អន្តរជាតិ
មហាយក្សចិនសន្យាជួយហ្គំប៊ី ដែលព្រមបោះបង់ចោលតៃវ៉ាន់ ហើយរត់មករកខ្លួន
× ក្រុងប៉េកាំងបានប្រកាសផ្តល់ជំនួយគាំទ្រដល់ហ្គំប៊ី ក្រោយរដ្ឋអាហ្វ្រិកខាងលិចនេះសុខចិត្តផ្ដាច់ទំនាក់ទំនងជាមួយតៃវ៉ាន់ ហើយងាកមកស្ដារសម្ព័ន្ធភាពជាមួយចិនវិញឆ្នាំមុន។ ចិនសន្យាជួយអភិវឌ្ឍហេដ្ឋារចនាសម្ព័ន្ធរូបវ័ន្ត វិស័យកសិកម្ម ទេសចរណ៍ និងវិស័យសំខាន់ៗផ្សេងទៀតផងដែរ។
រដ្ឋាភិបាលហ្គំប៊ីថ្មីដែលគ្រប់គ្រងបន្តពីអតីតប្រធានាធិបតី Yahya Jammeh បានបញ្ចប់ទំនាក់ទំនងជាផ្លូវការជាមួយតៃវ៉ាន់ដែលជាមិត្តចាស់របស់ខ្លួន ហើយរត់ទៅស្តារចំណងមិត្តភាពជាមួយមហាយក្សចិនវិញកាលពីឆ្នាំមុន។ វាជាថ្នូរនឹងការសន្យារបស់ក្រុងប៉េកាំងដែលថា ខ្លួននឹងផ្តល់ជំនួយឧបត្ថម្ភជាច្រើនផ្នែកដល់ហ្គំប៊ីផង។
ថ្ងៃអង្គារ ទី១ ខែសីហា រដ្ឋមន្ត្រីការបរទេសចិនលោក វ៉ាង យី (Wang Yi) បានប្រាប់ទៅរដ្ឋមន្ត្រីការបរទេសហ្គំប៊ីលោក Ousainou Darboe ដែលបំពេញទស្សនកិច្ចនៅចិនថា ចិននឹងផ្ដល់ជួយគាំទ្រហ្គំប៊ីអភិវឌ្ឍហេដ្ឋារចនាសម្ព័ន្ធ វិស័យកសិកម្ម វិស័យទេសចរណ៍ និងវិស័យផ្សេងៗទៀតដែរ។
យោងតាមទីភ្នាក់ងារព័ត៌មាន Reuters លោក វ៉ាង យី បានពោលឡើងដូច្នេះថា៖«ចិនត្រៀមខ្លួនរួចរាល់ដើម្បីពង្រឹងកិច្ចសហប្រតិបត្តិការជាមួយហ្គំប៊ីលើផ្នែកហេដ្ឋារចនាសម្ព័ន្ធ វិស័យកសិកម្ម ទេសចរណ៍ និងផ្នែកផ្សេងៗទៀតដែរ»។
បច្ចុប្បន្នក្រុមហ៊ុនចិនក៏កំពុងតែប្រជែងជាមួយក្រុមហ៊ុនបារាំងដើម្បីដណ្ដើមគ្នាជួយហ្គំប៊ីសង់កំពង់ផែAtlantic ក្នុងក្រុងបង់ហ្ស៊ុល ដែលវានឹងក្លាយជាគូប្រជែងកំពង់ផែក្រុងដាកា ប្រទេស សេណេហ្កាល់។
លោក វ៉ាង យី បានបន្ថែមទៀតថា ការសហការឡើងវិញរវាងហ្គំប៊ី និងចិនមិនត្រឹមតែស្ដារទំនាក់ទំនងប្រទេសពីរនេះឲ្យល្អដូចមុនតែប៉ុណ្ណោះទេ ថែមទាំងផ្ដល់ឱកាសច្រើនចំពោះកិច្ចសហប្រតិបត្តិការទៀតផង។ ម្យ៉ាងវិញទៀត ជំនួយនេះអាចនិយាយបានថា វាជាការផ្លាស់ប្ដូរដ៏ធំមួយនៃរចនាសម្ព័ន្ធនៅហ្គំប៊ី ចាប់តាំងពីមានការគ្រប់គ្រងរបស់មេដឹកនាំផ្តាច់ការ Yahya Jammeh អស់រយៈពេល ២០ឆ្នាំ កន្លងមក។
រដ្ឋមន្ត្រីការបរទេសហ្គំប៊ីវិញបានអះអាងថា ហ្គំប៊ីនឹងគោរព«គោលនយោបាយចិនតែមួយ» និងទន្ទឹងរង់ចាំការសហការជាមួយចិនគ្រប់វិស័យ។ ទោះជាយ៉ាងនេះក្ដី តៃវ៉ាន់ក៏បានប្រឹងប្រែងទាក់ទង និងបញ្ចុះបញ្ចូលឲ្យរដ្ឋាភិបាល ហ្គំប៊ីថ្មី ផ្លាស់ប្ដូរគោលនយោបាយដែរ។
សូមរម្លឹកបន្តិចថា ប្រទេសសៅតូម៉េ និងប្រាំងស៊ីបក៏បានផ្ដាច់ទំនាក់ទំនងជាមួយតៃវ៉ាន់ដូចហ្គំប៊ីដែរ។បច្ចុប្បន្នតៃវ៉ាន់នៅសល់តែបូគីណាហ្វាសូ និងស្វាស៊ីឡង់ប៉ុណ្ណោះដែលជាសម្ព័ន្ធមិត្តនៅអាហ្វ្រិក។
តាមពិតទៅ ចិនបានដាក់សម្ពាធលើតៃវ៉ាន់ចាប់តាំងពីពេលប្រធានាធិបតីតៃវ៉ាន់ Tsai Ing-wen ឡើងកាន់តំណែងកាលពីឆ្នាំមុនមកម្ល៉េះ។ចិនបានបញ្ជាក់យ៉ាងច្បាស់ថា ចិនមិនដែលគាំទ្រ និងពេញចិត្តតៃវ៉ាន់ឡើយ៕
Tag:
តៃវ៉ាន់
ចិន
ហ្គំប៊ី
© រក្សាសិទ្ធិដោយ thmeythmey.com