អន្តរជាតិ
ហ្វីលីពីនពង្រាយកម្លាំងជាង១ម៉ឺននាក់ ការពារសុវត្ថិភាពប្រតិភូ ១៧០០នាក់ចូលរួមប្រជុំអាស៊ាន រូបភាព៖ Rappler
× ហ្វីលីពីនប្ដេជ្ញាពង្រឹងសន្តិសុខនិងទប់ស្កាត់រាល់ចលនាភេរវកម្មដែលអាចធ្វើឲ្យប៉ះពាល់សុវត្ថិភាពបណ្តាមន្ត្រីជាន់ខ្ពស់ដែលមកចូលរួមក្នុងកិច្ចប្រជុំអាស៊ាន និង កិច្ចប្រជុំពាក់ព័ន្ធដែលនឹងរៀបចំឡើងចាប់ពីថ្ងៃទី ២ដល់៨ ខែសីហា ក្នុងទីក្រុងម៉ានីល។ ប្រតិភូពិសេសដែលនឹងមកចូលរួមប្រជុំមាន រដ្ឋមន្ត្រីការបរទេសមកពីប្រទេសចំនួន ២៧ និងមន្ត្រីថ្នាក់ខ្ពស់ជាច្រើនរូបទៀតផង។
កាលពីថ្ងៃអង្គារ ក្នុងសន្និសីទសារព័ត៌មានវិមានប្រធានាធិបតី ប្រធានការិយាល័យប៉ូលីសក្រុងម៉ានីល លោក Oscar Albayalde បានបញ្ជាក់ថា ហ្វីលីពីនរៀបចំពង្រឹងសន្តិសុខឲ្យតឹងរ៉ឹងចាប់តាំងពីឆ្នាំមុនមកម្ល៉េះ ហើយលោកជឿជាក់ថា វានឹងជួយធានាឲ្យបាននូវសុវត្ថិភាពសម្រាប់បណ្តារដ្ឋមន្ត្រីនិងប្រតិភូបរទេសគ្រប់រូបដែលមកចូលរួមប្រជុំ។
កងសន្តិសុខប្រមាណ ១៣ ពាន់នាក់រួមជាមួយកងកម្លាំងចំនួន ១២៨៦នាក់ផ្សេងទៀតមកពីទីភ្នាក់ងារផ្សេងៗនឹងត្រូវដាក់ពង្រាយក្នុងអំឡុងពេលសប្ដាហ៍នៃកិច្ចប្រជុំ។ ក្រុមសន្តិសុខភាគច្រើននឹងត្រូវដាក់ពង្រាយនៅតំបន់ Pasay, Parañaque និង Makati។ មូលហេតុមកពីប្រតិភូបរទេសដែលមានវត្តមានក្នុងកិច្ចប្រជុំនឹងសម្រាកនៅសណ្ឋាគារមួយចំនួនក្នុងតំបន់ខាងលើ ហើយកិច្ចប្រជុំអាស៊ានក៏នឹងរៀបចំក្នុងតំបន់ខាងលើដូចគ្នាដែរ។
អាជ្ញាធរអភិវឌ្ឍន៍ក្រុងម៉ានីលនឹងទទួលបន្ទុកមើលថែទាំនិងអនុវត្តបទបញ្ញត្តិពាក់ព័ន្ធការធ្វើចរាចរណ៍ហើយនិងការបិទផ្លូវ។ ចំណែកឯប៉ូលិសវិញ ត្រូវធានាឲ្យបានថា វានឹងគ្មានសកម្មភាពស្រដៀងនឹងអំពើភេរវកម្មកើតឡើងនោះទេក្នុងអំឡុងពេលសប្ដាហ៍នៃកិច្ចប្រជុំនេះ។
លោក Albayalde បានរម្លឹកផងដែរពីការបំផ្ទុះគ្រាប់បែកក្នុងសង្កាត់ Quiapo ដែលកើតឡើងអំឡុងសប្ដាហ៍កិច្ចប្រជុំកំពូលអាស៊ានលើកទី ៣០ កាលពីខែមេសាកន្លងមក។
ក្រុមប៉ូលិសកំពុងតែឃ្លាំមើលក្រុមមួយចំនួនក្នុងទីក្រុងម៉ានីលដែលពួកគេអាចធ្វើសកម្មភាពវាយប្រហារបាន ជាពិសេសប្រជាជនហ្វីលីពីនប្តូរទៅកាន់សាសនាឥស្លាម រួមទាំងអតីតសមាជិកក្រុមឃាតករ Alex Boncayao Brigade ៕
លើសពីនេះទៅទៀត ប៉ូលិសក៏បានឃ្លាំមើលតំបន់ទីប្រជុំចម្រុះពូជសាសន៍មួយចំនួនដែលសម្បូរដោយឧក្រិដ្ឋជនដូចជាសង្កាត់ Maharlika Villageក្នុងTaguig Quiapo និងBasecoនៅទីក្រុងម៉ានីល៕
Tag:
ហ្វីលីពីន
Oscar Albayalde
ភេរវកម្ម
អាស៊ាន
© រក្សាសិទ្ធិដោយ thmeythmey.com