ជនជាតិអាល្លឺម៉ង់ម្នាក់ផលិតសាច់សត្វឲ្យទៅជាភេសជ្ជៈសម្រាប់អ្នកពិបាកទំពារ និងអ្នកដើរតាមផ្លូវ

សុខភាព

អន្តរជាតិ

ជនជាតិអាល្លឺម៉ង់ម្នាក់ផលិតសាច់សត្វឲ្យទៅជាភេសជ្ជៈសម្រាប់អ្នកពិបាកទំពារ និងអ្នកដើរតាមផ្លូវ

02, Aug 2017 , 9:39 pm

រូបភាព

ដោយ: ធីតា

អ្នកលក់សាច់សត្វជនជាតិអាល្លឺម៉ង់ម្នាក់ បានច្នៃប្រឌិតយកសាច់សត្វកិនទៅជាភេសជ្ជៈដើម្បីផ្តល់ភាពងាយស្រួលដល់មនុស្សចាស់ ជាពិសេសអ្នកដែលមានបញ្ហាលើការទំពារចំណីអាហារ។ នេះបើតាមការផ្សាយរបស់កាសែតអាល្លឺម៉ង់ Die Welt។

លោក Peter Klassen អ្នកកាប់សាច់លក់ជនជាតិ ជនជាតិអាល្លឺម៉ង់ បានរកឃើញដំណោះស្រាយដ៏ល្អប្រសើរមួយសម្រាប់អ្នកដែលចូលចិត្តញ៉ាំសាច់ ប៉ុន្តែមិនមានធ្មេញទំពារគ្រប់គ្រាន់។ លោកបានច្នៃសាច់សត្វទាំងនោះ ឲ្យទៅជាភេសជ្ជៈ ដោយរក្សារសជាតិ និងគុណភាពដូចដើម។

កាសែតអាល្លឺម៉ង់ បានអះអាងថា លោក Klassen នឹងដាក់លក់ភេសជ្ជៈពីសាច់សត្វចំនួនបីប្រភេទចាប់ខែកញ្ញា ខាងមុខក្នុងនោះរួមមាន Butcher Beef, Beef Bombay និង Royal Chicken។ «វាជាប្រភេទម្ហូបអាហារទឹកសម្រាប់មនុស្សដែលកំពុងធ្វើដំណើរ ក៏ដូចជាវិចិត្រករ អ្នកនៅតាមផ្លូវ ឬអត្តពលិកជាដើម ជាពិសេសមនុស្សចាស់»។ លោក Klassen បានបញ្ជាក់យ៉ាងដូច្នេះ។

បុរសជនជាតិអាល្លឺម៉ង់រូបនេះ បានអះអាងថា ខ្លួនវិនិយោគទឹកប្រាក់ក្នុងរង្វង់១លានអឺរ៉ូ លើអាជីវកម្មនេះ ដោយវាមិនតម្រូវឲ្យមានទីតាំងធំពេកនោះឡើយ។ លោក Klassen បានបញ្ជាក់ថា លោកបានចរចាត្រូវរ៉ូវគ្នាហើយជាមួយដៃគូចែកចាយនៅលុចសំបួរ បែលហ្ស៊ិក និងបារាំង ហើយលោករំពឹងថា វានឹងក្លាយជាតម្រូវការនៅលើពិភពលោក។

បច្ចុប្បន្ន លោកអាចផលិតបានចំនួន១ម៉ឺនដបក្នុង១សប្តាហ៍ ហើយមានគម្រោងពង្រីកឲ្យបាន៣ម៉ឺនដបក្នុងសប្តាហ៍។ ភេសជ្ជៈពីសាច់សត្វរបស់លោក Klassen អាចរក្សាទុកបាន១ឆ្នាំ៕