រាន់តែឆ្នាំ២០១៧ នេះ រដ្ឋាភិបាលយោធាថៃបានយល់ព្រមទិញរថក្រោះ ឧទ្ធម្ភាគចក្រ និងនាវាមុជទឹក ពីចិនក្នុងទំហំទឹកប្រាក់ច្រើនជាង៥០០លានដុល្លារឯណោះ។ នេះជានិន្នាការថ្មី ដែលកន្លងមកថៃបាននាំចូលអាវុធរបស់ខ្លួនពីអាមេរិក។
ជាមួយទំនាក់ទំនងកាន់តែល្អ របបសឹកថៃក៏បានឯកភាពឲ្យក្រុមហ៊ុនចិនទទួលបន្ទុកសាងសង់ផ្លូវរថភ្លើងថ្មីតម្លៃ៥,៥ពាន់លានដុល្លារ ភ្ជាប់ពីតំបន់ខាងកើតឆ្ពោះទៅកាន់តំបន់ភាគខាងត្បូងរបស់ចិន ដោយកាត់តាមឡាវទៀតផង។ គម្រោងសាងសង់នេះ ត្រូវបានពន្យារពេលយូរមកហើយ ដោយសារតែការវាយតម្លៃមិនទាន់បញ្ចប់ ប៉ុន្តែលោក ប្រាយុទ្ធ ក៏បានប្រើអំណាចពិសេសរបស់លោកដើម្បីពន្លឿនគម្រោងសងសង់តែម្ដង៕
© រក្សាសិទ្ធិដោយ thmeythmey.com