អន្តរជាតិ
មហាអំណាចសេដ្ឋកិច្ចថ្មី BRICS ផ្តើមកិច្ចប្រជុំនៅចិន ចំពេលឧបទ្វីបកូរ៉េកើនកម្តៅ
× កិច្ចប្រជុំប្រទេសមហាអំណាចសេដ្ឋកិច្ចថ្មី BRICS ចាប់ផ្តើមនៅថ្ងៃចន្ទទី ៤ ខែកញ្ញានេះនៅក្នុងទីក្រុង Xiamen ប្រទេសចិន។ កិច្ចប្រជុំចាប់ផ្តើមឡើងដោយហ៊ុមព័ទ្ធដោយបញ្ហាក្តៅតំបន់ពោលគឺការបាញ់សាកល្បងអាវុធនុយក្លេអ៊ែរលើកទីប្រាំមួយរបស់កូរ៉េខាងជើងតែម្តង ហើយម្យ៉ាងសមាជិកក្រុមនេះមកដល់បច្ចុប្បន្នសុទ្ធតែប្រឈមបញ្ហារៀងខ្លួនទៀត។
មហាយក្សចិនធ្វើជាម្ចាស់ផ្ទះកិច្ចប្រជុំកំពូលប្រទេសមហាអំណាចសេដ្ឋកិច្ចថ្មី BRICS ដែលចាប់ផ្តើមនៅថ្ងៃចន្ទនេះ។ ប៉ុន្តែកិច្ចប្រជុំនេះធ្វើឡើងស្របពេលដែលគ្រប់គ្នាផ្តោតអារម្មណ៍ខ្លាំងលើឧបទ្វីបកូរ៉េ បន្ទាប់ពីរដ្ឋឯកោសង្គមនិយមនោះបាញ់សាកល្បងអាវុធនុយក្លេអ៊ែរជាលើកទីប្រាំមួយចុងសប្តាហ៍កន្លងទៅនេះ។
ទីភ្នាក់ងារព័ត៌មាន AFP បានចុះផ្សាយថា សមាជិកប្រទេសមហាអំណាចសេដ្ឋកិច្ចថ្មីមាន ប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូងនោះបានចេញសេចក្តីថ្លែងការណ៍មួយថ្កោលទោសកូរ៉េខាងជើងដែលបាញ់សាកល្បងអាវុធនុយក្លេអ៊ែរនេះផងដែរ បន្ទាប់ពីកិច្ចប្រជុំចាប់ផ្តើម។
មុនកិច្ចប្រជុំចាប់ផ្តើម មេដឹកនាំចិនលោក ស៊ី ជិនភីង និងប្រធានាធិបតីរុស្ស៊ីលោក វ្ល៉ាឌីមៀ ពូទីន បានជួបពិភាក្សាគ្នានៅល្ងាចថ្ងៃអាទិត្យ ហើយមេដឹកនាំទាំងពីរក៏បានជជែកពិភាក្សាគ្នាផងដែរដើម្បីរកដំណោះស្រាយសមស្របឆ្លើយតបបញ្ហាឧបទ្វីបកូរ៉ដែរ។ ប៉ុន្តែកិច្ចពិភាក្សាលម្អិតបែបណានោះ គឺមិនអាចដឹងច្បាស់ឡើយ។
ដោយឡែក គេមើលឃើញថា បណ្តាប្រទេសមហាអំណាចសេដ្ឋកិច្ចថ្មីដែលប្រមូលផ្តុំគ្នាប្រជុំនៅចិនថ្ងៃនេះសុទ្ធតែជួបប្រឈមបញ្ហារៀងខ្លួន។ វាមានការរិះគន់ថា ប្រទេសជាសមាជិកក្រុមនេះហាក់បីដូចជាមិនមានការឯកភាពគ្នាលើបញ្ហារួម និងគ្មានលទ្ធភាពក្នុងការដោះស្រាយបញ្ហប្រឈមផ្នែកសេដ្ឋកិច្ចឡើយ ហើយជោគជ័យធំបំផុតរបស់ក្រុមនេះប្រហែលជាមានតែមួយគឺការបង្កើតធនាគារអភិវឌ្ឍន៍ BRICS កាលពីឆ្នាំ ២០១៦ ប៉ុណ្ណោះ។
ដូចឃើញស្រាប់ឥណ្ឌា និងចិន ដែលជាមិត្តជិតខាងនោះទើបតែបញ្ចប់ការប្រឈមមុខដាក់គ្នាពាក់ព័ន្ធបញ្ហាព្រំដែននៅសប្តាហ៍មុនប៉ុណ្ណោះ ហើយប្រទេសមហាអំណាចទាំងពីរក៏មិនទុកចិត្តគ្នាប៉ុន្មានដែរ។ បញ្ហានេះនឹងបន្តក្លាយជាឧបសគ្គសម្រាប់ការកសាងទំនាក់ទំនង និងបង្កើនទំនុកចិត្តរវាងគ្នានៅពេលអនាគត។
ចំណែកបញ្ហាសេដ្ឋកិច្ចវិញ ទំនាក់ទំនងពាណិជ្ជកម្មរវាងប្រទេសសមាជិកក្រុម BRICS ក៏មិនសូវសកម្ម ហើយប្រទេសទាំងនោះក៏មិនសូវមានជំហររួមគ្នាក្នុងការប្រឆាំងគោលនយោបាយគាំពារនិយម និងលើកកម្ពស់សេដ្ឋកិច្ចទីផ្សារសេរីដូចគ្នាដែរ។ បើក្រឡេកទៅមើលប្រទេសអាហ្វ្រិកខាងត្បូង និងប្រេស៊ីល ក៏សុទ្ធតែប្រឈមបញ្ហានយោបាយក្នុងស្រុកមិនចេះចប់ដូចគ្នា។
Tag:
BRICS
Xiamen
ស៊ី ជិនភីង
វ៉ា្លឌីមៀ ពូទីន
© រក្សាសិទ្ធិដោយ thmeythmey.com