យន្តហោះចម្បាំងអាមេរិក ជប៉ុន និងកូរ៉េខាងត្បូង ហោះសម្ញែងកម្លាំងក្រវែលឧបទ្វីបកូរ៉េ

អន្តរជាតិ

យន្តហោះចម្បាំងអាមេរិក ជប៉ុន និងកូរ៉េខាងត្បូង ហោះសម្ញែងកម្លាំងក្រវែលឧបទ្វីបកូរ៉េ

31, Jul 2017 , 7:59 pm

រូបភាព

យន្តហោះទម្លាក់គ្រាប់បែក B-1B របស់អាមេរិក ហោះអមដោយយន្តហោះចម្បាំងជប៉ុន F-2 (រូបភាពពីហ្វេសប៊ុកកងទ័ពអាកាសអាមេរិកនៅប៉ាស៊ីហ្វិក)

ដោយ: តន ចាន់រិទ្ធារ៉ា

យន្តហោះទម្លាក់គ្រាប់បែកអាមេរិក ហោះអមដោយយន្តហោះចម្បាំងមកពីជប៉ុន និងកូរ៉េខាងត្បូង បានធ្វើប្រតិបត្តិការហោះហើររួមគ្នាពីលើឧបទ្វីបកូរ៉េនៅថ្ងៃទី៣០ ខែកក្កដា។ យោធាអាមេរិកនិយាយថា បេសកកម្មរួមគ្នាលើកនេះគឺជាការបង្ហាញអានុភាពកងទ័ពរបស់អាមេរិក និងសម្ព័ន្ធមិត្តរបស់ខ្លួន ហើយវាក៏ជាការឆ្លើយតបនឹងការបាញ់មីស៊ីលបាលីស្ទិករបស់កូរ៉េខាងជើងផងដែរ។ យោធាអាមេរិកក៏ប្រកាសដែរថា ខ្លួនត្រៀមរួចរាល់ក្នុងការចេញប្រតិបត្តិការ បើមានបញ្ជា។

ជាការឆ្លើយតបនឹងការសាកល្បងមីស៊ីលបាលីស្ទិកអន្តរទ្វីបដោយជោគជ័យរបស់កូរ៉េខាងជើង យន្តហោះទម្លាក់គ្រាប់ B-1B Lancer ចំនួនពីរគ្រឿង និងយន្តហោះចម្បាំងរបស់កូរ៉េខាងត្បូង និងជប៉ុន បានហោះហើរក្រឡឹងឧបទ្វីបកូរ៉េ ដើម្បីបង្អួតកម្លាំងទ័ពដាក់កូរ៉េខាងជើង។ កូរ៉េខាងជើងបានបាញ់មីស៊ីលរំលងទ្វីបដល់ទៅពីរលើកក្នុងខែកក្កដា ដោយម្ដងនៅថ្ងៃទី៤ និងម្ដងទៀតនៅថ្ងៃទី២៨ និងបានប្រកាសថាទទួលជោគជ័យទៀតផង។

កងទ័ពជើងអាកាសអាមេរិកប្រចាំតំបន់ប៉ាស៊ីហ្វិកប្រកាសថា បេសកកម្មហោះហើររយៈពេល១០ម៉ោងនេះ គឺជាការឆ្លើយតបដោយផ្ទាល់ទៅនឹងការបាញ់មីស៊ីលបាលីស្ទិកចម្ងាយឆ្ងាយ Hwasong-14 របស់ក្រុងព្យុងយ៉ាង។ មេបញ្ជាការទ័ពអាកាសអាមេរិកនៅប៉ាស៊ីហ្វិក ឧត្តមសេនីយ៍ Terrence J. O’Shaughnessy បាននិយាយក្នុងសេចក្ដីថ្លែងការណ៍មួយថា កូរ៉េខាងជើងនៅតែជាការគំរាមកំហែងបន្ទាន់នៅក្នុងតំបន់ដដែល។

បើតាមយោធាអាមេរិក យន្តហោះទម្លាក់គ្រាប់បែក B-1B ទាំងពីរបានធ្វើដំណើរមកពីមូលដ្ឋានទ័ពនៅកោះ Guam ហើយក៏ចូលរួមជាមួយយន្តហោះចម្បាំងរបស់ជប៉ុន និងកូរ៉េខាងត្បូងក្នុងប្រតិបត្តិការហោះហើរពីលើឧបទ្វីបកូរ៉េ។ ជាមួយវត្តមានយន្តហោះទម្លាក់គ្រាប់នេះ លោក O’Shaughnessy ព្រមានថា បើមានការស្នើសុំ យើងត្រៀមឆ្លើយតបជាស្រេច ជាមួយនឹងល្បឿនដ៏លឿនប្រកបដោយអានុភាពដើម្បីវាយប្រហារគោលដៅសត្រូវ។

យន្តហោះទម្លាក់គ្រាប់បែក B-1B ហោះអមដោយយន្តហោះចម្បាំងកូរ៉េខាងត្បូង F-15 (រូបភាពគេហទំព័រទ័ពអាកាសអាមេរិក)

សូមបញ្ជាក់ដែរថា មុននឹងការមកដល់របស់យន្តហោះទាំងពីរខាងលើ កងទ័ពអាមេរិក និងកូរ៉េខាងត្បូងក៏បានបាញ់មីស៊ីលជាច្រើនគ្រាប់ដើម្បីគំរាមកូរ៉េខាងជើងផងដែរ។ មីស៊ីលដែលបាញ់នៅថ្ងៃទី២៩ ខែកក្កដា បានធ្លាក់ចំគោលដៅនៅតំបន់សមុទ្រខាងកើត ជាទីដែលមីស៊ីលកូរ៉េខាងជើងធ្លាក់ដែរនោះ។ កងទ័ពអាមេរិកនិយាយថា មីស៊ីលទាំងអស់ត្រូវបានបាញ់ចេញពីប្រព័ន្ធបាញ់មីស៊ីល ATACMS របស់អាមេរិក និងប្រព័ន្ធ Hyunmoo Missile II របស់កូរ៉េខាងត្បូង។

ការបាញ់មីស៊ីល និងការបញ្ជូនយន្តហោះទម្លាក់គ្រាប់បែកមកកាន់ឧបទ្វីបកូរ៉េ គឺជាយុទ្ធសាស្ត្រឆ្លើយតបភ្លាមៗទៅនឹងសកម្មភាពព្រហើនរបស់កូរ៉េខាងជើង ខណៈការដាក់ទណ្ឌកម្មបន្ថែមទៀតកំពុងត្រូវបានពិភាក្សា។ អាមេរិកមិនសប្បាយចិត្តឡើយ ពេលចិនមិនធ្វើអ្វីសោះ និងទុកឲ្យកូរ៉េខាងជើងធ្វើអ្វីតាមចិត្តនោះ។ ជាមួយគ្នានេះ អាមេរិកកំពុងរកផ្លូវផ្សេងទៀតដើម្បីដាក់ទណ្ឌកម្មលើកូរ៉េខាងជើង ដើម្បីបញ្ចប់មហិច្ឆតានុយក្លេអ៊ែរ៕