កូរ៉េខាងជើងត្រៀមកាដូច្រើនទៀតសម្រាប់អាមេរិក

អន្តរជាតិ

កូរ៉េខាងជើងត្រៀមកាដូច្រើនទៀតសម្រាប់អាមេរិក

06, Sep 2017 , 10:36 am

រូបភាព

ដោយ: តន ចាន់រិទ្ធារ៉ា

កូរ៉េខាងជើងហាក់មិនខ្វល់ខ្វាយការថ្កោលទោស និងការគំរាមដាក់ទណ្ឌកម្មរបស់អន្តរជាតិជុំវិញការសាកល្បងគ្រាប់បែកអ៊ីដ្រូសែនរបស់ខ្លួនឡើយ។ ខណៈដែលមហាអំណាចកំពុងពិភាក្សាគ្នាយ៉ាងតឹងសសៃកដើម្បីរកទណ្ឌកម្មថ្មីប្រឆាំងខ្លួននោះ មន្ត្រីការទូតជាន់ខ្ពស់កូរ៉េខាងជើងបានប្រកាសក្ដែងៗថា ខ្លួនមានកាដូអនុស្សាវរីយ៍ច្រើនទៀតសម្រាប់អាមេរិក បើនៅតែបន្តអនុវត្តនយោបាយព្រហើន និងចង់ដាក់សម្ពាធបន្ថែមទៀតនោះ។

មន្ត្រីការទូតកូរ៉េខាងជើង Han Tae Song នៅថ្ងៃទី៥ ខែកញ្ញា បានប្រកាសពីការសាកល្បងគ្រាប់បែកអ៊ីដ្រូសែននៅថ្ងៃទី៣ ខែកញ្ញា ដែលជាការធ្វើតេស្តលើកទី៦ និងមានអានុភាពខ្លាំងជាងគ្រាប់បែកលើកមុនៗ។ លោក Han Tae Song និយាយថា ការសាកល្បងនេះ គឺជាវិធានការការពារខ្លួនរបស់កូរ៉េខាងជើង និងក៏ជាកាដូអនុស្សាវរីយ៍សម្រាប់អាមេរិកផងដែរ។ ការប្រកាសបែបនេះ ធ្វើឡើងស្របពេលអាមេរិកកំពុងបបួលគេឯងឲ្យដាក់សម្ពាធបន្ថែមលើរដ្ឋក្បាលរឹងមួយនេះ។

យោងតាមទីភ្នាក់ងារព័ត៌មាន Reuters លោក Han Tae Song ដែលជាអគ្គរដ្ឋទូតកូរ៉េខាងជើងប្រចាំទីស្នាក់ការអង្គការសហប្រជាជាតិក្នុងទីក្រុងហ្សឺណែវ បាននិយាយថា សកម្មភាពថ្មីៗនេះរបស់កូរ៉េខាងជើង គឺជាកញ្ចប់វត្ថុអនុស្សាវរីយ៍សម្រាប់អាមេរិកតែម្នាក់គត់ ហើយអាមេរិកនឹងទទួលកាដូរបៀបនេះទៀត បើនៅតែបន្តធ្វើទង្វើគឃ្លើន និងប្រើប្រាស់ទណ្ឌកម្មដើម្បីដាក់សម្ពាធលើកូរ៉េខាងជើងទៀតនោះ។

ក្នុងកិច្ចប្រជុំបន្ទាន់ក្រុមប្រឹក្សាសន្តិសុខ តំណាងអាមេរិកបាននិយាយថា កូរ៉េខាងជើងកំពុងតែអង្វរចង់បានសង្គ្រាម ព្រោះហ៊ានសាកល្បងគ្រាប់នុយក្លេអ៊ែរបំពានច្បាប់អន្តរជាតិ។ អាមេរិក បានស្នើឲ្យសមាជិកទាំងអស់អនុម័តទណ្ឌកម្មដ៏ខ្លាំងបំផុតមិនធ្លាប់លើកូរ៉េខាងជើង ដើម្បីឲ្យរដ្ឋមួយនេះរាងចាល និងឈប់ធ្វើទង្វើគឃ្លើន។ អាមេរិកក៏បានបង្ហាញផែនការក្នុងការដាក់ចេញទណ្ឌកម្មថ្មីនៅក្នុងសប្ដាហ៍នេះ ដើម្បីដាក់ឲ្យសមាជិកក្រុមប្រឹក្សាសន្តិសុខទាំង១៤ផ្សេងទៀតអនុម័តនៅដើមសប្ដាហ៍ក្រោយ។

យ៉ាងណាក្ដី អគ្គរដ្ឋទូតរុស្ស៊ីយល់ថាការចង់ដាក់ទណ្ឌកម្មយ៉ាងប្រញាប់ប្រញាល់បែបនេះ ទំនងជាមិនអាចទៅរួចទេ។ ចំណែកឯប្រធានាធិបតីរុស្ស៊ី វ្ល៉ាឌីមៀ ពូទីន ឯណោះវិញចាត់ទុកទណ្ឌកម្មប្រឆាំងកូរ៉េខាងជើង ជារឿងគ្មានប្រយោជន៍ប៉ុណ្ណោះ។ លោក ពូទីន ជឿជាក់ថា ទោះដាក់ទណ្ឌកម្មខ្លាំងយ៉ាងណាក៏ដោយ ក៏មិនអាចបង្ខំឲ្យកូរ៉េខាងជើងបោះបង់មហិច្ឆតាផលិតអាវុធនុយក្លេអ៊ែររបស់ខ្លួនឡើយ។ លោកក៏ធ្លាប់និយាយដែរថា ការចរចាជាផ្លូវចេញប្រសើរបំផុត។

កញ្ចប់វត្ថុអនុស្សាវរីយ៍ដែលកូរ៉េខាងជើងរៀបចំជាពិសេសសម្រាប់អាមេរិក ទំនងជាគ្មានអ្វីក្រៅពីការសាកល្បងនុយក្លេអ៊ែរ ឬក៏ការបាញ់មីស៊ីលរំលងទ្វីបនោះទេ។ កូរ៉េខាងជើងបានបាញ់មីស៊ីលជាញឹកញាប់ក្នុងពេលប៉ុន្មានឆ្នាំនេះ ហើយដែលជាសញ្ញានៃការរីកចម្រើនកាន់តែលឿនៃកម្មវិធីនុយក្លេអ៊ែរ និងមីស៊ីលរបស់រដ្ឋឯកោមួយនេះ ទោះជាត្រូវរងទណ្ឌកម្មឥតឈប់ឈរក្ដី។ ចុងក្រោយនេះ កូរ៉េខាងជើងក៏មានសមត្ថភាពផលិតមីស៊ីលបាញ់ដល់ទឹកដីអាមេរិកផងដែរ៕