អន្តរជាតិ
អាមេរិកត្រៀមខ្លួនប្រើ «នុយក្លេអ៊ែរ» ដើម្បីការពារខ្លួននិងសម្ព័ន្ធមិត្ត
× សេតវិមាន នៅថ្ងៃទី៣ ខែកញ្ញា បានព្រមានថា ក្រុងវ៉ាស៊ីនតោនបានត្រៀមខ្លួនប្រើប្រាស់គ្រប់លទ្ធភាពទាំងអស់ដើម្បីការពារខ្លួន និងសម្ព័ន្ធមិត្តទាំងឡាយពីការគំរាមកំហែងរបស់កូរ៉េខាងជើង។ ជាមួយការកើនឡើងកាន់តែខ្លាំងនៃការគំរាមរបស់ព្យុងយ៉ាង និងការសាកល្បងគ្រាប់បែកប្រល័យលោកលើកទី៦ ក្រុងវ៉ាស៊ីនតោនបានគំរាមប្រើកម្លាំងយោធាដើម្បីដោះស្រាយវិបត្តិនេះ បើរបបកុម្មុយនីស្តព្យុងយ៉ាងមិនបញ្ឈប់ទង្វើគឃ្លើនរបស់ខ្លួនទេនោះ។
ភ្លាមៗបន្ទាប់ពីកូរ៉េខាងជើងប្រកាសពីជោគជ័យក្នុងការសាកល្បងគ្រាប់បែកអ៊ីដ្រូសែន ប្រធានាធិបតីអាមេរិក ដូណាល់ ត្រាំ បានបញ្ជាក់ពីការប្ដេជ្ញាចិត្តរបស់អាមេរិកក្នុងការការពារខ្លួន និងសម្ព័ន្ធមិត្តទៅតាមសមត្ថភាពដែលខ្លួនមាន។ លោក ត្រាំ បញ្ជាក់ដូចនេះ អំឡុងពេលការជជែកតាមទូរសព្ទជាមួយនាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី៣ ខែកញ្ញា ។ លោក ត្រាំ ក៏បានជួបជាមួយបណ្ដាមន្ត្រីទទួលកិច្ចការសន្តិសុខដើម្បីរិះរកចំណាត់ការថ្មីប្រឆាំងកូរ៉េខាងជើងដែរ។
ក្នុងសេចក្ដីប្រកាសព័ត៌មានរបស់សេតវិមាន ប្រធានាធិបតីអាមេរិក និងនាយករដ្ឋមន្ត្រីជប៉ុនបានថ្កោលទោសទង្វើរបស់កូរ៉េខាងជើង និងចាត់ទុកជាសកម្មភាពបង្កហេតុ និងធ្វើឲ្យមានអស្ថិរភាពក្នុងតំបន់។ លោក ត្រាំ បញ្ជាក់ទៅកាន់លោក អាបេ ថា អាមេរិកត្រៀមរួចហើយក្នុងការពារទឹកដី និងសម្ព័ន្ធមិត្តក្នុងតំបន់ តាមរយៈការប្រើប្រាស់គ្រប់លទ្ធភាពទាំងអស់ ទាំងផ្លូវការទូត យោធា និងសមត្ថភាពនុយក្លេអ៊ែរផងដែរ។
អាចចាត់ទុកថា នេះជាការគំរាមដ៏ខ្លាំងពីសំណាក់ប្រធានាធិបតី ត្រាំ ដ្បិតកន្លងមក លោកបាននិយាយត្រឹមការប្រើប្រាស់កម្លាំងយោធាដើម្បីបញ្ចប់បញ្ហាប៉ុណ្ណោះ។ ជាមួយគ្នានោះ តាមរយៈបណ្ដាញ Twitter លោក ត្រាំ ក៏បានបន្តរិះគន់កូរ៉េខាងជើង ដោយចាត់ទុករបបឯកោនេះជារដ្ឋសាហាវ និងជាការគំរាមកំហែងមួយដែរ។ លោក ត្រាំ ក៏បានហៅសកម្មភាពចុងក្រោយរបស់កូរ៉េខាងជើង ជាគ្រោះថ្នាក់សម្រាប់អាមេរិកទៀតផង។
ក្រោយជជែកជាមួយនាយករដ្ឋមន្ត្រីអាបេ លោក ត្រាំ ក៏បានជួបប្រជុំជាមួយរដ្ឋមន្ត្រីការពារជាតិ ជេម ម៉ាធីស និងប្រធានបុគ្គលិកសេតវិមាន ចន ខេល្លី ជុំវិញស្ថានការណ៍នៅឧបទ្វីបកូរ៉េ។ ប្រមុខការពារជាតិអាមេរិក លោក ម៉ាធីស ក៏បានព្រមានកូរ៉េខាងជើងទុកមុនថា ការវាយប្រហារណាមួយមកលើអាមេរិក និងសម្ព័ន្ធមិត្ត នឹងត្រូវរងការឆ្លើយតបធ្ងន់ៗវិញមិនខាន។ នេះបើតាមការផ្សាយរបស់សារព័ត៌មាន RT ។
ថ្លែងក្រោយជួបជាមួយប្រធានាធិបតី ត្រាំ រដ្ឋមន្ត្រីការពារជាតិអាមេរិករូបនេះបញ្ជាក់ច្បាស់ថា អាមេរិកគ្មានបំណងបំផ្លាញប្រទេសណាមួយទេ សូម្បីតែកូរ៉េខាងជើងក្ដី ប៉ុន្តែអាមេរិកនៅមានជម្រើសច្រើនដើម្បីដោះស្រាយបញ្ហានេះ។ នេះជាការព្រមានថ្មីមួយទៀតទៅកាន់កូរ៉េខាងជើងពីសំណាក់អាមេរិក ក្រោយរដ្ឋមួយនេះសាកល្បងគ្រាប់បែកអ៊ីដ្រូសែននៅថ្ងៃទី៣ ខែកញ្ញា៕
Tag:
អាមេរិក
ជប៉ុន
កូរ៉េខាងត្បូង
ដូណាល់ ត្រាំ
នុយក្លេអ៊ែរ
© រក្សាសិទ្ធិដោយ thmeythmey.com