អន្តរជាតិ
នាយករដ្ឋមន្ត្រីប៉ាគីស្ថានទើបអស់អំណាច ជ្រើសរើសប្អូនប្រុសឲ្យស្នងតំណែង
× លោក Nawaz Sharif ដែលទើបត្រូវបានតុលាការកំពូលប៉ាគីស្ថានបង្ខំឲ្យលាលែងពីតំណែងនាយករដ្ឋមន្ត្រី បានជ្រើសរើសប្អូនប្រុសរបស់លោកឲ្យបន្តដឹកនាំរដ្ឋាភិបាលជំនួសលោក។ លោក Sharif អស់តំណែងដោយសារតែសំណុំរឿងពុករលួយពាក់ព័ន្ធការបែកធ្លាយឯកសារ Panama Paper ។ លោកសុខចិត្តទទួលយកការសម្រេចចិត្តរបស់តុលាការ បើទោះជាលោកបដិសេធដាច់ខាតលើការចោទប្រកាន់នេះក៏ដោយ។
ទើបអស់តំណែងនៅថ្ងៃទី២៨ ខែកក្កដា ដោយសាររឿងពុករលួយ លោក Nawaz Sharif បានជ្រើសរើសអ្នកបន្តវេនរបស់លោករួចហើយ។ លោក Sharif បានជ្រើសរើសប្អូនប្រុសលោក គឺ Shahbaz Sharif ឲ្យធ្វើជានាយករដ្ឋមន្ត្រីថ្មីរបស់ប៉ាគីស្ថាន។ លោក Sharif ត្រូវបានតុលាការកំពូលប៉ាគីស្ថានបញ្ចប់តំណែងដោយសារតែលោកផ្ដល់ព័ត៌មានមិនពិតទាក់ទងទ្រព្យសម្បត្តិរបស់លោក ហើយរឿងនេះលេចធ្លាយដោយសារតែឯកសារ Panama Paper តែម្ដង។
ថ្លែងតាមកញ្ចក់ទូរទស្សនៅថ្ងៃទី២៩ ខែកក្កដា លោក Sharif នៅតែមិនទទួលស្គាល់ការចោទប្រកាន់លើរូបលោក តែលោកក៏មិនជំទាស់ការសម្រេចរបស់តុលាការដែរ។ បន្ទាប់ពីអស់តំណែង លោក Sharif ក៏បានកោះប្រជុំជាមួយសមាជិកសភាបក្ស PML-N ដែលជាបក្សកាន់តំណែង ហើយលោកក៏បានប្រកាសពីបេក្ខភាពនាយករដ្ឋមន្ត្រីថ្មីដែលជាប្អូនប្រុសរបស់លោកតែម្ដង។ ប៉ុន្តែលោក Shahbaz ដែលកំពុងកាន់តំណែងប្រធានរដ្ឋមន្ត្រីនៃខេត្ត Punjab នឹងមិនទាន់ចូលកាន់តំណែងភ្លាមៗឡើយ។
តាមច្បាប់ប៉ាគីស្ថាន នាយករដ្ឋមន្ត្រីត្រូវជាសមាជិកសភា ដូចនេះលោក Shahbaz ត្រូវលាលែងតំណែងបច្ចុប្បន្ន បន្ទាប់ចូលរួមក្នុងការបោះឆ្នោតបំពេញបន្ថែមដើម្បីក្លាយជាសមាជិកសភា មុននឹងសភាដែលបក្ស PML-N មានសំឡេងភាគច្រើនស្រាប់បោះឆ្នោត គាំទ្របេក្ខភាពរបស់លោក។ ក្នុងរយៈពេលនេះ លោក Shahid Khaqan Abbasi មេដឹកនាំសំខាន់មួយរូបរបស់បក្ស PML-N នឹងកាន់តំណែងជានាយករដ្ឋមន្ត្រីបណ្ដោះអាសន្ន។
បើតាមទីភ្នាក់ងារព័ត៌មាន Xinhua លោក Abbasi ទំនងកាន់តំណែងប្រមុខរដ្ឋាភិបាលនៃរយៈពេល៤៥ថ្ងៃ មុននឹងប្រគល់តំណែងឲ្យលោក Shahbaz ។ ប្រធានាធិបតីប៉ាគីស្ថាន Mamnoon Hussain នឹងកោះកិច្ចប្រជុំសភាដើម្បីបោះឆ្នោតតែងតាំងលោក Abbasi ជានាយករដ្ឋមន្ត្រីបណ្ដោះអាសន្ន ទម្រាំលោក Shahbaz បំពេញលក្ខខណ្ឌគ្រប់គ្រាន់។ គេរំពឹងថា អ្វីនឹងដំណើរការដោយរលូន ព្រោះបក្សកាន់អំណាចមានសំឡេងគ្រប់គ្រាន់ទៅហើយ។
សូមបញ្ជាក់ថា ក្រៅពីបញ្ចប់តំណែងលោក Sharif តុលាការកំពូលប៉ាគីស្ថាក៏បានបញ្ជាឲ្យតុលាការដែលទទួលខុសត្រូវសំណុំរឿងពុករលួយនេះចាប់ផ្តើមចោទប្រកាន់ជាផ្លូវការនិងជំនុំជម្រះរឿងក្តីលោក Sharif, ក្រុមគ្រួសារលោក និងរដ្ឋមន្ត្រីផ្សេងទៀតផងដែរ។ ចៅក្រមតុលាការកំពូលក៏បានប្រកាសថា សកម្មភាព និងភស្តុតាងរបស់លោក Nawaz Sharif ពាក់ព័ន្ធសំណុំរឿងពុករលួយនេះជាសកម្មភាពមិនស្មោះត្រង់ចំពោះស្ថាប័ននីតិបញ្ញត្តិផងដែរ៕
© រក្សាសិទ្ធិដោយ thmeythmey.com