អន្តរជាតិ
ដូណាល់ ត្រាំ បណ្តេញប្រធានផ្នែកទំនាក់ទំនងសេតវិមាន ក្រោយតែងតាំងប្រហែល ១០ ថ្ងៃ
× ក្រោយកាន់តំណែងមិនទាន់បានដប់ថ្ងៃស្រួលបួលផង នាយកផ្នែកទំនាក់ទំនងប្រចាំសេតវិមានលោក Anthony Scaramucci ត្រូវប្រធានាធិបតី ដូណាល់ ត្រាំ បណ្តេញចេញពីតំណែងទៀតថ្ងៃចន្ទទី៣១ ខែកក្កដា។ មន្ត្រីរូបនេះបាត់បង់តំណែង ក្រោយមានការផ្លាស់ប្តូរនាយកខុទ្ទការល័យនាយករដ្ឋមន្ត្រីសប្តាហ៍មុន ដោយផ្ទេរពីលោក Reince Priebus ទៅឲ្យលោក John Kelly ដែលជាអតីតរដ្ឋមន្ត្រីសន្តិសុខផ្ទៃក្នុងនោះ។
អ្នកនាំពាក្យសេតវិមានលោកស្រី Sarah Huckabee Sanders ដែលទើបឡើងជំនួសតំណែងលោក Sean Spicer បានលើកឡើងក្នុងសន្និសីទសារព័ត៌មានថ្ងៃចន្ទទី ៣១ ខែកក្កថា លោក Anthony Scaramucci លែងកាន់តំណែងជាប្រធានផ្នែកទំនាក់ទំនងសេតវិមានហើយ។
លោកស្រីបានបញ្ជាក់ដូច្នេះថា៖ « លោក Scaramucci នឹងចាកចេញពីតំណែងជានាយកផ្នែកទំនាក់ទំនងប្រចាំសេតវិមាន។ លោក Scaramucci យល់ថា វាជាពេលវេលាល្អបំផុតដែលត្រូវផ្តល់ឱកាសឲ្យប្រធានផ្នែកបុគ្គលិកសេតវិមាន John Kelly ផ្តើមការងារដោយរលូន និងអាចពង្រឹងក្រុមការងារឲ្យបានល្អ។ យើងជូនពរគាត់»។
នេះបញ្ជាក់ថាលោកត្រូវគេបណ្តេញចេញក្រោយកាន់ឡើងតំណែងមិនបានដប់ថ្ងៃស្រួលបួលផង។ សូមរម្លឹកបន្តិចលោក ដូណាល់ ត្រាំ បានសម្រេចតែងតាំងលោក Scaramucci ឲ្យធ្វើជានាយក ផ្នែកទំនាក់ទំនងប្រចាំសេតវិមានថ្ងៃ ២១ ខែកក្កដា ដោយការសម្រេចចិត្តនេះបង្កឲ្យមានរឿងចម្រូងចម្រាសច្រើន។ ចម្រូងចម្រាសត្រង់ថា ការលើកបន្ទុបលោក Scaramucci ធ្វើឲ្យលោក Sean Spicer ជាអ្នកនាំពាក្យសេតវិមាននោះបង្ខំចិត្តចាកចេញតំណែងរបស់ខ្លួនដែរ។
ក្រោយចូលកាន់តំណែងលោក Scaramucci បានទិតៀន និងវាយប្រហារបណ្តាមន្ត្រីនៅក្នុងសេតវិមានរួមទាំងអតីតប្រធានបុគ្គលិកសេតវិមាន Reince Priebus ដែលទើបលោក ត្រាំ បណ្តេញចេញកាលពីសប្តាហ៍មុន និងមន្ត្រីជាន់ខ្ពស់ឯទៀតផង។
គេដឹងថា លោក Scaramucci មានទំនាក់ទំនងជិតស្និទ្ធជាមួយលោក ត្រាំ និងក្រុមគ្រួសារ។ ហើយគេមិនភ្លេចទេថា Ivanka Trump និងស្វាមីខ្លួន Jare Krushner ជាអ្នកជំរុញឲ្យលោក ដូណាល់ ត្រាំ ជ្រើសរើស Scaramucci ជាមន្ត្រីសេតវិមានផងដែរ។
ត្រឡប់មកវិញ ការបណ្តេញលោក Scaramucci ពីតំណែងប្រហែលដប់ថ្ងៃក្រោយការតែងតាំងនេះ អាចជាចំណាត់ការមួយក្នុងការរៀបចំសណ្តាប់ធ្នាប់និងរបៀបរបបការងារក្នុងសេតវិមានឡើងវិញ។ ការសម្រេចចិត្តនេះក៏ជាផ្នែកមួយនៃការស្នើសុំរបស់ប្រធានផ្នែកបុគ្គលិកសេតវិមានថ្មីលោក John Kelly ដែលទើបស្បថចូលកាន់តំណែងដើមសប្តាហ៍នេះនោះ។
នៅព្រឹកថ្ងៃចន្ទលោក បានប្រាប់មន្ត្រីក្រោមឱវាទក្នុងកិច្ចប្រជុំថា លោកមានចេនាដាក់បទបញ្ជាថ្មីនិងរៀបចំវិន័យតឹងរ៉ឹងដែលមិនធ្លាប់មានពីមុន ក្នុងគោលដៅបញ្ចប់បញ្ហាចម្រូងចម្រាសនិងចលាចលដែលកើតឡើងក្នុងសេតរិមានកន្លងមកនោះ៕
Tag:
ដូណាល់ ត្រាំ
John Kelly
Reince Priebus
Anthony Scaramucci
© រក្សាសិទ្ធិដោយ thmeythmey.com