អន្តរជាតិ
ប្រមុខ UN ថ្កោលទោសកូរ៉េខាងជើង ខណៈក្រុមប្រឹក្សាសន្តិសុខចាប់ផ្តើមប្រជុំរកវិធានការដាក់សម្ពាធ
× ក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំពិភាក្សាដើម្បីឆ្លើយតបនឹងការបាញ់សាកល្បងនុយក្លេអ៊ែររបស់កូរ៉េខាងជើងកាលពីថ្ងៃអាទិត្យទី៣ខែកញ្ញា។ អគ្គលេខាធិការអង្គការសហប្រជាជាតិបានថ្កោលទោសការបាញ់សាកល្បងមីស៊ីលនេះ និងហៅសកម្មភាពនេះថា ជាការបង្កអស្ថេរភាពដល់ តំបន់។
ថ្ងៃចន្ទទី ៤ ខែកញ្ញានេះ ក្រុមប្រឹក្សាសន្តិសុខអង្គការសហប្រជាជាតិចាប់ផ្តើមបើកកិច្ចប្រជុំពិភាក្សាជាបន្ទាន់ជុំវិញការបាញ់សាកល្បងគ្រាប់បែកអ៊ីដ្រូសែនរបស់កូរ៉េខាងជើង។ កិច្ចប្រជុំបន្ទាន់នេះត្រូវបានស្នើឡើងដោយអាមេរិក កូរ៉េខាងត្បូង បារាំង ជប៉ុន និងអង់គ្លេស។
ទីភ្នាក់ងារព័ត៌មាន Reuters បានស្រង់សម្ដីអគ្គលេខាធិការអង្គការសហប្រជាជាតិលោកAntonio Guterres ក្នុងសេចក្តីថ្លែងការណ៍មួយដូច្នេះថា៖«សកម្មភាពបែបនេះល្មើសនឹងកាតព្វកិច្ចអន្តរជាតិរបស់កូរ៉េខាងជើង និងបំផ្លាញការខិតខំប្រឹងប្រែងរបស់សហគមន៍អន្តរជាតិក្នុងការរំសាយនិងទប់ស្កាត់ការសាយភាយអាវុធនុយក្លេអ៊ែរ។ ម្យ៉ាងវិញទៀត ការធ្វើបែបនេះបានបង្កអស្ថេរភាពដល់សន្តិសុខតំបន់យ៉ាងខ្លាំង ហើយកូរ៉េខាងជើងនេះហើយជាប្រទេសតែមួយគត់ដែលនៅបន្តបំពានច្បាប់ដែលហាមឃាត់សាកល្បងអាវុធនុយក្លេអ៊ែរ»។
លោក Guterres បានស្នើបន្ថែមឲ្យកូរ៉េខាងជើងបញ្ឈប់សកម្មភាពបែបនេះ និងគោរពឲ្យបាននូវកាតព្វកិច្ចអន្តរជាតិរបស់ខ្លួន។ លើសពីនេះទៅទៀត សេចក្ដីសម្រេចក្រុមប្រឹក្សាសន្តិសុខអង្គការសហប្រជាជាតិក៏បានហាមប្រាមការបាញ់សាកល្បងអាវុធនុយក្លេអ៊ែរ និងមីស៊ីលកូរ៉េខាងជើងផងដែរ។
ដោយឡែក លោក Antonio Guterres កាលពីថ្ងៃអាទិត្យក៏បានថ្កោលទោសកូរ៉េខាងជើងជុំវិញការបាញ់សាកល្បងគ្រាប់បែកអ៊ីដ្រូសែន និងចាត់ទុកថា វាជាការបង្កអស្ថេរភាពដល់សន្តិសុខតំបន់យ៉ាងខ្លាំង។ លោក ក៏បានស្នើឲ្យកូរ៉េខាងជើងបញ្ឈប់សកម្មភាពបែបនេះដែរ។
ចំណែកឯ ប្រធានាធិបតីអាមេរិកលោក ដូណាល់ ត្រាំ ឯណោះវិញ បានកោះប្រជុំក្រុមប្រឹក្សាសន្តិសុខជាតិអាមេរិកនៅថ្ងៃអាទិត្យទី៣ខែកញ្ញា ដើម្បីពិចារណាទណ្ឌកម្មផ្សេងៗក៏ដូចជាទណ្ឌកម្មសេដ្ឋកិច្ចដើម្បីដាក់សម្ពាធលើកូរ៉េខាងជើងផងដែរ។
លោកត្រាំក៏បានសរសេរក្នុងគណនីTwitter ខ្លួនថា វាដល់ពេល ដែលអាមេរិកមិនត្រូវបន្តអត់ទ្រាំទៀតទេ ហើយសកម្មភាពកូរ៉េខាងជើងបង្កការគំរាមកំហែងដល់អាមេរិកខ្លាំងណាស់។
សូមជម្រាបដែរថា សហរដ្ឋអាមេរិកកន្លងមកស្ទើរតែគ្មានពាណិជ្ជកម្មជាមួយកូរ៉េខាងជើងឡើយ ហើយបើសិនជាអាមេរិកចង់ដាក់ទណ្ឌកម្មសេដ្ឋកិច្ចទៅលើកូរ៉េខាងជើង នោះបន្ទុកទាំងនេះនឹងត្រូវធ្លាក់ទៅលើចិន។ មូលហេតុ ក៏ដោយសារចិនជាដៃគូពាណិជ្ជកម្មកូរ៉េខាងជើង៕
Tag:
ក្រុមប្រឹក្សាសន្តិសុខអង្គការសហប្រជាជាតិ
កូរ៉េខាងជើង
អាមេរិក
Antonio Guterres
© រក្សាសិទ្ធិដោយ thmeythmey.com