ពីនេះ ពីនោះ
ព័ត៍មានសុខភាព
អាការៈភ្លាមៗរបស់ជំងឺមហារីកលើមនុស្សប្រុស ដែលអ្នកត្រូវតែចាប់អារម្មណ៍
× ជំងឺមហារីកគឺជាមូលហេតុដែលនាំឲ្យមនុស្សប្រុសពេញវ័យស្លាប់ច្រើនជាងគេនៅទូរទាំងពិភពលោក។ ខណៈពេលដែលរបបអាហារផ្តល់សុខភាពអាចបន្ថយការប្រឈមនឹងជំងឺមហារីកក៏ដោយ តែមានកត្តាផ្សេងៗទៀតច្រើនណាស់ដូចជា ហ្សែន ក៏ធ្វើឲ្យប្រឈមមុខខ្ពស់ដែរ។ នៅពេលមហារីករាលដាលទៅកន្លែងផ្សេងហើយ វាគឺជាពេលវេលាមួយដែលពិបាកព្យាបាលបំផុត។
ការយល់ដឹងអំពីអាការៈភ្លាមៗរបស់ជំងឺនេះអាចជួយអ្នកស្វែងរកការព្យាបាលកាន់តែលឿន ដើម្បីមានឱកាសជាសះស្បើយកាន់តែខ្ពស់បាន។ ជាមួយគ្នានេះដែរ រោគសញ្ញាភ្លាមៗរបស់ជំងឺមហារីកលើមនុស្សប្រុសមានដូចជា៖
ការប្រែប្រួលរបៀបនៃការបន្ទោបង់
ការដែលមានបញ្ហាលើការបន្ទោបង់ម្តងម្កាលគឺជារឿងធម្មតាទេ ប៉ុន្តែការប្រែប្រួលចំពោះរបៀបនៃការបន្ទោបង់អាចបញ្ជាក់ថា អាចមានមហារីកពោះវៀនធំ ឬចុងពោះវៀនធំបាន។ ការដែលឧស្សាហ៍រាករូស និងទល់លាមក អាចជាសញ្ញាមួយនៃជំងឺមហារីក ជាពិសេសបើសិនជាវាកើតឡើងភ្លាមៗ។ បញ្ហាទាំងនេះក៏អាចកើតឡើងជាមួយនឹង ការឧស្សាហ៍ផោម និងឈឺក្នុងពោះដែរ។
ហូរឈាមតាមរន្ធគូថ
ការហូរឈាមតាមរន្ធគូថអាចជាសញ្ញាភ្លាមៗនៃជំងឺមហារីកចុងពោះវៀនធំ។ រឿងដែលគួរបារម្ភជាពិសេសនោះគឺការហូរឈាមជាប់រហូត ឬមានការកង្វះគ្រាប់ឈាមដោយសារតែបាត់បង់ឈាមតែម្តង។ អ្នកក៏ប្រហែលជាអាចសម្គាល់ឃើញឈាមនៅក្នុងលាមកផងដែរ។
ថ្វីបើមានមូលហេតុផ្សេងៗទៀតដែលនាំឲ្យហូរឈាមតាមរន្ធគូថក៏ដោយ តែអ្នកក៏គួរតែឲ្យពេទ្យពិនិត្យដើម្បីបំបាត់ចម្ងល់ដែរ។ ការពិនិត្យពោះវៀនធំគួរតែចាប់ផ្តើមនៅពេលអាយុ ៥០ឆ្នាំឡើងទៅ។
ប្រែប្រួលទឹកនោម
ការនោមដោយមិនដឹងខ្លួន និងការប្រែប្រួលចំពោះទឹកនោមផ្សេងទៀតអាចនឹងកើតឡើងនៅពេលអាយុកាន់តែច្រើន។ យ៉ាងណាមិញ មានអាការៈច្រើនណាស់ដែលអាចគិតថាជាជំងឺមហារីកក្រពេញប្រូស្តាត។ បញ្ហាទាក់ទងនឹងទឹកនោមមានដូចជា៖
• លេចទឹកនោមដោយមិនឹងខ្លួន
• មិនអាចនោមបានទោះបីជាចង់នោមខ្លាំហើយក៏ដោយ
• ត្រូវការប្រឹងនៅពេលនោម
ឈាមក្នុងទឹកនោម
បើសិនជាអ្នករកឃើញមានឈាមក្នុងទឹកនោម នោះអាចជាសញ្ញាមួយនៃជំងឺមហារីកប្លោកនោមហើយ។ មហារីកប្រភេទនេះច្រើនតែកើតមានជាញឹកញាប់ចំពោះអ្នកជក់បារី។ សម្រាប់ការរលាកក្រពេញប្រូស្តាត មហារីកក្រពេញប្រូស្តាត និងការបង្ករោគនៅផ្លូវទឹកម៉ូត្រក៏អាចបង្កជាឈាមតាមទឹកនោមដែរ។
ឈឺខ្នងជាប់
ការដែលឈឺខ្នងគឺជាបញ្ហាដែលកើតមានជាញឹកញាប់សម្រាប់មនុស្សទូទៅ។ យ៉ាងណាមិញ បើសិនជាអ្នកមានជំងឺមហារីកក្រពេញប្រូស្តាតរាលដាលនោះ ឆ្អឹងខ្នងជាជម្រើសដំបូងគេហើយនៃការរាលដាលរបស់ជំងឺមហារីកមួយនេះ ដែលជាហេតុធ្វើឲ្យអ្នកឈឺខ្នងជាប់។
ក្អកខុសធម្មតា
ការដែលក្អកជាប់រហូតគឺជាសញ្ញាភ្លាមនៃជំងឺមហារីកសួត។ បើសិនជាអ្នកមិនមានអាការៈពាក់ព័ន្ធបន្ថែមដូចជា តឹងច្រមុះ ឬក្តៅខ្លួនទេ ការក្អកនោះគឺមិនមែនបង្កឡើងដោយវីរុស ឬបាក់តេរីឡើយ។ ការក្អកដែលមានស្លេសជាឈាមក៏ជាប់ទាក់ទងនឹងមហារីកសួតលើមនុស្សប្រុសដែរ។
មានដុំនៅក្នុងពងស្វាស
ជំងឺមហារីកពងស្វាសលើមនុស្សប្រុសមិនសូវជាកើតឡើងច្រើនដូចមហារីកក្រពេញប្រូស្តាត សួត និងពោះវៀនធំទេ។ ប៉ុន្តែអ្នកក៏មិនត្រូវមិនខ្វល់អំពីរោគសញ្ញារបស់វាដែរ ជាពិសេសនៅពេលមានដុំសាច់អ្វីមួយខុសធម្មតាក្នុងពងស្វាស។
អស់កម្លាំងខ្លាំង
ការអស់កម្លាំងអាចទាក់ទងនឹងជំងឺរ៉ាំរ៉ៃមួយចំនួនដែរ។ ប៉ុន្តែការអស់កម្លាំងខ្លាំងក្លាគឺជារបៀបដែលរាងកាយកំពុងតែប្រាប់អ្នកថា មានអ្វីមួយកើតឡើងខុសប្រក្រតីហើយ។ កោសិកាមហារីកដែលលូតលាស់ និងបង្កើតកូនចៅច្រើន វានឹងធ្វើឲ្យរាងកាយមិនអាចធន់នឹងវាបានឡើយ។
ការអស់កម្លាំងគឺជាអាការៈញឹកញាប់មួយនៃជំងឺមហារីកភាគច្រើន។ ដូច្នេះចូរទៅជួបគ្រូពេទ្យភ្លាមទៅបើសិនជាអ្នកយល់ថាខ្លួនឯងអស់កម្លាំងខ្លាំង ហើយមិនបាត់ទៅវិញទោះបីជាគេងលក់ស្កប់ស្កលហើយក៏ដោយ។
ស្រកទម្ងន់ដោយមិនដឹងមូលហេតុ
កាលណាអាយុកាន់តែច្រើន វាកាន់តែពិបាកក្នុងការថែរក្សាទម្ងន់។ ទោះបីជាយ៉ាងណាក៏ដោយ ការស្រកទម្ងន់ភ្លាមៗ និងដោយមិនដឹងមូលហេតុអាចជាសញ្ញាបញ្ជាក់អំពីបញ្ហាសុខភាពធ្ងន់ធ្ងរ ហើយក្នុងនោះច្រើនតែជាមហារីកតែម្តង។
មានដុំសាច់ក្នុងដោះ
ជំងឺមហារីកសុដន់មិនមែនមានតែលើមនុស្សស្រីឡើយ គឺបុរសក៏ជាបេក្ខជនមួយដែរ។ ដូច្នេះបើសិនជាអ្នករកឃើញមានដុំអ្វីមួយកើតឡើងក្នុងដោះ យកល្អគួរតែទៅជួបគ្រូពេទ្យដើម្បីពិនិត្យភ្លាមទៅ។
ទាក់ទងនឹងចំណុចនេះដែរ ហ្សែនអាចដើរតួនាទីដ៏សំខាន់មួយចំពោះជំងឺមហារីកសុដន់មនុស្សប្រុសដែរ ប៉ុន្តែវាក៏មិនមែនកើតឡើងដោយសារតែការប៉ះពាល់នឹងកាំរស្មី ឬមានអ័រម៉ូនភេទស្រីខ្ពស់ឡើយ។ ដុំសាច់ក្នុងដោះភាគច្រើនកើតឡើងលើបុរសអាយុចាប់ពី ៦០ឆ្នាំឡើង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com