ប៉ូលិសអ៊ីរ៉ាក់រកឃើញលុយជាង៦ម៉ឺនដុល្លារនៅផ្ទះស្ត្រីសុំទានម្នាក់ដែលទើបទទួលមរណភាព

អន្តរជាតិ

ប៉ូលិសអ៊ីរ៉ាក់រកឃើញលុយជាង៦ម៉ឺនដុល្លារនៅផ្ទះស្ត្រីសុំទានម្នាក់ដែលទើបទទួលមរណភាព

01, Aug 2017 , 10:19 pm

រូបភាព

ដោយ: ធីតា

នាប្រតិបត្តិការឆែកឆេរផ្ទះស្ត្រីចំណាស់សុំទានម្នាក់ដែលទើបទទួលមរណភាពនៅទីក្រុង Nadjaf ចម្ងាយប្រមាណ១៦០គីឡូម៉ែត្រ ភាគខាងត្បូងទីក្រុងបាដាដ ប៉ូលិសបានរករូបបិយបណ្ណជាច្រើនប្រភេទ។ តាមរបាយការណ៍ដែលចុះផ្សាយដោយ Sputnik News ទឹកប្រាក់សរុបមានជាង៦៤០០០ដុល្លារអាមេរិក។

ស្ត្រីចំណាស់ម្នាក់ ត្រូវបានគេដឹងជាទូទៅថា ជាអ្នកប្រកបរបរសុំទៅនៅទីក្រុង Nadjaf នៃប្រទេសអ៊ីរ៉ាក់។ កាលពីចុងសប្តាហ៍កន្លងមក គាត់បានទទួលមរណភាពនៅក្នុងផ្ទះជួល។ ប៉ូលិសក្រុង Nadjaf បានចុះទៅដល់ផ្ទះស្ត្រីរូបនោះ ក្រោយទទួលបានសេចក្តីរាយការណ៍ពីពលរដ្ឋ។

នៅពេលឆែកឆេរផ្ទះ សមត្ថកិច្ចក្រុង Nadjaf បានរកឃើញលុយ បណ្ណធនាគារ និងគ្រឿងអលង្កាជាច្រើនដែលច្រកទុកនៅក្នុងថង់ប្លាស្ទិក។ យោងតាមមន្ត្រីប៉ូលិសម្នាក់ លុយទាំងអស់ដោយគិតជាដុល្លារអាមេរិក សរុបជាង៦៤០០០ដុល្លារអាមេរិក។

ក្នុងចំណោមទឹកប្រាក់ប្រមាណ៦៤០០០ដុល្លារអាមេរិកនោះ មានរូបិយបណ្ណ Dinar អ៊ីរ៉ាក់ផ្ទាល់ចំនួន ៧២ ៣២២ ០០០ ក្រៅពីនោះមាន៥៦២ដុល្លារអាមេរិក ៩០រីយ៉ាល់អារ៉ាប៊ីសាអូឌីត ១១៩ផោនលីបង់ ១០អឺរ៉ូ ៣០០ Dinar គូវែត ៤៤០រីយ៉ាល់អ៊ីរ៉ង់ ៧០អាហ្វហ្គានីរបស់អាហ្វហ្គានីស្ថាន ៣២០រូពីប៉ាគីស្ថាន រួមទាំងរូបិយបណ្ណ និងគ្រឿងអលង្ការមាសជាច្រើនទៀត។

ការសុំទាន បានក្លាយជារបរដ៏ពេញនិយមសម្រាប់ស្ត្រី និងកុមារ នៅក្នុងប្រទេសអ៊ីរ៉ាក់ដែលញាំញីដោយសង្គ្រាម ជាពិសេសនៅបាដាត និងក្រុងភាគខាងត្បូងនៃប្រទេស។ ពួកគេទទួលបានប្រាក់ពីសប្បុរសជនមកពីប្រទេសផ្សេងៗគ្នា។ បច្ចុប្បន្នសមត្ថកិច្ចយកលុយរបស់ស្ត្រីនោះរក្សាទុក ហើយសារព័ត៌មាន Sputnik News មិនបានផ្តល់ព័ត៌មានលំអិតទាក់ទងនឹងចាត់ចែងលុយ និងគ្រឿងអលង្កាទាំងនោះនាពេលអនាគតនោះឡើយ៕