អន្តរជាតិ
ម៉ាឡេស៊ីចាប់ខ្លួនជនសង្ស័យ៧នាក់ជាបណ្តាញក្រុមជ្រុលភេរវជនអាប៊ូសាយ៉ាវ រូបភាព៖ The Indian Express
× ម៉ាឡេស៊ីបានចាប់ខ្លួនជនសង្ស័យជាមេដឹកនាំ និងសមាជិកក្រុមជ្រុលនិយមអាប៊ូសាយ៉ាវ (Abu Sayyaf) ចំនួន ប្រាំពីរនាក់ក្នុងប្រតិបត្តិការបង្ក្រាបមួយនៅទីក្រុងគូឡាឡាំពួ។ អ្វីដែលគួរឲ្យកត់សម្គាល់នោះគឺ ក្នុងចំណោមជនសង្ស័យទាំងនេះអ្នកខ្លះជាកងសន្តិសុខ ចំណែកឯអ្នកខ្លះទៀតជាសមាជិកអង្គភាពស៊ីវិលស្ម័គ្រចិត្ត។
នៅថ្ងៃអាទិត្យទី៣ខែកញ្ញា ប៉ូលិសម៉ាឡេស៊ីបានចាប់ខ្លួនជនសង្ស័យប្រាំពីរនាក់ក្នុងនោះអាចជាសមាជិកនិងមេដឹកនាំក្រុមអាប៊ូសាយ៉ាវ ដែលជាបណ្ដាញក្រុមភេរវជនដែស្ហ (Daesh)។ក្នុងចំណោមជនសង្ស័យទាំងនេះ ប្រាំនាក់ជាជនជាតិម៉ាឡេស៊ី និងពីរនាក់ទៀតជាហ្វីលីពីន ហើយពួកគេត្រូវបានចាប់ខ្លួនក្នុងប្រតិបត្តិការបង្ក្រាបជាច្រើនថ្ងៃនៅក្រុងគឡាឡាំពួ។
បើតាមទីភ្នាក់ងារព័ត៌មាន Reuters ក្នុងចំណោមជនសង្ស័យហ្វីលីពីនពីរនាក់នេះមានម្នាក់ឈ្មោះ Abu Asrie ត្រូវបានគេស្គាល់ថាជា សមាជិកក្រុមចាប់ជម្រិត Lucky9ដែលជាបណ្ដាញរបស់ក្រុមជ្រុលនិយមអាប៊ូសាយ៉ាវ នៅភាគខាងត្បូងហ្វីលីពីន។ Abu Asrie បានឆ្លងដែនចូលមកម៉ាឡេស៊ីតាំងពីឆ្នាំ ២០១៥មកម្ល៉េះ ហើយជននេះត្រូវបានប៉ូលិសម៉ាឡេស៊ីឃាត់ខ្លួនកាលពីថ្ងៃពុធសប្ដាហ៍មុន។
គេជឿថា ជនសង្ស័យម៉ាឡេស៊ីប្រាំនាក់ទៀត មកពីក្រុង Sandakan ហើយធ្វើការនៅក្រុងគូឡាឡាំពួ។ម្យ៉ាងវិញទៀត ជនសង្ស័យទាំង៧នាក់នេះមានខ្លះជាកងសន្តិសុខ និងខ្លះទៀតជាសមាជិកអង្គភាពកងទ័ពស៊ីវិលស្ម័គ្រចិត្តផងដែរ។
គួរបញ្ជាក់ដែរថា ក្រុមជ្រុលនិយមអាប៊ូសាយ៉ាវ ត្រូវបានគេស្គាល់ថាជាក្រុមដែលបន្តបំផ្ទុះគ្រាប់បែក កាត់ក គំរាមកំហែង និងចាប់ជំរិតនៅតំបន់ភាគខាងត្បូងហ្វីលីពីន។ ចាប់តាំងពីឆ្នាំ២០១៣ដល់២០១៦ ជនសង្ស័យជាង ២៥០ នាក់ត្រូវបានចាប់ខ្លួនដោយសារសង្ស័យមានជាប់ពាក់ព័ន្ធក្រុមភេរវជនដែស្ហ។
សូមជម្រាបដែរថា ប្រទេសនៅអាស៊ីអាគ្នេយ៍ព្រួយបារម្ភពីការពង្រីកឥទ្ធិពល និងបណ្តាញរបស់ក្រុមភេរវជនដែស្ហនៅក្នុងតំបន់។ នោះក៏ដោយសារតែក្រុមភេរវជនជាច្រើនបានត្រឡប់មកប្រទេសខ្លួនវិញបន្ទាប់ពីរចនាសម្ព័ន្ធដឹកនាំក្រុមភេរវជនដែស្ហដួលរលំនៅតំបន់មជ្ឈិមបូព៌ានោះ៕
Tag:
Abu Sayyaf
Abu Asrie
ម៉ាឡេស៊ី
© រក្សាសិទ្ធិដោយ thmeythmey.com