អន្តរជាតិ
ហ្វីលីពីន៖ ឧក្រិដ្ឋជនគ្រឿងញៀន ៣២ នាក់ស្លាប់ក្នុងប្រតិបត្តិការបង្ក្រាបគ្រឿងញៀនត្រឹមមួយថ្ងៃ រូបភាព៖ Reuters
× ឧក្រិដ្ឋជនគ្រឿងញៀន ៣២ នាក់បានស្លាប់នៅថ្ងៃចន្ទទី ១៤ ខែសីហា ក្នុងអំឡុងពេលប្រតិបត្តិការបង្ក្រាបគ្រឿងញៀនទ្រង់ទ្រាយធំនៅខេត្ត Bulacan។ អាជ្ញាធរតំបន់បាននិយាយថា ចាប់តាំងសង្គ្រាមគ្រឿងញៀនចាប់ផ្តើមនៅខែមិថុនាឆ្នាំមុនមក វាជាថ្ងៃដែលឧក្រិដ្ឋជននិងឈ្មួញគ្រឿងញៀនស្លាប់ច្រើនជាងគេបង្អស់។
ប្រធាននាយកដ្ឋានប៉ូលិសខេត្ត Bulacan លោក Romeo M. Caramat Jr បាននិយាយនៅថ្ងៃអង្គារទី១៤ ខែសីហាថា ប្រតិបត្តិការបង្ក្រាបគ្រឿងញៀនជាបន្តបន្ទាប់នៅថ្ងៃចន្ទទី ១៤ ខែសីហានោះចាប់ខ្លួនឧក្រិដ្ឋជនគ្រឿងញៀនចំនួន១០៩ នាក់ និងបណ្តាលឲ្យមនុស្ស ៣២នាក់ ផ្សេងទៀតស្លាប់។
យោងតាមទីភ្នាក់ងារព័ត៌មាន AFP មន្ត្រីប៉ូលិសជាន់ខ្ពស់ប្រចាំតំបន់ខាងលើបានបកស្រាយថា ចំនួនអ្នកស្លាប់ច្រើនបែបនេះ ដោយសារ ឧក្រិដ្ឋជនទាំងនេះបានតដៃជាមួយប៉ូលិស ហើយប៉ូលិសប្រើប្រាស់សិទ្ធិការពារខ្លួនប៉ុណ្ណោះ។ លោកទទួលស្គាល់ថា វាជាប្រតិបត្តិការមួយក្នុងចំណោមប្រតិបត្តិការបង្ក្រាបគ្រឿងញៀនដែលបង្កឲ្យឧក្រិដ្ឋជនស្លាប់ច្រើនបំផុតមិនធ្លាប់មាន។
មន្ត្រីរូបនេះបានថ្លែងដូច្នេះថា៖« យើងចង់ប្រើប្រាស់យុទ្ធសាស្ត្របំភ័យបែបនេះចំពោះឧក្រិដ្ឋជនគ្រឿងញៀន។ ពួកគេផ្សេងតៀតនឹងគិតឡើងវិញថាតើគួរបន្តលក់គ្រឿងញៀនទៀតឬអត់។ យើងដឹងថា យើងមិនបានធ្វើអ្វីខុសឡើយគ្រាន់តែបង្ក្រាបឧក្រិដ្ឋជនគ្រឿងញៀននោះ»។
យ៉ាងណាក៏ដោយ ការសម្លាប់ឧក្រិដ្ឋជនគ្រឿងញៀនច្រើនសន្ធឹកនេះកើតឡើងប៉ុន្មានថ្ងៃប៉ុណ្ណោះក្រោយប្រធានាធិបតីរ៉ូឌ្រីហ្គោ ឌូទើតេ បានសារភាពថា លោកមិនអាចគ្រប់គ្រងគ្រឿងញៀនឡើយ ទោះ សង្គ្រាមគ្រឿងញៀនរបស់លោកបានសម្លាប់មនុស្សជាង៧ពាន់នាក់។
ដោយឡែក ក្នុងកំណត់ត្រាប៉ូលិស ចាប់តាំងពីសង្គ្រាមគ្រឿងញៀនរបស់ប្រធានាធិបតី រ៉ូឌ្រីហ្គោ ឌូទើតេ ចាប់ផ្តើមនៅខែមិថុនាឆ្នាំ ២០១៦ មក ឧក្រិដ្ឋជនគ្រឿងញៀន ៣២៦៤ នាក់ហើយត្រូវបានសម្លាប់ដោយមន្ត្រីអនុវត្តច្បាប់។ ចំណែក ឧក្រិដ្ឋជនជាង ពីរពាន់នាក់ទៀតស្លាប់ដោយសារឃាតកម្មទាក់ទងនឹងបញ្ហាគ្រឿងញៀនរួមមានទាំង ការបាញ់សម្លាប់ដោយជនប្រដាប់អាវុធខុសច្បាប់លាក់អត្តសញ្ញាណជាដើម។
ទាក់ទិននឹងសង្គ្រាមគ្រឿងញៀនហ្វីលីពីននេះ ក្រុមសិទ្ធិមនុស្សទាមទារការស្រាវជ្រាវឲ្យបានលម្អិតពីតួនាទីរបស់មន្ត្រីរដ្ឋាភិបាលដែលអាចពាក់ព័ន្ធនឹងការសម្លាប់រង្គាលមនុស្សក្នុងសង្គ្រាមគ្រឿងញៀននេះ ព្រោះអត្រានៃចំនួនមនុស្សស្លាប់កើនឡើងច្រើន៕
Tag:
Bulacan
Romeo M. Caramat
រ៉ូឌ្រីហ្គោ ឌូទើតេ
ហ្វីលីពីន
© រក្សាសិទ្ធិដោយ thmeythmey.com