អន្តរជាតិ
ប្រមុខ CIA ថា ចិនជាការគំរាមកៅអីមហាអំណាចពិភពលោករបស់អាមេរិកធំជាងគេ
× នាយកទីភ្នាក់ងារចារកម្មកណ្ដាល (CIA) លោក Mike Pompeo បានចាត់ទុកចិន រុស្ស៊ី និងអ៊ីរ៉ង់ ជាការគំរាមកំហែងរយៈពេលវេងសម្រាប់អាមេរិក។ ប៉ុន្តែលោក Pompeo បានហៅចិនជាការគំរាមកំហែងខ្លាំងគេមកលើកៅអីមហាអំណាចពិភពលោករបស់អាមេរិក។ នាយក CIA រូបនេះអះអាងថា ចិនមានសេដ្ឋកិច្ចរឹងមាំ និងមានប្រជាជនច្រើន ដែលអាចជួយបង្កើនឥទ្ធិពលរបស់មហាអំណាចមួយនេះ និងបង្កបញ្ហាឲ្យអាមេរិកផង។
កូរ៉េខាងជើង រុស្ស៊ី ចិន និងអ៊ីរ៉ង់ សុទ្ធតែជាការគំរាមកំហែងលើសន្តិសុខរបស់អាមេរិក។ នេះបើតាមការអះអាងរបស់ប្រធានចារកម្មអាមេរិក CIA លោក Mike Pompeo ក្នុងកិច្ចសម្ភាសជាមួយ Bill Gertz អ្នកជំនាញផ្នែកសន្តិសុខ នៅថ្ងៃទី២៦ ខែកក្កដា។ ប្រធាន CIA ចាត់ទុកកូរ៉េខាងជើងត្រឹមជាការគំរាមកំហែងរយៈពេលខ្លីប៉ុណ្ណោះ ចំណែកឯចិន រុស្ស៊ី និងអ៊ីរ៉ង់ គឺជាការគំរាមកំហែងរយៈពេលវែងរបស់អាមេរិក ជាពិសេសចិនដែលមានប្រជាជនច្រើនជាងគេលើពិភពលោក។
ទោះជាពិបាកជ្រើសរើសរវាងចិន រុស្ស៊ី និងអ៊ីរ៉ង់ ថាប្រទេសមួយណាគំរាមកំហែងអាមេរិកជាងគេ លោក Pompeo ជឿថា មានតែចិនប៉ុណ្ណោះដែលអាចបង្កបញ្ហាសម្រាប់កៅអីមហាអំណាចរបស់អាមេរិកបាន។ លោកយកចំនួនប្រជាជនខ្ទង់ពាន់លាននាក់ និងទំហំសេដ្ឋកិច្ចដ៏ធំរបស់ចិន ធ្វើជាអំណះអំណាង ខណៈរុស្ស៊ី និងអ៊ីរ៉ង់មិនមានគ្រឹះសេដ្ឋកិច្ចរឹងមាំដូចចិនឡើយ ហើយពឹងផ្អែកតែលើធនធានប្រេងប៉ុណ្ណោះ។
យ៉ាងណាមិញ នាយក CIA ដែលទើបចូលកាន់តំណែងបាន៦ខែ និយាយដែរថា សមត្ថភាពរបស់ចិនបានមកពីលួចបច្ចេកវិទ្យារបស់អាមេរិក ឬក៏បង្កើតបច្ចេកវិទ្យាថ្មីដើម្បីផ្ដួលអាមេរិកឲ្យបាន។ បើតាមសម្ដីរបស់លោក Pompeo ចិនបានលួចបច្ចេកវិទ្យានានាតាមរយៈការទិញសម្ភារផលិតដោយអាមេរិក និងព្យាយាមលួចបច្ចេកវិទ្យាអាមេរិកគ្រប់យ៉ាងតាមតែអាចធ្វើបាន ហើយចិនបានធ្វើរបៀបនេះជាយូរមកហើយដើម្បីឈានទៅរកតំណែងមហាអំណាចពិភពលោក។
ជាការពិត អាមេរិក និងចិន ប្រណាំងប្រជែងយ៉ាងខ្លាំងដើម្បីកៅអីមហាអំណាចពិភពលោក ដែលអាមេរិកអង្គុយអស់ពេលច្រើនឆ្នាំមកហើយ ប៉ុន្តែមហាអំណាចទាំងពីរមានទំនាក់ទំនងជិតស្និទ្ធលើវិស័យសេដ្ឋកិច្ច។ បញ្ហាពីរដែលអាមេរិក និងចិន មើលមុខមិនសូវត្រូវ គឺជម្លោះនៅសមុទ្រចិនខាងត្បូង ដែលចិនទាមទារស្ទើរទាំងស្រុង ឯអាមេរិកវិញលើយកមូលហេតុសេរីភាពចរាចរណ៍ផ្លូវសមុទ្រដើម្បីជ្រែកចូលតំបន់ជម្លោះនេះ និងវិបត្តិនុយក្លេអ៊ែរនៅឧបទ្វីបកូរ៉េផងដែរ។
មកដល់រដ្ឋបាលប្រធានាធិបតី ដូណាល់ ត្រាំ គោលនយោបាយរបស់លោកដែលផ្ដោតសំខាន់លើផលប្រយោជន៍អាមេរិកជាធំ ធ្វើឲ្យអាមេរិកដកខ្លួនពីសម្ព័ន្ធមិត្តរបស់ខ្លួន ហើយវាក៏ក្លាយជាឱកាសសម្រាប់ចិនដើម្បីបំពេញចន្លោះប្រហោងរបស់អាមេរិក។ មិនថាអឺរ៉ុប អាស៊ី ឬអាហ្វ្រិក គេឃើញមានវត្តមានចិនស្ទើរគ្រប់កន្លែង និងបានក្លាយជាតួអង្គសំខាន់ទៀតផងក្នុងការដោះស្រាយបញ្ហាសកល ហើយខុសពីអាមេរិកដែលខ្វល់ខ្វាយតែសេដ្ឋកិច្ចខ្លួនឯង៕
Tag:
ចិន
អាមេរិក
CIA
Mike Pompeo
© រក្សាសិទ្ធិដោយ thmeythmey.com