អន្តរជាតិ
អាមេរិក-កូរ៉េខាងត្បូងចង់ពង្រាយនាវាដឹកយន្តហោះនិងយន្តហោះទម្លាក់គ្រាប់បែកនៅឧបទ្វីបកូរ៉េ
× សម្ព័ន្ធមិត្តអាមេរិក និងកូរ៉េខាងត្បូងនឹងស្វែងរកលទ្ធភាពក្នុងការពង្រាយនាវាដឹកយន្តហោះ និងយន្តហោះទម្លាក់គ្រាប់បែកនៅឧបទ្វីបកូរ៉េ។ គោលដៅនៃការពង្រាយនេះ គឺ ដើម្បីឆ្លើយការសាកល្បងគ្រាប់បែកអ៊ីដ្រូសែនរបស់កូរ៉េខាងជើងនាពេលថ្មីៗនេះ។ ទង្វើក្បាលរឹងរបស់កូរ៉េខាងជើង បង្កជាការព្រួយបារម្ភជាខ្លាំងពីសំណាក់កូរ៉េខាងត្បូង និងអាមេរិក ទោះជាអាមេរិកធ្លាប់ព្រមានចាត់វិធានការញយដងក្ដី។
ការប្រកាសជោគជ័យក្នុងការសាកល្បងគ្រាប់បែកអ៊ីដ្រូសែននៅថ្ងៃទី៣ ខែកញ្ញា បានបង្ហាញពីការរីកចម្រើនជឿនលឿនក្នុងកម្មវិធីនុយក្លេអ៊ែររបស់កូរ៉េខាងជើង និងជាសញ្ញាប្រាប់ថា កូរ៉េខាងជើងនឹងមិនបោះបង់មហិច្ឆតាអភិវឌ្ឍអាវុធប្រល័យលោករបស់ខ្លួនទេ។ កូរ៉េខាងត្បូង និងអាមេរិកឯណេះ ក៏ប្រឹងប្រែងរកវិធីទប់ស្កាត់ និងបង្ហាញឥទ្ធិពលយោធាតបតវិញក្នុងន័យបង្ខំឲ្យកូរ៉េខាងជើងបញ្ឈប់ទង្វើគំរាមគេឯងបែបនេះ។
នៅថ្ងៃទី៤ ខែកញ្ញា ក្រសួងការពារជាតិកូរ៉េខាងត្បូងនិយាយថា កូរ៉េខាងត្បូងនិងអាមេរិកនឹងស្វះស្វែងរកការពង្រាយនាវាយន្តហោះ យន្តហោះទម្លាក់គ្រាប់បែក និងសព្វាវុធយុទ្ធសាស្ត្រដទៃទៀតនៅកូរ៉េខាងត្បូង ដើម្បីជាការសម្ញែងកម្លាំងយោធាដាក់កូរ៉េខាងជើង។ នេះបើតាមការផ្សាយរបស់ទីភ្នាក់ងារព័ត៌មាន Yonhap ដែលបន្តថា ក្រុងសេអ៊ូលនឹងរៀបចំលំហាត់យោធាឯកតោភាគីជាថ្មីទៀតក្នុងខែកញ្ញានេះដែលនឹងមានវត្តមានមីស៊ីលប្រភេទថ្មីៗទៀត។
បន្ទាប់ពីកូរ៉េខាងជើងសាកល្បងគ្រាប់អ៊ីដ្រូសែននៅថ្ងៃទី៣ ខែកញ្ញា កូរ៉េខាងត្បូងក៏បានធ្វើសមយុទ្ធបាញ់មីស៊ីលពិតភ្លាមដែរ ដើម្បីជាសារព្រមានកូរ៉េខាងជើងវិញ។ យោធាកូរ៉េខាងត្បូងបានបាញ់មីស៊ីលបាលីស្ទិក Hyunmoo-2A និងមីស៊ីលចម្ងាយឆ្ងាយ SLAM-ER ដែលបំពាក់លើយន្តហោះ F-15K ទៅកាន់គោលដៅនៅសមុទ្រខាងកើត។ យោធាកូរ៉េខាងត្បូងបញ្ជាក់ថា សមយុទ្ធនេះគឺជាការធ្វើត្រាប់ក្នុងការវាយប្រហារទីតាំងសាកល្បងនុយក្លេអ៊ែរ Punggye-ri របស់កូរ៉េខាងជើង។
សូមបញ្ជាក់ថា ក្រៅពីទាហាន និងសព្វាវុធមួយចំនួនទៀតនោះ អាមេរិកមិនបានពង្រាយនាវាដឹកយន្តហោះ ឬយន្តហោះចម្បាំងជាអចិន្ត្រៃយ៍នៅឧបទ្វីបកូរ៉េទេ ដែលខុសពីជប៉ុនមាននាវាដឹកនាំយន្តហោះប្រចាំការនៅទីនោះ។ ប៉ុន្តែជារឿយៗ ក្នុងន័យបង្ហាញអានុភាពយោធា អាមេរិកក៏បានបញ្ជូននាវាដឹកយន្តហោះ ឬយន្តហោះទម្លាក់គ្រាប់បែកយុទ្ធសាស្ត្រ B-1B Lancer ទៅកាន់ឧបទ្វីបកូរ៉េដើម្បីកំញើញរបបដឹកនាំព្យុងយ៉ាងដែរ។
បន្ថែមពីលើនេះ កូរ៉េខាងត្បូងក៏នឹងពង្រាយជើងទម្របាញ់មីស៊ីលនៃប្រព័ន្ធកាពារ THAAD ចំនួនបួនគ្រឿងទៀត សំដៅទប់ទល់ការគំរាមកំហែងរបស់កូរ៉េខាងជើង។ ទាំងអាមេរិក ទាំងកូរ៉េខាងត្បូង បានមូលមតិគ្នាហើយថានឹងចាត់វិធានការយោធាដ៏មានប្រសិទ្ធភាពតបតសកម្មភាពព្រហើនរបស់កូរ៉េខាងជើង។ យោធាប្រទេសទាំងពីរក៏ឯកភាពគ្នាក្នុងការចេញចំណាត់យោធារួមគ្នាឲ្យបានលឿនបំផុតផងដែរ៕
Tag:
អាមេរិក
កូរ៉េខាងត្បូង
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com