ចិនប្រាប់អាមេរិកកុំទាញរឿងពាណិជ្ជកម្មទ្វេភាគីទៅភ្ជាប់ជាមួយបញ្ហាកូរ៉េខាងជើង

អន្តរជាតិ

ចិនប្រាប់អាមេរិកកុំទាញរឿងពាណិជ្ជកម្មទ្វេភាគីទៅភ្ជាប់ជាមួយបញ្ហាកូរ៉េខាងជើង

31, Jul 2017 , 9:39 pm

រូបភាព

អនុរដ្ឋមន្ត្រីពាណិជ្ជកម្មចិន Qian Keming នាឱកាសសន្និសីទកាសែត (រូបភាព Xinhua)

ដោយ: តន ចាន់រិទ្ធារ៉ា

មន្ត្រីជាន់ខ្ពស់ចិន នៅថ្ងៃទី៣១ ខែកក្កដា បាននិយាយថា បញ្ហានុយក្លេអ៊ែររបស់កូរ៉េខាងជើង មិនមានជាប់ទាក់ទងទាល់តែសោះជាមួយការធ្វើពាណិជ្ជកម្មទ្វេភាគីចិន និងអាមេរិក។ ការប្រកាសនេះធ្វើឡើងបន្ទាប់ពីប្រធានាធិបតីអាមេរិក ដូណាល់ ត្រាំ បានរិះគន់ចិនថាមិនជួយដោះស្រាយបញ្ហាកូរ៉េខាងជើងសោះ ខណៈរកប្រាក់បានរាប់ពាន់លានដុល្លារតាមរយៈការរកស៊ីជាមួយអាមេរិក។ អាមេរិកបានរំអុកចិនឲ្យប្រើប្រាស់ឥទ្ធិពលរបស់ខ្លួនក្នុងការបង្ខំឲ្យកូរ៉េខាងជើងបោះបង់កម្មវិធីនុយក្លេអ៊ែរ។

ជារឿយបន្ទាប់ពីកូរ៉េខាងជើងបាញ់មីស៊ីល ប្រធានាធិបតីអាមេរិក ដូណាល់ ត្រាំ តែងបន្ទោសចិនថាមិនព្រមជួយដោះស្រាយបញ្ហាអ្វីសោះ ហើយបានតែនិយាយប៉ុណ្ណោះ។ លោក ត្រាំ ក៏តែងលើកយកទំនាក់ទំនងពាណិជ្ជកម្មទ្វេភាគីមកគំរាមចិនឲ្យចាត់វិធានការប្រឆាំងកូរ៉េខាងជើង ដោយលោកធ្លាប់ព្រមានរឹតបន្តឹងការរកស៊ីជាមួយចិនទៀតផង។ នៅថ្ងៃទី២៩ ខែកក្កដា លោកបានបង្ហោះសារតាម Twitter ថា ចិនចំណេញប្រាក់រាប់ពាន់លានពីពាណិជ្ជកម្មជាមួយអាមេរិក តែមិនបានធ្វើអ្វីសោះដាក់កូរ៉េខាងជើង។

យ៉ាងណាមិញ ក្រុងប៉េកាំង បានទាត់ចោលការអធិប្បាយរបស់ប្រធានាធិបតីអាមេរិក ដែលចេះតែភ្ជាប់រឿងពាណិជ្ជកម្មទៅនឹងបញ្ហាកូរ៉េខាងជើងនោះ។ ក្នុងសន្និសីទកាសែតថ្ងៃទី៣១ ខែកក្កដា អនុរដ្ឋមន្ត្រីពាណិជ្ជកម្មចិន Qian Keming និយាយថា ការរកស៊ីរវាងអាមេរិក និងចិន មិនមានជាប់ពាក់ព័ន្ធនឹងបញ្ហានុយក្លេអ៊ែររបស់កូរ៉េខាងជើងទាល់តែសោះ ពោលវាគឺជាបញ្ហាដាច់ដោយឡែកពីគ្នាសុទ្ធសាធតែម្ដង ហើយក៏មិនចរចាចូលគ្នាដែរ។

យោងតាមទីភ្នាក់ងារព័ត៌មាន Reuters មន្ត្រីជាន់ខ្ពស់ដដែលនេះក៏បានបង្ហាញជំហររបស់ចិនដែលបន្តប្រកាន់យកការដោះស្រាយបញ្ហានៅឧបទ្វីបកូរ៉េតាមផ្លូវសន្តិភាព។ លោក Qian Keming បញ្ជាក់ថា ចិននឹងរួមដៃគ្នាជាមួយសហគមន៍អន្តរជាតិដើម្បីសម្រេចឲ្យគោលដៅរំសាយអាវុធនុយក្លេអ៊ែរពីឧបទ្វីបកូរ៉េ ហើយចិនក៏បន្តធ្វើកិច្ចសហប្រតិបត្តិការជាមួយអាមេរិក ដើម្បីពង្រឹងទំនាក់ទំនងពាណិជ្ជកម្មទ្វេភាគីដូចគ្នាដែរ។

ទាក់ទងរឿងកូរ៉េខាងជើងនោះ ក្រុងប៉េកាំងបានប្រកាសជាញឹកញាប់ហើយថា ខ្លួនមិនមែនជាអ្នកបង្កបញ្ហា មិនមែនជាអ្នកត្រូវទទួលខុសត្រូវលើបញ្ហា ហើយក៏មិនមែនជាតួអង្គតែមួយគត់ដែលអាចរកច្រកចេញបានដែរ។ ក្រុងប៉េកាំង បានទទូចឲ្យក្រុងវ៉ាស៊ីនតោន និងក្រុងព្យុងយ៉ាង ដែលជាភាគីជម្លោះដោយផ្ទាល់ ត្រូវកាត់បន្ថយទង្វើដែលបង្ករឿងដាក់ភាគីម្ខាងៗ និងត្រូវរក្សាការអត់ធ្មត់ខ្ពស់ សំដៅឈានដល់ការបញ្ចប់បញ្ហា។

យ៉ាងណាក្ដី លោកប្រធានាធិបតី ត្រាំ ចង់ឃើញចិនបង្ហាញសកម្មភាពឲ្យបានច្រើនជាងការនិយាយ ដែលមិនអាចជួយដោះស្រាយបញ្ហាបានឡើយ។ លោកចង់ឲ្យចិនដែលគេឯងដឹងថាពិតជាមានឥទ្ធិពលលើកូរ៉េខាងជើង ប្រាប់មេដឹកនាំកូរ៉េខាងជើងឲ្យស្ដាប់អន្តរជាតិ និងបោះបង់មហិច្ឆតាអភិវឌ្ឍនុយក្លេអ៊ែរចោល។ ប៉ុន្តែចិនហាក់មិនបានអើពើការទទូចម្ដងហើយម្ដងទៀតរបស់អាមេរិក និងបានដោះសាររួចខ្លួនទៅទៀត៕