ពីនេះ ពីនោះ
ព័ត៍មានសុខភាព
ស្ត្រីកំពុងបំបៅដោះកូន អាចលេបថ្នាំផ្តាសាយបានទេ?
× មែនហើយ មានថ្នាំព្យាបាលជំងឺផ្តាសាយច្រើនណាស់ដែលមានសុវត្ថិភាពសម្រាប់ស្ត្រីកំពុងតែបំបៅដោះកូន។ អ្នកគ្រាន់តែប្រុងប្រយ័ត្នបន្ថែមត្រង់ថា ថ្នាំព្យាបាលជំងឺផ្តាសាយច្រើនតែផ្សំដោយថ្នាំជាច្រើនចូលគ្នា។ ដូច្នេះដើម្បីកាត់បន្ថយការប៉ះពាល់ដល់ទារក ចូរចៀសវាងផលិតផលថ្នាំណាដែលអាចព្យាបាលជំងឺច្រើនមុខ ឬមានធាតុផ្សំថ្នាំច្រើនចូលគ្នា។
ថ្នាំបំបាត់ការតឹងច្រមុះភាគច្រើនត្រូវបានគេចាត់ទុកថាមានសុវត្ថិភាពសម្រាប់ស្ត្រីបំបៅដោះកូន ហើយលទ្ធភាពជ្រាប់ចូលទៅក្នុងទឹកដោះបានមានមិនដល់មួយភាគរយផង។ ការសិក្សាមួយបានណែនាំថា ថ្នាំព្យាបាលការតឹងច្រមុះ Pseudoephedrine អាចបន្ថយការផលិតទឹកដោះ ដោយសារតែវាធ្វើឲ្យសរសៃឈាមរួមតូច ដូច្នេះវាក៏បន្ថយលំហូរឈាមដល់កន្លែងផលិតទឹកដោះដែរ។
សម្រាប់ថ្នាំដែលកែរោគក្អកដែលមានធាតុផ្សំ Dextromethorphan ត្រូវបានគេប្រើប្រាស់ជាយូរណាស់មកហើយក្នុងពេលស្ត្រីបំបៅដោះកូន ហើយក៏មានសុវត្ថិភាពដែរ។
បើសិនជាអ្នកត្រូវការប្រើថ្នាំប្រឆាំងនឹងអាឡែហ្ស៊ី វាក៏មានសុវត្ថិភាពដែរ។ ប៉ុន្តែចូរចាំថា ពពួកថ្នាំប្រឆាំអាឡែហ្ស៊ីជំនាន់ទីមួយដូចជា Diphenhydramine (Benadryl) និង Chlopheniramine (Chlor-trimeton) អាចមានសារធាតុធ្វើឲ្យអ្នក និងទារកងងុយគេងបាន ខណៈពេលជំនាន់ទីពីរ និងទីបី ដូចជា Loratadine (Claritin) និង Fexofenadine (Allegra) មិនសូវជាធ្វើឲ្យងងុយគេងទេ៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com