អន្តរជាតិ
រដ្ឋអារ៉ាប់បួនត្រៀមពិភាក្សាជាមួយកាតា បើកាតា ស្មោះត្រង់ និងព្រមគោរពលក្ខខណ្ឌដែលខ្លួនទាមទារ
× រដ្ឋឈូងសមុទ្រទាំងបួនដែលបានផ្តាច់ទំនាក់ទំនង និងហ៊ុមព័ទ្ធកាតាដោយចោទប្រកាន់ថា កាតា ជាអ្នកផ្តល់ហិរញ្ញវត្ថុដល់ក្រុមភេរវករ អះអាងថាខ្លួនចាប់ផ្តើមកិច្ចសន្ទនាទ្វេភាគីជាមួយកាតា បើកាតាសម្ដែងភាពស្មោះត្រង់ដោយបំពេញនូវលក្ខខណ្ឌទាំងដប់បី។ ប៉ុន្តែកាតាអះអាងថា លក្ខខណ្ឌដែលរដ្ឋឈូងសមុទ្រដាក់ឲ្យ គឺជាការបំពានច្បាប់អន្តរជាតិ។
រដ្ឋមន្ត្រីការបរទេសបារ៉ែន អារ៉ាប៊ីសាអូឌីត អេហ្ស៊ីប និងអារ៉ាប់រួមអេមីរ៉ាត់ បានជួបប្រជុំកាលពីចុងសប្តាហ៍មុននៅរាជធានី ម៉ាណាម៉ា ក្នុងគោលបំណងដោះស្រាយភាពតានតឹងនៅក្នុងតំបន់។ រដ្ឋមន្ត្រីការបរទេសរដ្ឋឈូងសមុទ្រទាំងបួនបានលើកឡើងថា ប្រសិនជាកាតាសម្ដែងភាពស្មោះត្រង់ដោយបំពេញនូវលក្ខខណ្ឌទាំង១៣ដែលខ្លួនទាមទារ ពួកគេនឹងផ្តើមកិច្ចសន្ទនាទ្វេភាគីជាមួយកាតាភ្លាម។
រដ្ឋមន្ត្រីការបរទេសបារ៉ែនលោក Sheikh Khalid bin Ahmed al-Khalifa បាននិយាយក្នុងសន្និសីទកាសែតរួមក្រោយកិច្ចប្រជុំដូច្នេះថា៖«ពួកយើងមិនបន្ថែមទណ្ឌកម្មសេដ្ឋកិច្ចទៅលើកាតានោះទេ ហើយកិច្ចសន្ទនាទ្វេភាគីនឹងរៀបចំឡើង ពេលណាកាតាសម្ដែងភាពស្មោះត្រង់ដោយឈប់ឧបត្ថម្ភហិរញ្ញវត្ថុដល់ក្រុមភេរវករ ឈប់លូកលាន់រឿងផ្ទៃក្នុងប្រទេសដទៃ និងបំពេញនូវលក្ខខណ្ឌទាំង១៣ដែលរដ្ឋឈូងសមុទ្របានដាក់ឲ្យ»។
រដ្ឋមន្ត្រីការបរទេសអារ៉ាប៊ីសាអូឌីតលោក Adel al-Jubeir បានបន្ថែមថា ប្រទេសទាំងបួនត្រៀមខ្លួនរួចរាល់ដើម្បីអនុវត្តលក្ខខណ្ឌ និងអនុវត្តគោលការណ៍នានា ប្រសិនជាកាតាប្ដេជ្ញាបំពេញនូវលក្ខខណ្ឌដែលបានដាក់ឲ្យ។ប៉ុន្តែលោកឃើញថា កាតាមិនបានយកចិត្តទុកដាក់នឹងលក្ខខណ្ឌឡើយ។ប្រទេសទាំងបួនក៍បានរួមបញ្ចូលនូវគោលការណ៍ទាំងប្រាំមួយដែលពួកគេមានបំណងឲ្យកាតាទទួលយក។
ដោយឡែក រដ្ឋមន្ត្រីការបរទេសកាតាលោក Sheikh Mohammed bin Abdulrahman al-Thani បានបដិសេដរបាយការណ៍កាលពីថ្ងៃអាទិត្យរបស់រដ្ឋឈូងសមុទ្រទាំងបួន។ លោកបានអះអាងថា លក្ខខណ្ឌរបស់រដ្ឋឈូងសមុទ្រគឺជាការបំពានច្បាប់អន្តរជាតិ។
«កិច្ចប្រជុំកាលពីថ្ងៃអាទិត្យគ្មានចក្ខុវិស័យច្បាស់លាស់នោះទេ វាគ្រាន់តែជាគោលនយោបាយរឹងរូសមួយរបស់រដ្ឋឈូងសមុទ្រ និងជាការបដិសេដទទួលស្គាល់ការពិត ដែលថាលក្ខខណ្ឌរបស់ពួកគេ បំពានច្បាប់អន្តរជាតិ»។ នេះជាសម្ដីរបស់លោក Sheikh Mohammed bin Abdulrahman al-Thaniដែលបានប្រាប់ទៅប៉ុស្ដិ៍ទូរទស្សន៍ Al Jazeera។
កាលពីព្រឹកថ្ងៃអាទិត្យទី៣០ខែកក្កដា ទីភ្នាក់ងារព័ត៌មាន al-Hayat បានស្រង់សម្ដីពីប្រភពរដ្ឋឈូងសមុទ្រដែលមិនមានអត្តសញ្ញាណថា រដ្ឋទាំងបួនមានបំណងដាក់ទណ្ឌកម្មដែលអាចប៉ះពាល់លើសេដ្ឋកិច្ចកាតាបន្តិចម្ដងៗ។
គួរបញ្ជាក់ដែរថា កូវ៉ែតធ្លាប់ទទួលបានការគាំទ្រពីបណ្ដាប្រទេសមហាអំណាចលោកខាងលិចឲ្យដើរតួជាអាជ្ញាកណ្ដាលជួយសម្រុះសម្រួលនិងដោះស្រាយជម្លោះរដ្ឋឈូងសមុទ្រ ប៉ុន្តែចំណាត់ការនេះមិនបានទទួលជោគជ័យនោះទេ៕
Tag:
កាតា
អារ៉ាប៊ីសាអូឌីត
Sheikh Khalid bin Ahmed al-Khalifa
© រក្សាសិទ្ធិដោយ thmeythmey.com