អន្តរជាតិ
មហាយក្សចិនគ្រហឹមដាក់អង់គ្លេសដែលគ្រោងបញ្ជូននាវាដឹកយន្តហោះទៅសមុទ្រចិនខាងត្បូង
× មហាយក្សចិនចេញមុខទិតៀនអង់គ្លេស និងជំទាស់ដាច់ខាតចំពោះបំណងបញ្ជូននាវាដឹកយន្តហោះពីរគ្រឿងមកតំបន់ជម្លោះសមុទ្រចិនខាងត្បូងដើម្បីល្បាត និងធានាសេរីភាពនាវាចរណ៍នៅក្នុងតំបន់ជម្លោះនោះ។ ក្រុងប៉េកាំងបញ្ជាក់ថា ខ្លួនមិនពេញចិត្តឡើយ ពេលដែលរដ្ឋក្រៅតំបន់មួយចំនួននៅតែចចេសកកូរកកាយបញ្ហាក្នុងតំបន់ជម្លោះនេះ។
ក្រសួងការបរទេសចិនបានរិះគន់អង់គ្លេសដែលមានគម្រោងបញ្ជូននាវាដឹកយន្តហោះពីរគ្រឿងទៅកាន់តំបន់ជម្លោះសមុទ្រចិនខាងត្បូង ក្នុងគោលបំណងចូលរួមធានាសេរីភាពនៃការធ្វើនាវាចរណ៍។ តាមពិតទៅ ចេតនានេះគឺដើម្បីធ្វើឲ្យចិនពិបាកពង្រីកដែនដីទឹកក្នុងតំបន់ជម្លោះដែលជាផ្លូវទឹកយុទ្ធសាស្ដ្រនេះឡើយ។
«ប្រទេសក្រៅតំបន់មួយចំនួននៅតែចចេសរឹងរូស ព្យាយាមលូកដៃកកូរកកាយបញ្ហាក្នុងតំបន់ជម្លោះដែលមានស្ថានភាពស្ងប់សុខមួយរយៈហើយនោះ»។ នេះជាសម្ដីរបស់អ្នកនាំពាក្យក្រសួងការបរទេសចិនលោក Lu Kang ដែលឆ្លើយតបទៅនឹងសំនួរ អ្នកសារព័ត៌មានពាក់ព័ន្ធសម្តីមន្ត្រីអង់គ្លេស។
អ្នកនាំពាក្យរូបនេះបានបន្តទៀតថា ទោះប្រទេសណាក៏ដោយ ជាសកម្មភាពល្បាតក៏ដោយ និងប្រើប្រាស់ហេតុផលអ្វីក៏ដោយ ការជ្រៀតជ្រែកចូលក្នុងរឿងផ្ទៃក្នុងតំបន់ប្រទេសដទៃ និងបង្កឲ្យមានភាពវឹកវរ និងវិបត្តិមនុស្សជាតិនោះនឹងធ្វើឲ្យប្រទេសក្នុងតំបន់ប្រុងប្រយ័ត្នខ្ពស់។
ដោយឡែក ក្នុងកិច្ចប្រជុំថ្នាក់ខ្ពស់រវាងលោករដ្ឋមន្ត្រីការទូតអង់គ្លេសBoris Johnsonនិងសមភាគីអូស្ដ្រាលីអ្នកស្រីJulie Bishop លោកJohnson បានបញ្ជាក់ថា រឿងដំបូងបង្អស់ដែលអង់គ្លេសត្រូវធ្វើគឺបញ្ជូននាវាដឹកយន្តហោះខ្នាតធំទៅកាន់តំបន់សមុទ្រចិនខាងត្បូង។ ការបញ្ជូននាវានេះបង្ហាញពីការគាំទ្រប្រព័ន្ធគ្រប់គ្រងផ្អែកលើច្បាប់អន្តរជាតិ និងការការពារសេរីភាពនាវាចរណ៍នៅក្នុងតំបន់សមុទ្រចិនខាងត្បូងដែលជាផ្លូវទឹកដ៏សំខាន់សម្រាប់ពាណិជ្ជកម្មពិភពលោកនោះ។
ទោះជាយ៉ាងនេះក្ដី រដ្ឋមន្ត្រីក្រសួងការពារជាតិអង់គ្លេសលោក Michael Fallon បានអះអាងថា អង់គ្លេសមិនទាន់សម្រេចនៅឡើយទេពាក់ព័ន្ធគម្រោងដាក់ពង្រាយនាវាចម្បាំងខ្លួនទៅកាន់តំបន់ជម្លោះសមុទ្រចិនខាងត្បូងនោះ។
គួរបញ្ជាក់ដែរថា កន្លងមកចិនមិនពេញចិត្តយ៉ាងខ្លាំងចំពោះវត្តមាននាវាកងទ័ពជើងទឹក អាមេរិក ជប៉ុន អូស្ដ្រាលី និងប្រទេសដទៃទៀតក្នុងផ្លូវទឹកសមុទ្រចិនខាងត្បូងដោយប្រទេសទាំងនេះអះអាងថា ការប្រើប្រាស់ផ្លូវទឹកសមុទ្រចិនខាងត្បូងជាការអនុវត្តសេរីភាពនាវាចរណ៍សមុទ្រ។ជារៀងរាល់ឆ្នាំ ទំហំពាណិជ្ជកម្មប្រចាំឆ្នាំដែលឆ្លងកាត់តាមផ្លូវទឹសមុទ្រចិនខាងត្បូងទៅវិញទៅមកមានរហូតដល់ ៥ ទ្រីលានដុល្លារអាមេរិកឯណោះ៕
Tag:
ចិន
អង់គ្លេស
សមុទ្រចិនខាងត្បូង
Lu Kang
Boris Johnson
© រក្សាសិទ្ធិដោយ thmeythmey.com