អន្តរជាតិ
សមាជិកព្រឹទ្ធសភាអាមេរិក៖ បើសង្គ្រាមផ្ទុះនៅឧបទ្វីបកូរ៉េ អ្នកស្លាប់នៅទីនោះ មិនមែននៅអាមេរិកទេ សមាជិកព្រឹទ្ធសភាអាមេរិកបក្សសាធារណរដ្ឋ លោក Lindsey Graham (រូបភាព AFP)
× សមាជិកព្រឹទ្ធសភាអាមេរិក លោក Lindsey Graham និយាយថា ជម្រើសផ្នែកយោធានៅតែស្ថិតក្នុងការពិចារណាក្នុងការទប់ស្កាត់កម្មវិធីនុយក្លេអ៊ែររបស់កូរ៉េខាងជើង និងបញ្ចប់មហិច្ឆតារបស់លោក គីម ជុងអ៊ុន ។ សមាជិកព្រឹទ្ធសភាអាមរិករូបនេះបញ្ជាក់ថា លោកប្រធានាធិបតី ដូណាល់ ត្រាំ មិនបានបោះបង់ជម្រើសយោធានេះទេ ប៉ុន្តែលោក ត្រាំ ក៏មិនចង់ឃើញសង្គ្រាមផ្ទុះឡើងនៅឧបទ្វីបកូរ៉េដែរ ព្រោះមហន្តរាយពិតជាពិបាកស្មានណាស់។
ក្រោមរដ្ឋបាលប្រធានាធិបតី ដូណាល់ ត្រាំ ជម្រើសផ្នែកយោធាប្រឆាំងកូរ៉េខាងជើងបានកើនឡើងខ្ពស់ ដ្បិតលោក ត្រាំ ហាក់មិនពេញចិត្តការចរចា និងទណ្ឌកម្មរបស់អង្គការសហ ប្រជាជាតិដែលលោកយល់ថា មិនមានប្រសិទ្ធភាពរារាំងកូរ៉េខាងជើងពីការបន្តកម្មវិធីនុយក្លេអ៊ែរបាន។ មន្ត្រីសំខាន់របស់លោក និងសមាជិកព្រឹទ្ធសភាខ្លះ ដែលមានជំហរតឹងរ៉ឺង បានគាំទ្រគំនិតក្នុងការប្រើប្រាស់កម្លាំងយោធាដើម្បីបញ្ចប់មហិច្ឆតារបស់កូរ៉េខាងជើងដែរ។
ក្នុងកិច្ចសម្ភាសជាមួយទូរទស្សន៍ NBC នៅថ្ងៃទី១ ខែសីហា លោក Lindsey Graham សមាជិកព្រឹទ្ធសភាអាមេរិកមកពីរដ្ឋ North Carolina និយាយថា ជម្លោះរវាងអាមេរិក និងកូរ៉េខាងជើង ទំនងចៀសមិនផុតទេ បើកូរ៉េខាងជើងនៅតែបន្តអភិវឌ្ឍកម្មវិធីនុយក្លេអ៊ែរ និងមីស៊ីលដែលអាចបាញ់ដល់ទឹកដីអាមេរិកនោះ។ លោក Graham និយាយទៀតថា លោក ត្រាំ បានប្រាប់ពីលោកបំណងក្នុងការប្រើប្រាស់យោធាកម្ទេចកូរ៉េខាងជើង ព្រោះលោកមិនអនុញ្ញាតឲ្យមានមីស៊ីលហោះមកទឹកដីអាមេរិកទេ។
សមាជិកព្រឹទ្ធសភាមកពីបក្សសាធារណរដ្ឋរូបនេះបានរំឭកសម្ដីលោក ត្រាំ ថា៖ «ប្រសិនបើមានសង្គ្រាមដើម្បីបញ្ឈប់លោក គីម ជុងអ៊ុន សង្គ្រាមនឹងផ្ទុះឡើងនៅឧបទ្វីបកូរ៉េ។ ប្រសិនបើមានស្លាប់មែន ក៏ស្លាប់នៅទីនោះដែរ មិនមែនស្លាប់នៅលើទឹកដីអាមេរិកទេ»។ លោក Graham បន្ថែមថា សម្ដីនេះអាចជាការបង្ករឿង តែនៅពេលអ្នកកាន់តំណែងជាប្រធានាធិបតីអាមេរិក អ្នកត្រូវតែការពារប្រជាជនអាមេរិក។
បើតាមការលើកឡើងរបស់លោក Graham ជម្រើសផ្នែកយោធានៅតែអាចបោះបង់បាន ព្រោះកូរ៉េខាងជើងមិនបានបង្ហាញឆន្ទៈបញ្ឈប់ការភិវឌ្ឍមីស៊ីលរបស់ខ្លួនទេ មានតែបង្កើនសមត្ថភាពកាន់តែខ្លាំងឡើងដើម្បីគំរាមអាមេរិក។ សង្គ្រាមពិតជារឿងអាចកើតឡើងដោយចៀសមិនផុត បើកូរ៉េខាងជើងនៅតែចចេសរឹងរូស ព្រោះនេះជាការបង្ខំឲ្យលោក ត្រាំ ជ្រើសរើសរវាងសន្តិសុខតំបន់ និងសន្តិសុខរបស់អាមេរិកផ្ទាល់។
សូមបញ្ជាក់ថា គ្រាន់តែខែកក្កដាមួយ កូរ៉េខាងជើងបានសាកល្បងមីស៊ីលរំលងទ្វីបដល់ទៅពីរលើក ហើយគេជឿថា មីស៊ីលនោះមានសមត្ថភាពវាយប្រហារគោលដៅជាច្រើនរបស់អាមេរិក។ បន្ទាប់ពីនេះ ប្រមុខយោធាអាមេរិក Joseph Dunford ក៏បានជជែកគ្នាពីជម្រើសផ្នែកយោធាប្រឆាំងកូរ៉េខាងជើងជាមួយសមភាគីកូរ៉េខាងត្បូងដែរ។ កូរ៉េខាងជើងចាត់ទុកការបាញ់នេះ គឺជាជោគជ័យ និងជាការព្រមានអាមេរិកផងដែរ៕
Tag:
អាមេរិក
ឧបទ្វីបកូរ៉េ
Lindsey Graham
© រក្សាសិទ្ធិដោយ thmeythmey.com