ស៊ីហ្គេម៖ ឥណ្ឌូណេស៊ីចោទម៉ាឡេស៊ីថាបន្លំមេដាយ ខណៈថៃថាម្ចាស់ផ្ទះដាក់តែវិញ្ញាសាដែលខ្លួនមានប្រៀប

កីឡាអន្តរជាតិ

អន្តរជាតិ

ស៊ីហ្គេម៖ ឥណ្ឌូណេស៊ីចោទម៉ាឡេស៊ីថាបន្លំមេដាយ ខណៈថៃថាម្ចាស់ផ្ទះដាក់តែវិញ្ញាសាដែលខ្លួនមានប្រៀប

29, Aug 2017 , 12:06 pm

រូបភាព

ដោយ: ទេព ពិទូរ្យ

ឥណ្ឌូណេស៊ីចោទប្រកាន់ម៉ាឡេស៊ីថាបានប្លន់មេដាយពីការប្រកួតកីឡា ក្នុងព្រឹត្តិការណ៍ស៊ីហ្គេមលើកទី២៩នេះ ស្របពេលដែលថៃក៏បានចោទប្រកាន់ម្ចាស់ផ្ទះដែរថា ដាក់បញ្ចូលតែវិញ្ញាសាដែលខ្លួនចេះ។

ម៉ាឡេស៊ីបានសិទ្ធិធ្វើជាម្ចាស់ផ្ទះកីឡាស៊ីហ្គេមឆ្នាំ២០១៧នេះ នៅទីក្រុងកូឡាឡាំពួរ ចាប់ពីថ្ងៃទី ១៩ ដល់ ៣០ ខែសីហា។ ក្នុងព្រឹត្តិការណ៍កីឡាប្រចាំតំបន់អាស៊ានលើកនេះ ត្រូវបានគេមើលឃើញថាមានភាពលម្អៀងទៅរកម្ចាស់ផ្ទះច្រើន នាការប្រកួតរយៈពេលជិតកន្លះខែកន្លងមក។

កាសែតបាងកកប៉ុស្តិ៍ផ្សាយថា ឥណ្ឌូណេស៊ីបានចោទប្រកាន់ម៉ាឡេស៊ីថាបានបន្លំពន្ទុពីការប្រកួតនានា និងមិនមានភាពយុត្តិធម៍ ដោយកាន់ជើងខាងម្ចាស់ផ្ទះ។
តួយ៉ាងដូចជាការប្រកួតវិញ្ញាសាសម្តែងក្បាច់គុណ (pencak silat) គូបុរស ដែលកីឡាករម៉ាឡេស៊ីទទួលបានមេដាយមាសនោះ ត្រូវបានអ្នកគ្រប់គ្រងកីឡារបស់ឥណ្ឌូណេស៊ីលោក Edhy Prabowo រិះគន់ថាពួកគេទទួលពិន្ទុដោយមិនមានភាពយុត្តិធម៍ទាល់តែសោះ។

លើសពីនេះពីនេះទៅទៀត នាការប្រកួតកីឡាប្រដាល់ក្បាច់គុនបុរាណខ្មែរ ដែលក្រុមកីឡាកររបស់កម្ពុជា ឡៅ ចិត្រា បានប្រកួតចាញ់កីឡាកររបស់ម៉ាឡេស៊ីកាលពីម្សិលមិញនោះ ក៏ឃើញថាមានភាពលម្អៀងច្រើនទៅកាន់ភាគីម្ចាស់ផ្ទះផងដែរ។

ចំណែកថៃឯណោះវិញ ដែលជាប្រទេសដែលតែងតែទទួលបានមេដាយច្រើនលើសគេពីការប្រកួតកីឡាអាស៊ាននេះ ក៏មានប្រត្តិកម្មជុំវិញការរៀបចំការប្រកួតកីឡាលើកនេះដែរ។
ការសែតដដែលបានផ្សាយថា ខគណៈប្រតិភូរបស់ថៃលោក Thana Chaiprasit មិនពេញចិត្តនឹងការសម្រេចបញ្ចូលវិញ្ញាសារបស់ម្ចាស់ផ្ទះម៉ាឡេស៊ីនេះនោះទេ។ ម៉ាឡេស៊ីបានដកវិញ្ញាសាប្រដាល់នារី ហើយដាក់វិញ្ជាសាណាដែលពួកគេចេះប៉ុណ្ណោះ ដូចជាកីឡាវាយកូនបាល់ក្នុងកញ្ចក់ (Squash) និង ស្គី (Figure Skating) ជាដើម។

«យើងបានបាត់បង់មេដាយមាសជាច្រើនហើយស្ថានការណ៍របស់យើងនៅពេលនេះមិនល្អទេ។ ខ្ញុំគិតថាយើងនឹងទទួលបានមេដាយមាសប្រហែល ៨០ ពីព្រឹត្តិការណ៍នេះ ខណៈដែលគោលដៅរបស់យើងគឺចង់បានមេដាយមាសរហូតដល់ ១០៩ ឯណោះ»។ នេះជាការលើកឡើងរបស់លោក Thana Chaiprasit។

គិតត្រឹមថ្ងៃទី២៩ នេះម្ចាស់ផ្ទះម៉ាឡេស៊ីរកបានដាយសរុប ២៦១ ហើយ ដោយមេដាយមាស ១១២ ប្រាក់ ៧៨ និងសំរិទ្ធ ៧១។ រីឯថៃដែលធ្លាប់តែនាំមុខមេដាយនោះ រកបានមេដាយសរុប ២០៧ មេដាយមាស ៥៩ ប្រាក់ ៧២ និងសំរិទ្ធ ៧៦៕