ភ្នាក់ងារសម្ងាត់សុំលុយសភាបន្ថែម ព្រោះការចំណាយការពារ ត្រាំ និងគ្រួសារ អស់ច្រើនពេក

អន្តរជាតិ

ភ្នាក់ងារសម្ងាត់សុំលុយសភាបន្ថែម ព្រោះការចំណាយការពារ ត្រាំ និងគ្រួសារ អស់ច្រើនពេក

22, Aug 2017 , 8:39 pm

រូបភាព

ដោយ: តន ចាន់រិទ្ធារ៉ា

ចំនួនទឹកប្រាក់សម្រាប់ការចំណាយលើការការពារសុវត្ថិភាពប្រធានាធិបតី ដូណាល់ ត្រាំ និងក្រុមគ្រួសាររបស់លោក ជិតអស់ហើយ បើតាមទីភ្នាក់ងារសម្ងាត់ដែលទទួលបន្ទុកការពារប្រធានាធិបតីអាមេរិក។ ទីភ្នាក់ងារសម្ងាត់អាមេរិកប្រកាសនៅថ្ងៃទី២១ ខែសីហា ថា ខ្លួនមានប្រាក់នៅសេសសល់សម្រាប់ប្រតិបត្តិការនៅត្រឹមខែកញ្ញាប៉ុណ្ណោះ ហើយហួសពីកាលបរិច្ឆេទនេះទៅ គឺសមាជិកទាំងអស់ត្រូវធ្វើការដោយគ្មានប្រាក់ខែឡើយ បើសភាមិនអន្តរាគមន៍ទេនោះ។

ចាប់តាំងពីការចូលកាន់តំណែងនៅថ្ងៃទី២០ ខែមករាមកនោះ ប្រធានាធិបតី ដូណាល់ ត្រាំ និងក្រុមគ្រួសាររបស់លោក បានក្លាយជាបន្ទុកដ៏ធំរបស់ភ្នាក់ងារសម្ងាត់ដែលមានភារកិច្ចចាំការពារថ្នាក់ដឹកនាំកំពូលរបស់អាមេរិក។ ភា្នក់ងារសម្ងាត់អាមេរិកបានចំណាយប្រាក់លើការការពារលោក ត្រាំ និងក្រុមគ្រួសារ ច្រើនជាងប្រធានាធិបតីមុនៗរបស់អាមេរិក។ មកត្រឹមខែសីហានេះ ភ្នាក់ងារសម្ងាត់ប្រកាសថា ទឹកប្រាក់ចំណាយសម្រាប់ការការពារលោក ត្រាំ ក្នុងឆ្នាំ២០១៧ គឺជិតអស់ហើយ។

យោងតាមសារព័ត៌មាន Washington Post ភ្នាក់ងាសម្ងាត់អាមេរិកនិយាយថា ខ្លួននៅមានប្រាក់សម្រាប់ការចំណាយពេញមួយខែកញ្ញាទៀត ហើយបើហួសពីនោះទៅ បុគ្គលិករបស់ខ្លួនមួយភាគបីនឹងត្រូវធ្វើការដោយគ្មានប្រាក់ខែតែម្ដង។ លោក Randolph “Tex” Alles នាយកទីភ្នាក់ងារសម្ងាត់បាននិយាយថា ក្រុមការងាររបស់លោកបានធ្វើការជិតស្និទ្ធជាមួយក្រសួងសន្តិសុខមាតុភូមិ រដ្ឋបាលប្រធានាធិបតី ត្រាំ និងសភា ដើម្បីស្វែងរកដំណោះស្រាយផ្លូវច្បាប់មួយ។

តាមពិតទៅ ចំនួនទឹកប្រាក់របស់ភ្នាក់ងារសម្ងាត់ដែលផ្ដល់ដោយរដ្ឋអាចប្រើប្រាស់ពេញមួយឆ្នាំ២០១៧ ប៉ុន្តែទឹកប្រាក់នេះបែរជាអស់មុនកាលកំណត់ទៅវិញ។ នេះក៏ព្រោះតែភ្នាក់ងារសម្ងាត់ត្រូវការពារលោក ត្រាំ និងក្រុមគ្រួសាររបស់លោកទាំងអស់ដែលគ្នាជាង៤០នាក់ ហើយដែលតែងធ្វើដំណើរទេសចរណ៍ ឬក៏ការធ្វើពាណិជ្ជកម្មយ៉ាងញឹកញាប់។ លើសពីនោះ ភ្នាក់ងារសម្ងាត់ក៏ត្រូវការពារអនុប្រធានាធិបតី ម៉ៃ ផេនស៍ និងគ្រួសារទៀតផង។

លោក ត្រាំ តែងចំណាយពេលចុងសប្ដាហ៍ទៅសម្រាកនៅឯរមណីយដ្ឋាន Mar-a-Lago នៅឯរដ្ឋ Florida និងទៅលេងវាយហ្គោលនៅរដ្ឋ New Jersey ជាដើម ហើយដែលតម្រូវឲ្យភ្នាក់ងារសម្ងាត់តាមការពារលោកជានិច្ច។ វត្តមានលោក ត្រាំ នៅ Florida ជាញឹកញាប់ មិនត្រឹមបង្កការមិនសប្បាយចិត្តពីសំណាក់ប្រជាជនឡើយ តែមន្ត្រីក្នុងស្រុកក៏ត្រូវចំណាយប្រាក់ច្រើនទៀតផង ជាពិសេសកងឆ្មាំការពារឆ្នេរដែលត្រូវល្បាត Mar-a-Lago ២៤ម៉ោងលើ២៤ម៉ោងផងដែរ។

ការចំណាយខាងលើមិនទាន់គិតដល់ថ្លៃការពារកូនៗធំទាំងបួនរបស់លោក ត្រាំ ឬក៏ភ្ញៀវរបស់លោក ត្រាំ ផង។ លើសពីនេះ ភ្នាក់ងារសម្ងាត់ក៏ត្រូវចំណាយលើបុគ្គលិកដែលកើនឡើងផងដែរ ព្រោះការងារបានកើនឡើងច្រើនតាំងពីលោក ត្រាំ ក្លាយជាប្រធានាធិបតីមក។ លោក Alles បញ្ជាក់ថា ចំនួនបុគ្គលិកបម្រើការនៅភ្នាក់ងារពិសេសបានកើនឡើងដល់ទៅ៨០០នាក់ ដែលនេះក៏ជាចំណែកមួយនាំឲ្យថវិកាសម្រាប់ការការពារអស់មុនកំណត់ដែរ៕