អន្តរជាតិ
ទូតអាមេរិកប្រចាំUN ៖ កូរ៉េខាងជើងកំពុងចង់បានសង្គ្រាម ព្រោះហ៊ានសាកល្បងគ្រាប់បែកអ៊ីដ្រូសែន
× អគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Nikki Haley បាននិយាយ កូរ៉េខាងជើងកំពុងអង្វរចង់បានសង្គ្រាមហើយ ព្រោះហ៊ានសាកល្បងគ្រាប់បែកអ៊ីដ្រូសែន បំពានសេចក្ដីសម្រេចរបស់ក្រុមប្រឹក្សាសន្តិសុខ។ ចំពោះមុខកិច្ចប្រជុំបន្ទាន់នៃក្រុមប្រឹក្សាសន្តិសុខថ្ងៃទី៤ ខែកញ្ញា លោកស្រី Haley បានស្នើឲ្យមានការដាក់ទណ្ឌកម្មបន្ថែមលើកូរ៉េខាងជើង ហើយអាមេរិកក៏មិនចង់បានសង្គ្រាមឥឡូវដែរ។
ក្រុមប្រឹក្សាសន្តិសុខអង្គការសហប្រជាជាតិបានកោះប្រជុំបន្ទាន់មួយដើម្បីរិះរកចំណាត់ការឆ្លើយតបការសាកល្បងគ្រាប់បែកអ៊ីដ្រូសែនរបស់កូរ៉េខាងជើង។ កិច្ចប្រជុំបន្ទាន់នេះត្រូវបានស្នើឡើងដោយអាមេរិក កូរ៉េខាងត្បូង បារាំង ជប៉ុន និងអង់គ្លេស។ អគ្គរដ្ឋទូតអាមេរិក Nikki Haley បានស្នើឲ្យសមាជិកទាំងអស់អនុម័តទណ្ឌកម្មដ៏ខ្លាំងបំផុតមិនធ្លាប់លើកូរ៉េខាងជើង ដើម្បីឲ្យរដ្ឋមួយនេះរាងចាល និងឈប់ធ្វើទង្វើគឃ្លើនទៀត។
ក្នុងកិច្ចប្រជុំបន្ទាន់នេះ លោកស្រី Haley បានចាត់ទុកការសាកល្បងគ្រាប់បែកអ៊ីដ្រូសែនរបស់កូរ៉េខាងជើង ដែលជាការសាកល្បងលើកទី៦ ជាការចង់បានសង្គ្រាមរបស់មេដឹកនាំកូរ៉េខាងជើង។ យ៉ាងណាក្ដី អគ្គរដ្ឋទូតអាមេរិករូបនេះបញ្ជាក់ថា សង្គ្រាមមិនមែនជាអ្វីដែលអាមេរិកចង់បានទេ ហើយអាមេរិកក៏មិនទាន់ចង់សង្គ្រាមពេលនេះដែរ ប៉ុន្តែការអត់ធ្មត់របស់អាមេរិកក៏មិនមែនគ្មានព្រំដែនដែរ គឺអាមេរិកនឹងការពារខ្លួន និងសម្ព័ន្ធមិត្តរបស់ខ្លួនជានិច្ច។
យោងតាមទីភ្នាក់ងារព័ត៌មាន Reuters អំឡុងកិច្ចប្រជុំនេះ តំណាងអាមេរិកក៏បានបង្ហាញផែនការរបស់ក្រុងវ៉ាស៊ីនតោនក្នុងការដាក់ចេញទណ្ឌកម្មថ្មីនៅក្នុងសប្ដាហ៍នេះ ដើម្បីដាក់ឲ្យសមាជិកក្រុមប្រឹក្សាសន្តិសុខទាំង១៤ផ្សេងទៀតអនុម័តនៅដើមសប្ដាហ៍ក្រោយ។ ជាមួយគ្នានោះ អាមេរិក៏នឹងត្រួតពិនិត្យទំនាក់ទំនងសេដ្ឋកិច្ចរវាងកូរ៉េខាងជើង និងប្រទេសផ្សេង ដែលខ្លួនអះអាងថា គឺជាប្រភពហិរញ្ញវត្ថុដ៏សំខាន់របស់កូរ៉េខាងជើងក្នុងការអភិវឌ្ឍនុយក្លេអ៊ែរ។
ការដាក់ទណ្ឌកម្មលើប្រទេសរកស៊ីជាមួយកូរ៉េខាងជើង អាចជាចំណាត់ការបន្ទាប់របស់រដ្ឋបាលលោក ដូណាល់ ត្រាំ ដើម្បីទប់ស្កាត់មហិច្ឆតាកូរ៉េខាងជើង។ លោក ត្រាំ បានព្រមានបណ្តាប្រទេសដែលមានជំនួញជាមួយកូរ៉េខាងជើងឲ្យដកខ្លួនឲ្យឆ្ងាយឈប់រកស៊ីជាមួយប្រទេសនេះ បើមិនចង់ខាតបង់ប្រយោជន៍។ លោកបានសង្កត់ធ្ងន់ថា ការកាត់ផ្តាច់ទំនាក់ទំនងពាណិជ្ជកម្មទាំងស្រុងជាមួយប្រទេសហ៊ានរកស៊ីជាមួយកូរ៉េខាងជើង ជាវិធានការដែលអាមេរិកកំពុងពិចារណា។
ការកាត់ផ្តាច់ចំណងពាណិជ្ជកម្មជាមួយបណ្តារដ្ឋដែលមានជំនួញជាមួយកូរ៉េខាងជើង ជាវិធានការមានប្រសិទ្ធភាពក្នុងការកាត់ផ្តាច់ចរន្តហិរញ្ញវត្ថុដែលកូរ៉េខាងជើងមាន។ ប៉ុន្តែគេមិនទាន់ដឹងច្បាស់ថា វិធានការនេះនឹងត្រូវអនុវត្តនៅពេលណាឡើយ ដ្បិតថា មន្ត្រីជាន់ខ្ពស់អាមេរិកធ្លាប់លើកឡើងពីបញ្ហានេះដែរកន្លងមក។ ច្បាស់ថា អម្រែកទណ្ឌកម្មប្រឆាំងអ្នកធ្វើជំនួញជាមួយកូរ៉េខាងជើង នឹងធ្លាក់ទៅលើចិនដែលជាខ្នងបង្អែកការទូត និងសេដ្ឋកិច្ចដ៏ចម្បងរបស់ក្រុងព្យុងយ៉ាង៕
Tag:
UN
អាមេរិក
កូរ៉េខាងជើង
Nikki Haley
© រក្សាសិទ្ធិដោយ thmeythmey.com